آخر ایسا بھی کیا؟ دو تازہ خربوزے گیارہ ہزار یورو میں نیلام

نیوز ایجنسی اے ایف پی نے ٹوکیو سے اپنی ایک تازہ رپورٹ میں بتایا ہے کہ اعلیٰ قسم کے خربوزوں کا یہ جوڑا جاپان کے شمالی علاقے ہکائیڈو کی ساپورو سینٹرل ہول سیل مارکیٹ میں نیلام ہوا۔ جمعہ بائیس مئی کو ہونے والی اس سالانہ نیلامی میں ایک اعشاریہ پانچ ملین ین کی سب سے بڑی بولی ایک مقامی ہول سیل ڈیلر نے لگائی تھی۔

خربوزوں کی اس جوڑی کے لیے دی جانے والی یہ رقم اتنی بڑی ہے کہ اس میں جاپان میں ایک نئی کار خریدی جا سکتی ہے تاہم اے ایف پی کا کہنا ہے کہ یہ بولی اس لگژری پھل کے لیے گزشتہ سال لگائی جانے والی دو اعشاریہ پانچ ملین ین کی بولی سے بہرحال کم رہی۔

جاپان میں کسی پھل کا سیزن شروع ہونے پر اس طرح سے پھلوں کی بھاری قیمت لگانا ایک روایت ہے، جوخریدار کے وقار اور مرتبے کی خواہش کو ظاہر کرتی ہے۔

جاپان میں یُوباری خربوزے ایک اسٹیٹس سمبل یعنی وقار اور مرتبے کی علامت تصور کیے جاتے ہیں، بالکل ویسے ہی، جیسے مغربی ملکوں میں انگوروں کی کوئی اعلیٰ قسم کی شراب۔ بہت سے لوگ اس طرح کے پھل اپنے دوست احباب کے لیے تحفے کے طور پر خریدتے ہیں۔

یُوباری جاپانی جزیرے ہکائیڈو کا ایک شہر ہے، جو اپنے میٹھے اور رَس بھرے خربوزوں کے لیے شہرت رکھتا ہے۔ یُوباری کے عمدہ قسم کے خربوزے ایک مکمل دائرے کی مانند گول ہوتے ہیں اور اُن کی بالائی سطح ہموار اور یکساں نمونوں کی حامل ہوتی ہے۔ فروخت کرتے وقت خربوزے کے اوپر انگریزی حرف ٹی کی شکل کی دو شاخیں چھوڑ دی جاتی ہیں اور انہیں ایک آرائشی ڈبے میں بند کر کے فروخت کے لیے پیش کیا جاتا ہے۔

اگرچہ نیلامی میں ان خربوزوں کے لیے دی جانے والی بولی بہت زیادہ ہے تاہم حقیقت یہ ہے کہ جاپان میں دیگر پھل بھی بہت مہنگے بکتے ہیں۔ خبر رساں ادارے اے ایف پی کے مطابق جاپان کی کسی سُپر مارکیٹ میں آپ کو ایک سیب کے لیے تین ڈالر سے زیادہ رقم بھی ادا کرنا پڑ سکتی ہے جبکہ بیس چیریز کے ایک خوبصورت پیکٹ کی قیمت ایک سو ڈالر سے زیادہ تک بھی ہو سکتی ہے۔