یوکرائنی بحران کا حل، امن بات چیت کا نیا دور

امن بات چیت کا اعلان یوکرائنی صدر پیٹرو پوروشینکو کے اُس اعلان کے کچھ ہی دیر بعد سامنے آیا ہے، جس میں پوروشینکو نے روس نواز باغیوں کے ساتھ امن بات چیت کے ذریعے معاہدے تک جلد از جلد پہنچ کر خونی جنگ کے خاتمہ کا کہا تھا۔ پوروشینکو نے مِنسک بات چیت کے ذریعے فوری جنگ بندی کو بھی اہم قرار دیا۔

منسک مذاکرات کے سابقہ دو ادوار میں ایک بفر زون کو اہم خیال کیا گیا۔ بفر زون کے لیے تیس کلومیٹر کا علاقہ مختص کرنے کا کہا گیا تھا لیکن اِس پر عمل ممکن نہیں ہو سکا۔ منسک مذاکرات کی نگرانی یورپی سکیورٹی و تعاون کی تنظیم (OSCE) کر رہی ہے۔ اِس مذاکراتی عمل میں کییف حکومت کے وفد کے ساتھ ساتھ مشرقی یوکرائن کے روس نواز باغیوں کے نمائندے بھی شریک ہیں۔ اِس مذاکراتی عمل میں کییف میں روسی سفیر اپنے ملک کی نمائندگی کرتے ہیں۔ یہی گروپ جمعے سے شروع ہونے والی مذاکراتی راؤنڈ میں شریک ہو گا۔

اِدھر آج مشرقی یوکرائن میں متحارب گروپوں کے درمیان جاری مسلح جھڑپوں میں مزید پانچ فوجیوں اور تین سویلین کی ہلاکت کی تصدیق کر دی گئی ہے۔ کییف حکومت کے مطابق مسلح جھڑپوں میں کمی سامنے نہیں آئی ہے۔ کییف حکومت کا یہ بھی کہنا ہے کہ گزشتہ دنوں میں باغیوں نے فوج پر ایک سو سے زائد حملے کیے ہیں۔ سب سے سنگین جھڑپیں ڈیبالٹسیوے کے قصبے کے ارد گرد جاری ہیں۔ حکومتی فوج اپنی پوزیشنوں کو مسلسل مضبوط بنانے کی کوشش میں ہے۔ گزشتہ اپریل سے مشرقی یوکرائنی بحران کے تنازعے میں پانچ ہزار سے زائد لوگ ہلاک ہو چکے ہیں۔

روس کے یورپی سکیورٹی ایجنسی OSCE میں سفیر نے امریکا اور یورپی اقوام کو خبردار کیا ہے کہ وہ یوکرائنی حکومت کی غیر ضروری حمایت کا سلسلہ ترک کر دیں کیونکہ اِس سے ایک بڑی تباہی ممکن ہے۔ کیلن نے اپنے بیان میں کہا کہ وہ اُن تمام ریاستوں سے اپیل کرتے ہیں جو کییف کی لیڈرشِپ پر اثرورسوخ رکھتی ہیں اور اِن کا جھکاؤ امریکا کی جانب ہے کہ وہ اِس جنگ میں مزید ملوث ہونے کے سلسلے کو ترک کردیں کیونکہ اِس کا ایک ہی نتیجہ برآمد ہو گا اور وہ ایک بڑی تباہی ہے۔ کیلِن کا مزید کہنا تھا کہ وقت آ گیا ہے کہ کییف حکومت کے غیر انسانی اقدامات پر پردہ ڈالنے کا سلسلہ بند کر دیا جائے کیونکہ اِنہی ناقابلِ قبول اقدامات کی وجہ سے مشرقی یوکرائن میں جنگ کا تسلسل موجود ہے۔