تھائی لینڈ میں فوجی بغاوت کے خلاف مظاہرے

بنکاک سے ملنے والی جرمن خبر ایجنسی ڈی پی اے کی رپورٹوں کے مطابق آج کے احتجاجی مظاہرے وہ پہلا موقع تھے کہ بنکاک میں مارشل لاء کی کھلی خلاف ورزی کرتے ہوئے مظاہرین نے بڑی تعداد میں فوج کے خلاف احتجاج کیا۔ یہ مظاہرے وسطی بنکاک میں کیے گئے۔ اس دوران فوجی دستوں نے اس احتجاج کو ناکام بنانے کی کوشش کرتے ہوئے کارروائی بھی کی، جس دوران کم از کم تین مظاہرین کو گرفتار کر لیا گیا جب کہ ایک شخص زخمی ہو گیا۔

اس احتجاج کے دوران جب مظاہرین کی تعداد وہاں سکیورٹی کے لیے تعینات فوجیوں کی تعداد سے کہیں زیادہ ہو گئی، تو تھائی فوج کے اہلکار وہاں سے احتیاطاﹰ پیچھے ہٹنے لگے۔ اس پر مظاہرین کی طرف سے ان کے خلاف ’دفع ہو جاؤ‘ کے نعرے بھی لگائے گئے۔

اسی دوران فوجی اہلکاروں کے ہاتھوں چند مظاہرین کی گرفتاری کی خبریں اور موبائل ٹیلی فونوں سے بنائی گئی ویڈیوز دیکھتے ہی دیکھتے سوشل میڈیا پر گردش کرنے لگیں اور شہر بھر سے مظاہرین نے اور بھی زیادہ تعداد میں وسطی بنکاک کا رخ کرنا شروع کر دیا۔

عینی شاہدین کے بقول ان مظاہرین نے بعد ازاں بنکاک میں Ratchadamri روڈ سے فتح کی اس یادگار تک احتجاجی مارچ بھی کیا، جہاں کل ہفتے کے روز بھی ایسے ہی مظاہرین نے کچھ دیر کے لیے احتجاج کیا تھا۔ اس رجحان کو دیکھتے ہوئے چند مبصرین نے خدشہ ظاہر کیا ہے کہ تھائی لینڈ میں فوج کی طرف سے پہلے مارشل لاء کے نفاذ، پھر اقتدار پر قبضے اور اس کے بعد بہت سے سرکردہ سیاستدانوں کی گرفتاری کے بعد ممکن ہے کہ بنکاک یا دیگر شہروں میں ایسا عوامی احتجاج آئندہ دنوں میں زور پکڑ جائے یا خون ریز رنگ اختیار کر جائے۔

اس پس منظر میں تھائی فوج نے عام شہریوں کو خبردار کیا ہے کہ وہ احتجاجی مظاہروں میں شامل نہ ہوں اور ان سے دور رہیں۔ تھائی لینڈ میں مارشل لاء کے نفاذ کے بعد فوج کے سربراہ جنرل پرایُتھ چان اوچا کی قائم کردہ قومی کونسل برائے تحفظ امن عامہ کے ترجمان اور فوج کے کرنل وِنتھائی سُوواری نے ٹیلی وژن پر اپنے خطاب میں کہا، ’’ہم بین الاقوامی برادری کی نظر میں تھائی لینڈ میں امن اورا ستحکام کے حوالے سے اعتماد کی فضا قائم کرنا چاہتے ہیں۔‘‘

تھائی فوج کے سربراہ جنرل پرایُتھ چان اوچا نے گزشتہ جمعرات کے روز ملک میں مارشل لاء نافذ کر کے اقتدار پر قبضہ کر لیا تھا۔ اس وقت وہاں کم از کم 150 سرکردہ سیاسی، سماجی اور علمی شخصیات زیر حراست ہیں۔ فوج کے مطابق سابق خاتون وزیر اعظم یِنگ لَک شیناوترا سمیت ان شخصیات کو فی الحال ایک ہفتے کے لیے حفاظتی حراست میں لیا گیا ہے۔

تھائی لینڈ میں مارشل لاء کے تحت پانچ سے زائد افراد کے کسی بھی سیاسی اجتماع پر پابندی ہے اور کل ہفتے کے روز فوجی قیادت نے پارلیمانی ایوان بالا یعنی سینیٹ کو تحلیل کرتے ہوئے یہ اعلان بھی کر دیا تھا کہ فوج کو اب ملک میں قانون سازی کا اختیار بھی حاصل ہو گیا ہے۔

تھائی لینڈ میں پچھلی مرتبہ فوجی بغاوت 2006ء میں ہوئی تھی۔ تب فوج نے اقتدار پر قبضے کے فوری بعد ایک عبوری وزیر اعظم اور نگران کابینہ کو نامزد کر دیا تھا۔ اس مرتبہ لیکن جنرل پرایُتھ چان اوچا نے اب تک نہ تو کوئی نگران حکومت نامزد کی ہے اور ہی اس کے لیے کسی نظام الاوقات کا اعلان کیا گیا ہے۔