پانچ اور امریکی ریاستوں میں ہم جنس پرستوں کو قانونی شادیوں کی اجازت

واشنگٹن سے موصولہ رپورٹوں کے مطابق امریکی سپریم کورٹ نے پیر چھ اکتوبر کے روز بغیر کوئی بھی تبصرہ کیے ہم جنس پرست مردوں اور خواتین کی آپس میں قانونی شادیوں کو ممنوع قرار دینے کی جن پانچ ریاستوں کی اپیلوں کو مسترد کر دیا، وہ انڈیانا، اوکلاہوما، یُوٹاہ، ورجینیا اور وِسکونسن کی طرف سے دائر کی گئی تھیں۔

امریکی سپریم کورٹ کی طرف سے ایسی شادیوں پر پابندی لگانے کی پانچ اپیلوں کے مسترد کیے جانے کے بعد اب اس طرح کی کوئی بھی دوسری اپیل ملک کی اس اعلیٰ ترین عدالت میں زیر سماعت نہیں ہے، جو کسی وفاقی ریاست کی حکومت یا اس کے نمائندہ کسی ادارے نے دائر کی ہو۔ اس کا مطلب یہ ہے کہ امریکا میں آپس میں قانونی طور پر شادیاں کرنے کے خواہش مند ہم جنس پرست مردوں اور خواتین کے لیے ان کے ارادوں کی تکمیل مقابلتاﹰ مزید آسان ہو گئی ہے۔

نیوز ایجنسی ایسوسی ایٹڈ پریس کے مطابق آج کے سپریم کورٹ کے فیصلے کے بعد اب امریکا کی مجموعی طور پر 30 ریاستوں اور ملکی دارالحکومت واشنگٹن ڈی سی میں ایک ہی جنس کے افراد کی آپس میں باقاعدہ شادیوں کو قانونی تحفظ حاصل ہو گیا ہے۔ تاہم سپریم کورٹ کے ججوں نے آج پانچ ریاستوں کی قانونی اپیلوں کو مسترد کرتے ہوئے اس بارے میں کوئی ایسا جامع فیصلہ نہیں کیا، جس کی مدد سے پورے امریکا میں ہم جنس پرست افراد کی آپس میں باقاعدہ شادیوں سے متعلق متنازعہ موضوع ایک ہی بار حل ہو جائے۔

نیوز ایجنسی اے پی نے لکھا ہے کہ اس عدالتی فیصلے کے بعد پانچ ریاستوں میں ہم جنس پرست افراد کی آپس میں قانونی شادیوں کے سلسلے میں ہر قسم کا التواء دور ہو گیا ہے۔ ساتھ ہی ایک دوسرے مختصر فیصلے میں عدالت نے یہ بھی کہا ہے کہ چھ دیگر امریکی ریاستوں میں بھی ہم جنس پرست افراد جلد ہی آپس میں قانونی طور پر شادیاں کر سکیں گے۔ ان ریاستوں میں کولوراڈو، کینساس، شمالی کیرولائنا، جنوبی کیرولائنا، ویسٹ ورجینیا اور وائیومنگ شامل ہیں۔

امریکی سپریم کورٹ کے نو میں سے اگر صرف چار جج بھی حمایت کر دیں تو یہ عدالت کسی بھی مقدمے کی سماعت کر سکتی ہے۔ لیکن کسی بھی مقدمے میں فیصلے کے لیے ججوں کی اکثریتی رائے یعنی نو میں سے کم از کم پانچ ججوں کی طرف سے تائید درکار ہوتی ہے۔ آج کیے جانے والے فیصلے کے حوالے سے یہ واضح نہیں کہ ججوں نے پانچ ریاستوں کی اپیلوں کی سماعت نہ کرنے کا جو فیصلہ کیا، وہ کس تناسب سے کیا گیا۔