اسلام آباد: تصادم میں تین افراد ہلاک، سینکڑوں زخمی، مظاہرے جاری

اتوار کے روز وزیر اعظم نواز شریف کے زیر صدارت ایک اعلیٰ سطحی اجلاس میں منگل کے روز پارلیمنٹ کا مشترکہ اجلاس بنانے کا فیصلہ کیا گیا۔ اس اجلاس میں جمہوریت اور آئین کی بالا دستی کے لیے پارلیمنٹ کے مشترکہ اجلاس میں ایک قرارداد پیش کرنے کی منظوری بھی دی گئی۔ اعلیٰ سطحی اجلاس میں پارلیمنٹ پر حملے اور مظاہرین کے پرتشدد رویے کی مذمت بھی کی گئی۔

اسی دوران پاکستانی بری فوج کے سربراہ کی زیر صدارت کور کمانڈرز کی ایک کانفرنس بھی اپنے طے شدہ شیڈول سے ایک دن قبل یعنی آج اتوار کی شام ہو رہی ہے۔

فوج کے شعبہ تعلقات عامہ آئی ایس پی آر کی جانب سے جاری کردہ ایک بیان میں کہا گیا ہے کہ کور کمانڈرز کا اجلاس اب پیر کی بجائے اتوار کی شام کو چیف آف آرمی سٹاف جنرل راحیل شریف کی سربراہی میں منعقد ہو گا۔ تجزیہ کاروں کا کہنا ہے کہ موجودہ ملکی صورتحال کے تناظر میں اس اجلاس میں اہم فیصلے کیے جا سکتے ہیں۔

اس سے قبل اسلام آباد میں پارلیمنٹ ہاؤس کے سامنے مظاہرین اور پولیس کے درمیان ہفتے کی شب شروع ہونے والی جھڑپیں اتوار کو بھی دن بھر جاری رہیں۔ متعدد مظاہرین جو گزشتہ رات حفاظتی جنگلہ توڑ کر پارلیمنٹ ہاؤس کے احاطے میں داخل ہو گئے تھے، ابھی تک وہیں خیمہ زن ہیں۔ شاہراہ دستور پر واقع سپریم کورٹ، پارلیمنٹ ہاؤس، ایوان صدر، وزیر اعظم ہاؤس اور کیبنٹ ڈویژن کی حفاظت فوج کے پاس ہے۔

پولیس اور مظاہرین کے درمیان جھڑپوں کے دوران میڈیا کے نمائندوں کو پولیس اور مظاہرین کی جانب سے تشدد کا سامنا کرنا پڑا۔ پولیس اہلکاروں نے مظاہرین پر تشدد کی کوریج کرنے والے رپورٹرز اور کیمرہ مینوں کو نہ صرف تشدد کا نشانہ بنایا بلکہ ان کے کیمرے اور کوریج کرنے والی سیٹلائٹ گاڑیاں بھی توڑ دیں۔

میڈیا کے نمائندوں پر تشدد رکوانے کے لیے جب وزیر ریلوے خواجہ سعد رفیق شاہراہ دستور پر پہنچے تو چند پولیس اہلکاروں نے ان کے ساتھ بھی بد تمیزی کی کو شش کی۔ خواجہ سعد رفیق نے میڈیا پر حملے کی شدید مذمت کرتے ہوئے کہا کہ ذمہ دار افراد سزا سے نہیں بچ سکتے۔ انہوں نے کہا، ’’جب ایک منظم فورس کا ڈسپلن قائم رکھنے والے، کوئی موجود نہ ہو تو، یہ قابو میں نہیں رہتے۔ ان کے ذمہ دار افسران کو سزا ملے گی اور میں گواہی دوں گا۔‘‘

دوسری جانب تحریک انصاف کے سربراہ عمران خان اور عوامی تحریک کے سربراہ طاہر القادری شاہراہ دستور پر ابھی تک اپنے کنٹینروں میں موجود ہیں۔ مظاہرین سے اپنے الگ الگ خطابات میں ان کا کہنا تھا کہ وہ کسی بھی صورت خالی ہاتھ واپس نہیں جائیں گے۔ انہوں نے مظاہرین پر پولیس تشدد کی سخت مذمت کی اور وزیر اعظم اور وزیر داخلہ کے خلاف مقدمہ درج کرانے کا اعلان کیا۔

تحریک انصاف کے ناراض رہنما مخدوم جاوید ہاشمی نے اتوار کو اسلام آباد میں پریس کانفرنس سے خطاب کرتے ہوئے کہا کہ عمران خان نے پارٹی کی سینئر قیادت کے مشورے پر پریڈ ایونیو سے آگے نہ جانے کی یقین دہانی کرائی تھی لیکن پھر شیخ رشید کے ایک پیغام پہنچانے پر وہ پی ایم ہاؤس روانہ ہوگئے۔ انہوں نے کہا، ’’مارشل لاء کے اور ہمارے درمیان کوئی فاصلہ نہیں۔ اب ہم پندرہ بیس سال تک مارشل لاء سے متعلق صفائیاں دیتے مر جائیں گے۔ میں نے خان صاحب سے کہا کہ اس سے بچ جائیں۔‘‘

انہوں نے کہا کہ ریڈ زون میں دودھ کے لیے بلکتے بچوں کے ہم سب سیاستدان قصور وار ہیں۔ انہوں نے حکومت سے مظاہرین کے خلاف تشدد فوری طور پر بند کرنے کا مطالبہ کیا۔ جاوید ہاشمی نے عمران خان سے بھی اپیل کی کہ وہ تشدد کی قوتوں کے راستے پر نہ چلیں۔