کوئٹہ میں انسداد پولیو ٹیم پر حملہ، چار رضاکار ہلاک

اینٹی پولیو ورکرز پر حملوں کے بعد کوئٹہ سمیت بلوچستان بھرمیں انسداد پولیو کی مہم غیر معینہ مدت تک کے لیے روک دی گئی ہے جبکہ دوسری جانب لیڈی ہیلتھ ورکرز نے بھی صوبے بھر میں سکیورٹی کے ناقص انتظامات کے باعث پولیو کے خلاف مہم کے بائیکاٹ کا اعلان کر دیا ہے۔

انسداد پولیو مہم کے رضا کاروں پر تازہ ترین حملہ کوئٹہ کے نواح میں مشرقی بائی پاس کے علاقے میں بدھ 26 نومبر کو اس وقت کیا گیا جب یہ رضاکار ایک ویگن میں سوار تھے اور اپنی مہم کے لیے رپورٹ کرنے کی خاطر شہر آ رہے تھے۔ عینی شاہدین کے مطابق حملہ آوروں نے ان پولیو ورکرز پر گھات لگا کر فائرنگ کی اور موقع سے فرار ہو گئے۔

فائرنگ کے نتیجے میں تین خاتون ورکروں سمیت چار افراد موقع پر ہی ہلاک ہو گئے جبکہ تین دیگر رضاکار خواتین زخمی ہوگئیں۔ زخمیوں کو فوری طبی امداد کے لیے کوئٹہ سول ہسپتال منتقل کر دیا گیا، جہاں ایک زخمی خاتون کی حالت ابھی تک نازک ہے۔ بدھ کی شام تک اس حملے کی ذمہ داری کسی گروپ نے قبول نہیں کی تھی۔

صوبائی حکومت نے انسداد پولیو مہم میں شامل رضاکاروں کی سکیورٹی کے لیے مؤثر اقدامات کے دعوے بار بار کیے ہیں تاہم آج کوئٹہ میں شدت پسندوں نے جن پولیو ورکرز پر حملہ کیا، انہیں کوئی سکیورٹی مہیا نہیں کی گئی تھی۔

اس حملے میں زخمی ہونے والی ایک خاتوں رضاکار سمیرا نے ڈی ڈبلیو سے گفتگو کرتے ہوئے اس حملے کی تفصیلات کچھ یوں بتائیں، ’’حملہ آوروں کی تعداد دو تھی۔ ایک موٹر سائیکل پر سوار تھا۔ دوسرے نے ہماری گاڑی روکی اور فائرنگ شروع کر دی۔ پہلے مجھ پر فائرنگ کی گئی۔ بعد میں دیگر رضاکاروں پر بھی گولیاں برسائی گئیں۔ سکیورٹی کے لیے وہاں کوئی نہیں تھا۔ ایک پولیس اہلکار دور کھڑا تھا، وہ بھی نزدیک نہیں آیا۔ ہم سب کو بلاتے رہے لیکن ہماری مدد کے لیے کوئی نہیں آیا۔‘‘

بلوچستان کے آٹھ اضلاع میں تین روزہ انسداد پولیو مہم کا آج بدھ کو تیسرا اور آخری دن ہے اور اس مہم کے دوران چھ لاکھ تہتر ہزار آٹھ سو چوبیس بچوں کو پولیو کے حفاظتی قطرے پلائے جانے کا ہدف مقرر کیا گیا تھا۔ تاہم یہ مہم سکیورٹی وجوہات کی بناء پراب روک دی گئی ہے اور 850 سے زائد لیڈی ہیلتھ ورکرز نے بھی صوبے بھر میں ناقص سکیورٹی انتظامات کی شکایت کرتے ہوئے اس ویکسینیشن مہم کے بائیکاٹ کا اعلان کر دیا ہے۔

پاکستان میں ڈبلیو ایچ او کے سینئر اہلکار ڈاکٹر زبیر مفتی کے بقول بلوچستان میں پولیو ٹیموں پر حملوں کی اہم وجہ صوبے میں امن و امان کی مخدوش صورتحال ہے جسے بہتر بنانے کی ضرورت ہے۔ ڈی ڈبلیو سے گفتگو کرتے ہوئے ان کا کہنا تھا، ’’آج کے حملے میں ڈبلیو ایچ او سے وابستہ ورکرز کو نقصان نہیں پہنچا۔ اس حملے کا نشانہ اینٹی پولیو ٹیم کے مقامی رضاکار بنے ہیں۔ پولیو کے خلاف جاری اس مہم پر بلوچستان میں بد امنی کی حالیہ صورتحال بری طرح اثر انداز ہو رہی ہے۔ حکومت کو امن و امان کی بہتری کے لیے مؤثر اقدامات کرنا ہوں گے تاکہ اس مہم میں حصہ لینے والے رضاکاروں کو ان کے کام کے دوران ذاتی تحفظ کا احساس بھی ہو۔‘‘

بلوچستان میں رواں سال کے دوران اب تک پولیو کی بیماری کے 14 نئے کیسز سامنے آ چکے ہیں اور ماہرین دسمبر کے آخر تک اس تعداد میں مزید اضافے کا خدشہ ظاہر کر رہے ہیں۔