تھائی لینڈ میں فوجی بغاوت پر امریکا کا شدید ردعمل

امریکا حکومت کی جانب سے کہا گیا ہے کہ تھائی لینڈ کو ملنے والی امداد میں سے فوجی تعاون کی مد میں دی جانے والی رقم معطل کی جا رہی ہے۔ خبر رساں ادارے اے ایف پی کے مطابق یہ سرمایہ تھائی لینڈ کو دی جانے والی کل امداد کا ایک تہائی بنتا ہے۔

واضح رہے کہ تھائی لینڈ میں چند روز قبل فوج نے حکومت کو برطرف کرتے ہوئے ملکی اقتدار اپنے ہاتھوں میں لے لیا تھا۔ امریکی محکمہ خارجہ کی جانب سے امریکی شہریوں سے بھی کہا گیا ہے کہ وہ تھائی لینڈ کے سفر سے گریز کریں۔

امریکی محکمہ خارجہ کی ترجمان میری ہیرف کے مطابق امریکا تھائی لینڈ کو دی جانے والی مجموعی امداد کی معطلی پر بھی غور کر رہا ہے۔ امریکا نے گزشتہ برس تھائی لینڈ کو مجموعی طور پر ساڑھے دس ملین ڈالر امداد دی تھی۔

میری ہیرف کا کہنا تھا، ’’ہم نے فی الحال تھائی لینڈ کی فوجی تربیت کے شعبے میں دی جانے والی ساڑھے تین ملین ڈالر کی امداد معطل کی ہے۔‘‘

ان کا مزید کہنا تھا، ’’ہم نظرثانی کر رہے ہیں کہ دیگر شعبہ ہائے جات میں جاری پروگرامز بھی معطل کر دیے جائیں۔‘‘

ہیرف کا کہنا تھا کہ امریکا دس رکنی آسیان کی دی جانے والی اس امداد کی معطلی پر بھی غور کر رہا ہے، جس کا تعلق تھائی لینڈ سے ہے۔ ہارف نے کہا کہ ان امریکی اقدامات کا مقصد تھائی لینڈ کی فوجی حکومت کو ایک واضح پیغام دینا ہے۔

انہوں نے زور دے کر کہا کہ تھائی لینڈ میں فوج فوری طور پر جمہوریت بحال کرے اور اس بے یقینی کی صورت حال میں انسانی حقوق کا احترام کیا جائے۔ ان کا کہنا تھا کہ امریکی قانون کے مطابق واشنگٹن حکومت ایسے ممالک کو دی جانے والی امداد کی معطلی کی پابند ہے، جہاں فوج منتخب حکومت کا تختہ الٹے۔

دوسری جانب تھائی لینڈ نے سابق وزیراعظم ینگ لک شناواترا سمیت متعدد سیاسی رہنماؤں کو حراست میں لے لیا ہے۔ واضح رہے کہ گزشتہ کئی ماہ سے جاری سیاسی بحران کے تناظر میں تھائی لینڈ کی فوج نے چند روز قبل عبوری حکومت کا تختہ الٹتے ہوئے مارشل لا نافذ کر دیا تھا۔ اس کے بعد فوج نے عوامی ردعمل کو روکنے کے لیے ملک بھر میں کرفیو کے نفاذ کا اعلان بھی کیا تھا۔