پاکستانی سیاست میں جمود، اسلام آباد میں دھرنوں کا چھبیسواں دن

حکومت اور تحریک انصاف کے درمیان مذاکرات میں دونوں جانب سے گزشتہ شب تک پیشرفت کے دعوے کیے گئے تھے۔ تحریک انصاف کے رہنما شاہ محمود قریشی کا کہنا تھا کہ حکومتی ٹیم نے پانچ مطالبات مان لیے ہیں لیکن ایک مطالبہ تسلیم نہیں کیا جا رہا۔

دونوں جانب سے آج بھی مذاکرات کرنے کا کہا گیا تھا تاہم اطراف کی قیادت کے سیلاب زدہ علاقوں کے دورے کی وجہ سے منگل کی شام تک مذاکراتی کمیٹیوں کی نشست منعقد نہ ہو سکی۔

وقت گزرنے کے ساتھ ساتھ ملکی سیاست میں حالیہ سیلابوں سے ہونے والی تباہی بھی موضوع بنی ہوئی ہے۔ دھرنے کے شرکاء اور ان کی قیادت کا کہنا ہے کہ عوامی نمائندوں کو چاہیے کہ وہ اپنا اقتدار بچانے کے لیے پارلیمنٹ کے مشترکہ اجلاس میں شرکت کی بجائے اپنے علاقوں میں جا کر لوگوں کی خدمت کریں۔

ادھر پارلیمنٹ کے مشترکہ اجلاس میں شریک جماعتوں کا کہنا ہے کہ دھرنے دینے والوں کو ملک میں ہونے والی تباہی کا احساس کرتے ہوئے احتجاج ختم کر دینا چاہیے۔ پیپلز پارٹی کی سینیڑ روبیہ خالد کا کہنا ہے، ''ان کو بھی چاہیے کہ جو ان کے جائز مطالبات ہیں حکومت نے مان لیے ہیں۔ یہ اس دھرنے کو ختم کریں اور حکومت کو کھلے ذہن اور ہاتھوں کے ساتھ چھوڑیں تاکہ وہ بھی جا کر کام کرے اور یہ خود بھی ان کا ساتھ دیں۔ یہ سب کا مسئلہ ہے اور سب کو متحد ہونے کی ضرورت ہے۔"

پاکستانی وزیر اعظم نواز شریف اور ان کی مخالف جماعت، تحریک انصاف کے سربراہ عمران خان نے منگل کے روز پنجاب میں سیلاب سے متاثرہ علاقوں کا دورہ کیا۔ عمران خان نے اپنے کارکنوں کو ہدایت کر رکھی تھی کہ وہ دھرنا جاری رکھیں اور وہ (عمران خان) دورہ مکمل کر کے منگل کی شام واپس دھرنے میں شریک ہو جائیں گے۔

اسی دوران وفاقی وزیر خواجہ آصف کا کہنا ہے کہ ملک میں ہونے والی حالیہ بارشوں کی مثال گزشتہ ایک صدی میں نہیں ملتی۔ پارلیمنٹ کے مشترکہ اجلاس کے دوران خواجہ آصف نے ملک میں سیلاب سے ہونے والے نقصانات پر بریفنگ دیتے ہوئے کہا کہ زیادہ تر اموات بارشوں کی وجہ سے ہوئیں۔

انہوں نے کہا کہ دریائے چناب میں آنے والے سیلاب نےسب سے زیادہ تباہی مچائی اور گجرانوالہ ڈویژن سیلاب سے سب زیادہ متاثر ہوا کیوں کہ اس ڈویژن میں ردعمل کا وقت بہت کم ہوتا ہے۔ وفاقی وزیر برائے پانی و بجلی نے کہا کہ مستقبل میں اس قسم کی صورتحال سے بچنے کے لیے فلڈ کمیشن اور میٹرولوجیکل ڈپارٹمنٹ کے لیے مزید فنڈنگ کی ضرورت ہے۔

انہوں نے کہا کہ جانی نقصان کے علاوہ بڑے پیمانے پر مالی نقصانات بھی ہوئے ہیں۔ خواجہ آصف نے کہا، "تقریبا تین لاکھ پچیس ہزار چھ سو سینتالیس ایکڑ پر کھڑی فصل خصوصا چاول کی فصل تباہ ہوئی ہے۔اس وقت دو سو سترہ ریلیف کیمپ قائم کیے گئے ہیں۔ چار لاکھ چھتیس ہزار کی آبادی براہ راست متاثر ہوئی ہے۔

اٹھارہ ہزار دو سو ستائیس لوگوں کا انخلاء کیا گیا ہے اور اس وقت دو ہزر افراد ریلیف کیمپوں میں ہیں۔" دریں اثناء فوج کی جانب سے بھی سیلاب اور بارشوں سے متاثرہ علاقوں میں امدادی کارروائیاں جاری ہیں۔ کے پی کے کے وزیر اعلیٰ پرویز خٹک نے منگل کو بری فوج کے سربراہ سے ملاقات کی اور انہیں سیلاب زدگان کی امداد کے لیے دس کروڑ روپے کا امدادی چیک پیش کیا۔