شام، ’اسلامک اسٹیٹ‘ کے جنگجوؤں نے شادی دفتر کھول لیا

خبر رساں ادارے روئٹرز نے سیریئن آبزرویٹری فار ہیومن رائٹس کے حوالے سے بتایا ہے کہ الباب نامی شہر میں کھولے گئے اس شادی دفترمیں القاعدہ کے ریڈیکل جنگجوؤں سے شادی کی خواہش مند کنوری یا بیوہ خواتین اپنا نام اور پتہ درج کرا سکیں گی۔ حلب شہر کے شمال میں واقع اس شادی دفتر کے قیام کے بارے میں آزادانہ طور تصدیق نہیں ہو سکی ہے۔

لندن میں قائم اس واچ ڈاگ گروپ نے مزید بتایا ہے کہ اس شادی دفتر میں خواتین کے اندارج کے بعد جنگجو بذات خود ان کے گھر جا کر ان کے گھر والوں سے باقاعدہ طور پر ان کا ہاتھ مانگ سکیں گے۔ آبزرویٹری نے الباب کے مقامی ذرائع کے حوالے سے بتایا ہے کہ شام کے شورش زدہ علاقوں میں فعال جنگجو شادی کرنے کی غرض سے خواتین تلاش کر رہے ہیں بلکہ ایسی اطلاعات بھی ہیں کہ وہ خواتین سے زبردستی شادیاں بھی کر رہے ہیں۔

سیریئن آبزرویٹری فار ہیومن رائٹس کے ترجمان رامی عبدالرحمان نے روئٹرز کو بتایا ہے کہ شام میں جنگجوؤں کی طرف سے شادی دفتر کے قیام کے بارے میں پہلی مرتبہ سنا گیا ہے۔

ایسی اطلاعات بھی ہیں کہ اسلامک اسٹیٹ کے جنگجوؤں نے سیاحت کا کام بھی شروع کر دیا ہے اور وہ اپنے ایسے جنگجوؤں کو ہنی مون پر بھی لے جانے کا بندوبست کر رہی ہے، جن کی ابھی تازہ تازہ شادیوں ہوئی ہیں۔ ان نئے شادی شدہ جوڑوں کے علاوہ عام شہری بھی اس سیاحت سے مستفید ہو سکتے ہیں۔ بتایا گیا ہے کہ ہفتے میں دو مرتبہ اسلامک اسٹیٹ کی بسیں ایسے سیاحوں کو شامی شہر الرقہ سے عراقی شہر موصل لے جاتی ہیں۔

اسلامک اسٹیٹ نے گزشتہ ماہ ہی خلافت قائم کرنے کا اعلان کیا تھا اور اس کے جنگجو شمالی اور مشرقی شام کے وسیع تر علاقوں کے علاوہ عراقی صوبے انبار تک قابض ہیں۔ گزشتہ ہفتے ہی اس انتہا پسند گروہ نے موصل میں خواتین کو پردے کی تاکید کرتے ہوئے مکمل طور پر چہرہ چھپانے کا حکم جاری کیا تھا۔ اس بیان کے مطابق اگر کوئی خاتون اس حکم پر تعمیل نہیں کرتی تو اسے سخت سزا دی جا سکتی ہے۔ ان جنگجوؤں نے جون میں موصل پر قبضہ کیا تھا اور اب یہ عراقی دارالحکومت بغداد کی طرف پیشقدمی کر رہے ہیں۔