اٹھائیس ملکوں میں یورپی پارلیمانی الیکشن، ووٹنگ آج سے

آئندہ اتوار یعنی 25 مئی تک جاری رہنے والے اس وسیع تر انتخابی عمل میں یونین کے کُل 400 ملین کے قریب رائے دہندگان کو فرانس میں اسٹراسبرگ کی یورپی پارلیمان کے 751 ارکان کا انتخاب کرنا ہے۔ آج پہلے مرحلے کے دوران برطانیہ اور ہالینڈ کے شہری ان انتخابات میں حصہ لے رہے ہیں۔ برطانوی عوام کو یورپی پارلیمنٹ میں اپنے 73 اور ڈچ ووٹروں کو اپنے 26 نمائندوں کا انتخاب کرنا ہے۔ ہالینڈ میں انتخابی مراکز آج رات نو بجے بند ہوں گے جبکہ برطانیہ میں پولنگ رات گیارہ بجے مکمل ہو جائے گی۔

یونین کے رکن زیادہ تر ملکوں میں ووٹنگ اتوار کے روز ہو گی۔ سب سے آخر میں جس ملک میں یورپی انتخابی عمل مکمل ہو گا وہ اٹلی ہو گا، جہاں ووٹروں کے لیے پولنگ اسٹیشن رات گیارہ بجے تک کھلے رہیں گے۔ اس کے بعد مجموعی نتائج اتوار کی رات قریب بارہ بجے سے سامنے آنا شروع ہو جائیں گے۔

برطانیہ میں یورپی انتخابی عمل سے کچھ پہلے تک کے عوامی جائزوں کے مطابق کافی زیادہ امکان ہے کہ دائیں بازو کی انتہا پسند پارٹی UKIP کو کافی زیادہ عوامی تائید حاصل ہو جائے اور ممکنہ طور پر اس کے کئی امیدوار یورپی پارلیمان میں پہنچ جائیں۔

اس پارٹی کے سربراہ نائجل فیراج ہیں، جنہوں نے اپنے ساتھیوں کے ساتھ مل کر برطانیہ کے یورپی یونین سے اخراج کا نعرہ لگا کر اور دوسرے ملکوں سے آنے والے تارکین وطن کے خلاف تقریریں کر کے عوامی ہمدردیاں حاصل کرنے کی کوشش کی ہے۔

رائے عامہ کے جائزوں کے مطابق ممکن ہے کہ برطانیہ میں یو کے انڈیپینڈنس پارٹی دونوں بڑی روایتی سیاسی جماعتوں لیبر پارٹی اور قدامت پسندوں کی ٹوری پارٹی کو بھی پیچھے چھوڑتے ہوئے 30 فیصد تک تائید حاصل کر لے اور یورپی سیاست میں سب سے بڑی برطانوی سیاسی پارٹی بن جائے۔

ہالینڈ میں 12.5 ملین رائے دہندگان کو اسٹراسبرگ کی پارلیمان کے 26 ڈچ ارکان کا انتخاب کرنا ہے اور وہاں بھی یورپ کے بارے میں کم امیدی کا اظہار کرنے والی سیاسی جماعتیں کافی مقبولیت حاصل کر چکی ہیں۔ عوامی جائزوں کے مطابق ہالینڈ میں یورپ کے ’مخالفین‘ اور ’دوستوں‘ کے مابین کانٹے دار مقابلے کی توقع ہے۔

جرمن خبر ایجنسی ڈی پی اے کے مطابق امکان ہے کہ متنازعہ ڈچ عوامیت پسند رہنما گیئرٹ ولڈرز کی فریڈم پارٹی کو، جو تارکین وطن اور مسلمانوں پر اشتعال انگیز تنقید کے لیے مشہور ہے، یورپی پارلیمان میں پانچ سیٹیں حاصل ہو جائیں۔

یورپی یونین کے سب سے زیادہ آبادی والے ملک جرمنی میں یورپی پارلیمانی انتخابات کے دوران رائے دہی اتوار کے روز عمل میں آئے گی۔

برسلز سے آمدہ رپورٹوں میں یورپی سطح پر لیے جانے والے آخری جائزوں کا حوالہ دیتے ہوئے بتایا گیا ہے کہ عوامی تائید کی اس دوڑ میں یورپی قدامت پسندوں کو مجموعی طور پر اپنے سوشل ڈیموکریٹ حریفوں پر معمولی سبقت حاصل ہے لیکن کئی کم یورپ پسند جماعتیں اور انتہا پسند پارٹیاں بھی کافی زیادہ حمایت حاصل کر سکتی ہیں۔