زمبابوے ٹور: ICC کا اپنے ایمپائر پاکستان نہ بھیجنے کا فیصلہ
17 مئی 2015
کرکٹ کی اس گورننگ باڈی کا کہنا ہے کہ یہ فیصلہ آئی سی سی کے سلامتی کے امور سے متعلقہ مشیر کی رپورٹ ملنے کے بعد کیا گیا ہے۔ آئی سی سی کی جانب سے جاری کردہ اس بیان میں کہا گیا ہے:’’آئی سی سی نے آج پی سی بی (پاکستان کرکٹ بورڈ) اور زیڈ سی (زمبابوے کرکٹ) کو مطلع کیا ہے کہ وہ عنقریب مجوزہ کرکٹ سیریز کے لیے اپنے حکام کو پاکستان نہیں بھیج رہی۔ یہ فیصلہ اپنے سکیورٹی کنسلٹنٹ کی رپورٹ ملنے پر کیا گیا ہے۔‘‘
نیوز ایجنسی اے ایف پی کے مطابق پاکتسان کرکٹ بورڈ نے اے ایف پی کے رابطہ کرنے پر اس بات کی تصدیق کی ہے کہ اب یہ بورڈ خود ایمپائر مقرر کرے گا اور ممکن ہے کہ ایک ایمپائر زمبابوے سے بھی لیا جائے۔
نیوز ایجنسی روئٹرز کے مطابق پاکستان کرکٹ بورڈ نے جمعے کے روز یہ دعویٰ کیا تھا کہ زمبابوے کرکٹ کی جانب سے یہ یقین دہانی کروا دی گئی ہے کہ زمبابوے کی کرکٹ ٹیم یہ دورہ ضرور کرے گی۔ روئٹرز کے مطابق زمبابوے کی جانب سے ابھی بھی یہ کہا جا رہا ہے کہ اس دورے کے موضوع پر ابھی بات چیت کا سلسلہ جاری ہے۔
بتایا گیا ہے کہ زمبابوے کی کرکٹ ٹیم منگل اُنیس مئی کو علی الصبح پاکستان پہنچ رہی ہے۔ اس دورے کے دوران بائیس اور چوبیس مئی کو دو ٹوئنٹی ٹوئنٹی جبکہ چھبیس، اُنتیس اور اکتیس مئی کو تین وَن ڈے میچ کھیلے جائیں گے۔ یہ تمام میچ لاہور کے قذافی اسٹیڈیم میں منعقد ہوں گے۔
آئی سی سی نے یہ بھی کہا ہے کہ اگرچہ وہ سلامتی کی وجوہات کی بناء پر اپنے میچ حکام اس کرکٹ سیریز کے لیے پاکستان نہیں بھیج رہی لیکن یہ یقین دلاتی ہے کہ اس دوران ہونے والے تمام میچوں کو ’سرکاری حیثیت‘ حاصل ہو گی۔
واضح رہے کہ کراچی میں ایک بس پر ہونے والے اُس دہشت گردانہ حملے کے بعد، جس میں پنتالیس افراد ہلاک ہو گئے تھے، زمبابوے نے جمعرات کو پاکستان کا دورہ ملتوی کر دیا تھا لیکن چوبیس ہی گھنٹے بعد پھر یقین دہانی کرائی تھی کہ ٹیم ضرور پاکستان آئے گی۔
ہفتہ سولہ مئی سے ٹکٹ فروخت ہونا شروع ہو گئے ہیں جبکہ میچوں کے دوران حفاظت پر مامور پولیس اہلکاروں نے بھی اپنی مشقیں شروع کر دی ہیں۔ ان میچوں کے دوران زمبابوے کے کھلاڑیوں کی حفاظت پر چھ ہزار پولیس اہلکار مامور کیے گئے ہیں۔
ڈیوڈ واٹمور نے، جو ماضی میں پاکستان کے کوچ رہ چکے ہیں اور آج کل زمبابوے کے کوچ ہیں، اتوار سترہ مئی کو اپنے ایک ٹویٹر پیغام میں یہ عندیہ دیا ہے کہ ٹیم پاکستان کے دورے پر روانہ ہونے والی ہے:’’حریف ٹیم کے کوچ کے طور پر پاکستان واپسی اور دوستوں کے ساتھ پھر سے ملاقات کا منتظر ہوں۔ زمبابوے کی ٹیم جیت کے لیے سخت محنت کر رہی ہےاور کرتی رہے گی۔‘‘