مسافر بردار طیارے کی تباہی میں روسی ملوث ہیں، یوکرائن

خبر رساں ادارے ڈی پی اے نے بتایا ہے کہ ہفتے کے دن ایک نیوز کانفرنس میں یوکرائن کے کاؤنٹر انٹیلی جنس چیف وٹالی نائیڈا نے الزام عائد کیا کہ روس نواز علیحدگی پسند ملائیشیا ایئر لائنز کی پرواز MH17 پر میزائل حملے میں براہ راست شریک تھے۔ جمعرات کے دن اس مسافر بردار طیارے کے تباہ ہونے کے نتیجے میں مجموعی طور پر 298 افراد ہلاک ہو گئے تھے۔

اس جہاز کی تباہی کے بارے میں تبصرہ کرتے ہوئے یوکرائنی انٹیلی جنس چیف نے کہا، ’’ہمارے پاس ایسے ٹھوس ثبوت ہیں کہ یہ دہشت گردانہ کارروائی وفاق روس کی مدد کے ساتھ کی گئی ہے۔‘‘

یوکرائن حکومت نے یہ الزام بھی عائد کیا ہے کہ مشرقی یوکرائن ميں جہاں یہ طیارہ گر کر تباہ ہوا ہے، روس نواز علیحدگی پسند لاشوں اور جہاز کے مختلف پرزوں کو وہاں سے ہٹا رہے ہیں تاکہ اس حادثے کی تحقیقات کو اثر انداز کیا جا سکے۔

ادھر ملائیشیائی حکام نے بھی کہا ہے کہ حادثے کے مقام کو محفوظ نہیں رکھا گیا ہے اور اہم شواہد کو مسخ کیا گیا ہے۔ اس صورتحال میں مشرقی یوکرائن کے باغیوں نے دعویٰ کیا ہے کہ انہوں نے لاشوں کو ہاتھ تک نہیں لگایا ہے تاہم وہ اس بارے میں فکر مند ہیں کہ یہ لاشیں شدید گرمی میں پڑی ہوئی ہیں۔

سلامتی و تعاون کے یورپی ادارے OSCE کے ماہرین اگرچہ اس حادثے کی وجوہات جاننے کے لیے یوکرائن پہنچ چکے ہیں تاہم ہفتے کے دن بھی انہیں مکمل طور پر حادثے کے مقام تک مکمل رسائی نہیں دی گئی۔ یہ امر اہم ہے کہ جہاں یہ جہاز گر کر تباہ ہوا ہے، وہاں روس نواز باغیوں کا کنٹرول ہے۔

بین الاقوامی برداری نے مطالبہ کیا ہے کہ ماہرین کو حادثے کے مقام پر مکمل رسائی دی جائے تاکہ وہ اپنی تحقیقات مکمل کر سکیں۔ ہالینڈ، برطانیہ اور امریکا نے روس پر زور دیا ہے کہ عالمی ماہرین کو تحقیقات سے نہ روکا جائے۔

برطانوی وزیر اعظم ڈیوڈ کیمرون نے کہا ہے کہ اگر یہ ثابت ہو جاتا ہے کہ اس جہاز کی تباہی کے لیے روس نواز باغی ذمہ دار ہیں تو ماسکو حکومت پر الزام جائے گا کہ وہ اس ملک کو عدم استحکام کا شکار بنانے کا ذمہ دار ہے۔ انہوں نے یورپی یونین کے رکن ممالک کو تنقید کا نشانہ بنایا اور کہا کہ وہ کریملن کے خلاف ایکشن لینے میں سست ثابت ہو رہے ہیں۔

بوئنگ 777 کی تباہی کے لیے یوکرائن اور روس نواز باغی ایک دوسرے کو ذمہ دار قرار دے رہے ہیں۔ ملائیشائی ایئر لائنز کی یہ پرواز ایمسٹر ڈیم سے کوالالمپور جا رہی تھی کہ یہ اس وقت مبینہ طور پر میزائل حملے کا شکار ہوئی، جب یہ یوکرائن کی فضائی حدود میں تھی۔

دوسری طرف جرمن چانسلر انگیلا میرکل نے ہفتے کے دن روسی صدر ولادیمیر پوٹن سے ٹیلی فون پر گفتگو میں اتفاق کیا ہے کہ اس جہاز کی تباہی کی وجوہات جاننے کے لیے غیر جانبدار تحقیقات کے لیے باغیوں اور یوکرائن کی حکومت کے مابین فائر بندی ضروری ہے۔ چانسلر میرکل کے ایک ترجمان نے بتایا ہے کہ دونوں رہنماؤں نے اتفاق کیا ہے کہ انٹرنیشنل سول ایوی ایشن آرگنائزيشن کی قیادت میں ماہرين کی ايک ٹیم کو فوری طور پر حادثے کے مقام تک مکمل رسائی دی جائے۔