امریکی انتخابی مہم: بیانات میں گرما گرمی

صدر کے عہدے کے لیے ری پبلکن پارٹی کے امیدوار مِٹ رومنی نے گزشتہ ہفتے کے روز اپنے نائب صدر کے لیے پال رائن کے نام کا اعلان کیا تھا۔ اس اعلان سے ری پبلکن پارٹی کی انتخابی مہم میں گرم جوشی کی لہر تو دیکھی گئی ہے تاہم اس جماعت کے وہ منصوبے ذرا پس منظر میں چلے گئے ہیں، جن کا مقصد انتخابی مہم کو پوری طرح سے ملازمتوں کے مواقع پر مرکوز رکھنا تھا۔ اب پال رائن کے متنازعہ بجٹ پلان اور میڈی کیئر سسٹم میں اصلاحات کی تجویز کے باعث انتخابی مہم ہیلتھ انشورنس کے پروگرام کے گرد گھومنے لگی ہے۔

رائن کی ایک تجویز مثلاً یہ ہے کہ پنشن یافتہ افراد کو الاؤنس دیا جائے تاکہ وہ اپنی ہیلتھ انشورنس کے پیسے خود ادا کر سکیں۔ ڈیموکریٹس کا کہنا یہ ہے کہ اس طرح سے بزرگ شہریوں کے اخراجات بڑھ جائیں گے اور اُن کی طبی دیکھ بھال کے معیار میں کمی آئے گی۔

ریاست آئیووا کے شہر Dubuque میں ایک اجتماع سے خطاب کرتے ہوئے اوباما نے رائن کی تجاویز کو تنقید کا نشانہ بناتے ہوئے کہا:’’وہ میڈیکل کیئر کے پروگرام کو ایک واؤچر پروگرام میں تبدیل کر دینا چاہتے ہیں۔ ان واؤچرز کی مدد سے تمام اخراجات پورے کرنا ممکن نہیں ہو گا اور یوں بزرگ شہری سالانہ 6400 ڈالر کی اضافی رقم دینے پر مجبور ہو جائیں گے اور میرے خیال میں اُن کے پاس یہ رقم ہو گی نہیں۔‘‘

ریاست ہائے متحدہ امریکا میں نومبر میں انتخابات کے دن عام طور پر لوگ کم تعداد میں ووٹ ڈالنے جاتے ہیں لیکن بزرگ شہری ہجوم در ہجوم پولنگ اسٹیشنوں کا رُخ کرتے ہیں اور یہی وجہ ہے کہ ہر سیاسی جماعت اُنہیں خوش رکھنے کی کوشش کرتی ہے۔

رومنی نے اوباما کو تنقید کا نشانہ بنایا اور کہا کہ اوباما نے میڈی کیئر کے پروگرام میں 716 ارب کی کٹوتی کرتے ہوئے یہ رقم اپنی 2010ء کی اُس ہیلتھ کیئر قانون سازی پر خرچ کر دی، جو اوباما کیئر کے نام سے جانی جاتی ہے۔ رومنی نے کہا:’’اگر میں صدر بن گیا تو میں 716 ارب ڈالر کی یہ رقم واپس میڈی کیئر ٹرسٹ فنڈ کے لیے جاری کر دوں گا۔‘‘

گیلپ کے ایک تازہ سروے کے مطابق رائن کو نائب صدارت کے لیے اپنا امیدوار بنانے سے رومنی کی عوامی حمایت میں کوئی بڑا اضافہ دیکھنے میں نہیں آیا تاہم رجسٹرڈ ووٹروں میں کیے جانے والے ایک نمائندہ سروے میں رومنی کو اوباما کے مقابلے پر دو پوائنس کی سبقت (47-45) حاصل ہے۔ امریکا میں اس سال صدارتی انتخابات چھ نومبر کو منعقد ہوں گے۔

(aa/km(reuters