خودکش حملہ: ملزمان کو سزا ضرور ملے گی، شاہ سلمان کا عہد

دبئی سے موصولہ نیوز ایجنسی روئٹرز کی رپورٹوں کے مطابق سعودی عرب کے بادشاہ نے کہا کہ ملک کے مشرقی حصے میں جمعے کے روز کیے جانے والے خود کش بم حملے میں بہت زیادہ انسانی ہلاکتوں پر انہیں گہرا صدمہ ہے لیکن وہ کھل کر کہہ دینا چاہتے ہیں کہ اس جرم میں ملوث حملہ آوروں اور ان کے ہمدرد عناصر کو لازمی طور پر انصاف کے کٹہرے میں لایا جائے گا۔

روئٹرز کے مطابق شاہ سلمان نے ملکی وزیر داخلہ اور ولی عہد شہزادہ محمد بن نائف کے نام اپنے ایک پیغام میں آج اتوار 24 مئی کے روز کہا، ’’دہشت گردانہ جارحیت کے طور پر اس بم حملے کی صورت میں جس شدید جرم کا ارتکاب کیا گیا ہے، اس پر ہمیں انتہائی دکھ ہے اور یہ حملہ تمام اسلامی اور بنیادی انسانی اقدار کی بھی نفی کرتا ہے۔‘‘

شاہ سلمان بن عبدالعزیز نے اس عزم کا اظہار بھی کیا کہ سعودی عرب دہشت گردوں اور عسکریت پسندوں کے خلاف اپنی جنگ جاری رکھے گا۔ انہوں نے کہا، ’’اس حملے میں شریک ہر مجرم، منصوبہ ساز اور مدد فراہم کرنے والا یا حملہ آوروں کے ساتھ ہمدردی رکھنے والا ہر شخص اس جرم کے لیے جواب دہ بنایا جائے گا۔ ان کے خلاف عدالتی کارروائی کی جائے گی اور انہیں وہ سزا دی جائے گی، جس کے وہ حقدار ہیں۔‘‘

سعودی عرب کے مشرقی علاقے القطیف کے القدیح نامی گاؤں میں شیعہ اقلیتی مسلمانوں کی ایک مسجد میں جمعہ 22 مئی کی سہ پہر کیے جانے والے اس خود کش بم حملے میں سرکاری اعداد و شمار کے مطابق 21 نمازی ہلاک ہوئے تھے۔ یہ بم حملہ جمعے کی نماز کے وقت کیا گیا تھا اور شام اور عراق میں وسیع تر علاقوں پر قابض سنی عسکریت پسند تنظیم اسلامک اسٹیٹ نے اس حملے کی ذمے داری قبول کر لی تھی۔

ریاض میں سعودی وزارت داخلہ کے مطابق حملہ آور ایک سعودی شہری تھا جس کا نام صالح بن عبدالرحمان القشامی تھا اور وہ دہشت گردی سے متعلق الزامات کے تحت سعودی حکام کو مطلوب تھا۔ سعودی پریس ایجنسی نے لکھا ہے کہ القشامی مبینہ طور پر اسلامک اسٹیٹ سے قربت رکھنے والے دہشت گردوں کے ایک سیل کا سرگرم رکن تھا۔

القدیح کی شیعہ مسجد میں القشامی نے بم حملے کے لیے جو دھماکا خیز مواد استعمال کیا، وہ فوجی دستوں کی طرف سے استعمال کیا جانے والا ایک ایسا طاقتور دھماکا خیز مرکب تھا جو RDX کہلاتا ہے۔ سعودی عرب میں یہ بم حملہ 2004ء میں وہاں غیر ملکی مہمان کارکنوں کے ایک بڑے کمپاؤنڈ پر القاعدہ کی طرف سے کیے جانے والے دہشت گردانہ حملے کے بعد سے اب تک کا سب سے ہلاکت خیز حملہ تھا۔