مودی کا نیو یارک میں تاریخی عوامی خطاب

بھارتی وزیر اعظم نریندر مودی کا نیو یارک میں شاندار استقبال کیا گیا اور ان کا خطاب سننے کے لیے امریکا بھر سے بھارتی نژاد امریکی شہریوں کے علاوہ اعلیٰ امریکی شخصیات بھی موجود تھیں۔ خبر رساں ادارے روئٹرز کے مطابق میڈیسن اسکوائر گارڈن میں ایک میلے کا سا سماں تھا اور یہ عوام سے بھرا ہوا تھا۔ یہ امر اہم ہے کہ اس ایرینا میں بیس ہزار افراد کے بیٹھنے کی گنجائش ہے اور یہ گارڈن اسی وقت پُر ہوتا ہے جب کوئی معروف روک اسٹار اپنے فن کا مظاہرہ کرتا ہے یا پھر کھیلوں کا انعقاد کیا جاتا ہے۔ مودی کی تقریر سے قبل وہاں ایک ثقافتی پروگرام کا اہتمام بھی کیا گیا، جس میں موسیقی اور دیگر ثقافتی شوز بھی منعقد کیے گئے۔

نریندر مودی جب خطاب کے لیے اسٹیج پر آئے تو ’مودی، مودی‘ کے نعروں سے میڈیسن اسکوائر گونج اٹھا۔ مودی نے کہا، ’’دنیا جس طریقے سے اس وقت بھارت کو دیکھتی ہے ، اس میں امریکا کی بھارتی کمیونٹی نے ایک اہم کردار ادا کیا ہے۔‘‘ انہوں نے کہا کہ ماضی میں لوگ کہتے تھے کہ بھارتی لوگ سانپوں سے کھیلتے ہیں لیکن اب انہوں نے دیکھ لیا ہے کہ یہی عوام کمپیوٹر ماؤس سے کھیل رہے ہیں، جس کی وجہ سے دنیا کا چلن بدل گیا ہے۔

مودی نے زور دیا کہ ان کی حکومت بھارتی عوام کی ترقی کے لیے اکیلے کچھ حاصل نہیں کر سکتی بلکہ یہ اسی صورت میں ممکن ہو گا جب سارے بھارتی ان کا ساتھ دیں گے۔ اپنے 70 منٹ دورانیے کے خطاب میں ہندو قوم پرست سیاستدان مودی نے مزید کہا کہ اکیسویں صدی ایشیا کی صدی ہے اور بھارت دنیا بھر کی ترقی میں اہم کردار ادا کر سکتا ہے۔

بھارتی نژاد امریکی شہریوں کی طرف سے اپنے شاندار استقبال پر تبصرہ کرتے ہوئے نریندر مودی کا کہنا تھا، ’’آج تک کسی بھارتی رہنما کو اس طرح کی محبت نہیں ملی۔ میں اس محبت کا قرض چکاتے ہوئے بھارت کو آپ کے خوابوں کی تعبیر دوں گا۔‘‘ انہوں نے بھارتی نژاد غیر ملکیوں کو بھارت کا مستقل ویزا دینے کا عہد کیا اور کہا کہ امریکی شہریوں کو بھارت پہنچنے پر کوئی تاریخ طے کیے بغیر فوری طور پر ویزے جاری کیے جائیں گے۔

اپنے ملک کی ترقی کے منصوبہ جات کے حوالے سے گفتگو کرتے ہوئے انہوں نے کہا، ’’لوگ ایک بڑے وژن کی بات کرتے ہیں۔ وہ کہتے ہیں کہ ایک بڑا وژن پیش کیا جائے۔ تو میں انہیں کہتا ہوں کہ میں چائے بیچتا ہوا اس مقام پر پہنچا ہوں ۔۔۔ میں ایک چھوٹا اور عام انسان ہوں اور اسی لیے عام لوگوں کے لیے بڑے بڑے منصوبے رکھتا ہوں۔‘‘

بھارتی وزیر اعظم منگل کے دن واشنگٹن میں امریکی صدر باراک اوباما سے ملاقات کریں گے۔ توقع کی جا رہی ہے کہ اس موقع پر بھی ان کا شاندار استقبال کیا جائے گا۔ قبل ازیں اپنے اسی دورہء امریکا کے دوران مودی نے اقوام متحدہ کی جنرل اسمبلی سے بھی خطاب کیا تھا، جس دوران انہوں نے عالمی برادری کے سامنے بھارتی موقف کو مضبوط طریقے سے پیش کیا۔

یہ امر اہم ہے کہ بطور بھارتی وزیر اعظم امریکا کا پہلا دورہ کرنے والے مودی کو 2005ء میں امریکا کا ویزا جاری نہیں کیا گیا تھا۔ اس کی وجہ گجرات کے مسلم مخالف مذہبی فسادات میں ان کا مبینہ طور پر ملوث ہونا بتایا گیا تھا۔ مودی اس وقت گجرات کے وزیر اعلیٰ تھے۔ تاہم مودی نے ہمیشہ ہی اس تناظر میں کسی بھی غلط اقدام کا مرتکب ہونے سے انکار کیا ہے۔