پاک بھارت ایٹمی جنگ کے اثرات عالمگیر ہو سکتے ہیں

منگل کو سامنے آنے والی یہ رپورٹ ’انٹرنیشنل فیزیشنز فار دا پریوینشن آف نیوکلیئر وار‘ نامی ادارے نے شائع کی ہے۔ اس رپورٹ میں کہا گیا ہے کہ اگر یہ جنگ علاقے تک بھی محدود رہی تب بھی اس کے عالمگیر اثرات مرتب ہو سکتے ہیں۔

اس کی وجہ رپورٹ میں یہ بتائی گئی ہے کہ اس طرح کی جنگ دنیا کے ماحول پر بہت بری طرح اثر انداز ہو گی اور چین، امریکا اور دیگر ملکوں میں خوراک کی پیداوار بھی بہت کم ہو جائے گی۔

رپورٹ کے مصنف ڈاکٹر ایرا ہیلفینڈ کا اس بابت کہنا ہے، ’’جوہری قحط سالی کے بارے میں خدشات ہمیں مجبور کرتے ہیں کہ ہم جوہری ہتھیاروں کے بارے میں اپنی سوچ تبدیل کریں۔ نئے شواہد بتاتے ہیں کہ نسبتاً چھوٹے پیمانے پر جوہری ہتھیار رکھنے والے ممالک کے درمیان جوہری تنازعہ بھی دنیا کے ماحول اور ایکو سسٹم کو بری طرح نقصان پہنچا سکتا ہے۔‘‘

ڈاکٹر ایرا ہیلفینڈ کا کہنا ہے کہ جوہری جنگ سے نہ صرف یہ کہ کروڑوں کی تعداد میں غیر ضروری ہلاکتیں ہوں گی بلکہ یہ انسانی نسل کے خاتمے اور جدید تہذیب کے مٹ جانے کا بھی سبب بن سکتی ہے۔

یہ رپورٹ ’کلائمیٹ چینج‘ یا ماحولیاتی تبدیلی نامی جریدے میں بھی شائع ہوگی جس کو شکاگو میں ہونے والی ’ورلڈ سمٹ آف نوبل لاریئٹس‘ میں پیش کیا جائے گا۔

واضح رہے کہ پاکستان اور بھارت دونوں ہی ایٹمی ہتھیار رکھتے ہیں۔ دونوں ممالک کے درمیان متعدد تنازعات بھی موجود ہیں اور یہ ممالک آپس میں کئی جنگیں بھی لڑ چکے ہیں۔

رپورٹ میں خوراک کی پیداوار کا خاص طور پر ذکر کیا گیا ہے۔ کہا گیا ہے کہ جوہری جنگ کی صورت میں امریکا تک میں مکئی کی پیداوار ایک دہائی تک دس فیصد کی اوسط سے گرتی رہے گی، جس میں سب سے زیادہ اضافہ جوہری جنگ کے پانچ سال پورے ہونے کے بعد آ سکتا ہے۔

رپورٹ میں کہا گیا ہے کہ چین میں چاول کی پیداوار جنگ کے چار سال تک اکیس فیصد جب کہ اس کے بعد کے چھ برسوں میں دس فید اوسط سے گرتی جائے گی۔ اس کا نتیجہ اشیائے خورد و نوش کی قیمتوں میں اضافے اور بین الاقوامی سطح پر خوراک کے حوالے سے ایک افراتفری کی صورت میں نکل سکتا ہے۔

(ss/at (AFP