جوہری پروگرام پرکوئی ڈیڈ لاک نہیں، ایران

اقوام متحدہ کی بین الاقوامی ایجنسی برائے جوہری توانائی (آئی اے ای اے) نے ایران کو گزشتہ ماہ کی ڈیڈ لائن دی تھی کہ وہ اپنے جوہری پروگرام کے بارے میں اہم معلومات فراہم کرے۔ لیکن وہ 25 اگست کی اس مہلت تک اپنی پانچ جوہری تنصیبات سے متعلق مطلوبہ معلومات فراہم کرنے سے قاصر رہا۔ ایرانی حکومت کے بقول اس معاملے کی ’پیچیدگی‘ کے باعث وہ آئی اے ای اے کو مطمئن نہیں کر سکا ہے لیکن اس کا مطلب یہ نہیں کہ یہ معاملہ تعطل کا شکار ہو گیا ہے۔

آئی اے ای اے کے لیے ایرانی سفارتکار رضا نجفی نے منگل نو ستمبر کو تہران میں صحافیوں سے گفتگو کرتے ہوئے کہا کہ اس موضوع پر جلد ہی بلکہ ستمبر کے اواخر میں ایرانی حکام اور آئی اے ای اے کے مابین مذاکرات کیے جائیں گے۔ ان کا کہنا تھا، ’’کوئی ڈیڈ لاک نہیں ہے۔ ہمیں یقین ہے کہ ہم مطلوبہ معلومات فراہم کر دیں گے۔ ہم یہ کرنے کے لیے تیار ہیں۔‘‘

اقوام متحدہ کی جوہری ایجنسی کی ایک تازہ رپورٹ میں کہا گیا ہے کہ ایران نے اپنے جوہری پروگرام سے متعلق پانچ میں سے تین اقدامات پر عالمی برداری کو مطمئن کرنے کی کوشش کی ہے۔ یہ امر اہم ہے کہ مغربی ممالک کو خدشات ہیں کہ ایران اپنے جوہری پروگرام سے ایٹمی ہتھیار تیار کرنے کی کوشش میں ہے لیکن تہران حکومت ایسے الزامات کو ہمیشہ ہی مسترد کرتی آئی ہے۔

بین الاقوامی سفارتکاروں نے ایسے خدشات بھی ظاہر کیے ہیں کہ ایران کے جوہری پروگرام پر جاری مذاکرت کے نتیجے میں کوئی فائدہ نہیں ہو گا۔ پیر کے دن ویانا میں ایک سفارتکار نے اپنا نام مخفی رکھنے کی شرط پر نیوز ایجنسی روئٹرز کو بتایا، ’’ایران کی جوہری سرگرمیوں سے متعلق تمام تر معلومات حاصل کرنے کے امکانات صفر ہیں۔‘‘ انہوں ںے مزید کہا کہ یہ انتہائی مشکل ہے کہ ایرانی حکام اپنے جوہری پروگرام سے متلعق تمام تر معلومات فراہم کر دیں گے۔

ایران میں اعتدال پسند سیاسی رہنما حسن روحانی کے منصب صدارت سنبھالنے کے بعد عالمی سطح پر ایسے اشارے موصول ہوئے تھے کہ تہران حکومت اپنے جوہری پروگرام پر مذاکرات اور عالمی برداری کے تحفظات دور کرنے میں معاونت کرے گی۔ اگرچہ حسن روحانی نے اپنے دور اقتدار میں مغربی طاقتوں کے ساتھ مذاکرات کے کئی کامیاب ادوار مکمل کیے ہیں لیکن ان جوہری مذاکرات کے مکمل طور پر کامیاب ہونے کے بارے میں متعدد مرتبہ سوالات بھی اٹھائے جا چکے ہیں۔