یوکرائن کی حکومت مستعفی

یوکرائن کے وزیر اعظم آرنيسی یاتسینیُک اور ان کی کابینہ نے جمعرات کی شب مستعفی ہونے کا اعلان کر دیا ہے۔ یاتسینیُک نے اس موقع پر کہا کہ ملک کو شدید بحران کا سامنا ہے اور اس دوران حکومتی ذمہ داریاں کئی مہینوں تک کے لیے معطّل ہو گئی ہیں۔ ماہرین کا کہنا ہے کہ اس صورتحال میں یوکرائن کو ڈرامائی نتائج کا سامنا کرنا پڑ سکتا ہے۔ یاتسینیُک کے بقول پارلیمان نے نہ تو سرگرم انداز میں کام کیا اور اس دوران نہ ہی کوئی اہم بل یا قانون منظور کیا جا سکا۔

یاتسینیک نے اپنے بیان میں کہا کہ پارلیمنٹ ملک کو درپیش توانائی کے بحران پر قابو پانے کے لیے قانون سازی کرنے اور فوج کی مالی امداد بڑھانے جیسے اہم معاملات کے حوالے سے فیصلہ سازی میں ناکام رہی ہے۔ ’’میں حکومتی اتحاد میں پڑنے والی دڑاڑوں کے تناظر میں مستعفی ہونے کا اعلان کرتا ہوں‘‘۔

يوکرائن ميں جمعرات کے روز دو مغرب نواز جماعتوں کی جانب سے مخلوط حکومت سے الگ ہونے کے ساتھ ہی حکومتی اتحاد بھی ٹوٹ گیا۔ معروف عالمی باکسر وطالی کلچکو کی جماعت ’اودار‘ ( Udar ) یعنی پنچ اور کٹر قوم پرست جماعت سوووبوڈا ( Svoboda ) نے نئے انتخابات کا مطالبہ کرتے ہوئے حکومت سے علیحدہ ہونے کا اعلان کیا تھا۔ اس کے بعد یاتسینیُک کی فادر لینڈ پارٹی نے پارلیمان میں اپنی اکثریت کھو دی تھی۔

یوکرائن کے صدر پیٹرو پوروشینکو نے اس اقدام کو سراہتے ہوئے کہا ہے کہ ’معاشرہ چاہتا ہے کہ حکومتی مشینری کو دوبارہ سے ری سیٹ کیا جائے‘‘۔ ان حالات میں صدر پوروشینکو کو اگلے تیس دنوں کے دوران نئے انتخابات کا اعلان بھی کرنا ہو گا۔

ماہرین نے اس خدشے کا اظہار کیا ہے کہ اگلے انتخابات میں روس نواز سیاسی جماعتیں اکثریت حاصل کر سکتی ہیں۔ اس دوران کییف کی ایک عدالت وزرات انصاف کی جانب سے پیش کی جانے والی اس درخواست پر غور کر رہی ہے، جس میں کمیونسٹ پارٹی پر پابندی لگانے کی بات کی گئی ہے۔ کییف انتظامیہ کا موقف ہے کہ کمیونسٹ پارٹی مشرقی یوکرائن میں لڑنے والے باغیوں کو تعاون فراہم کر رہی ہے۔ اس کے بعد قوی امکان ہے کہ یوکرائن کی منتخب ہونے والی اگلی پارلیمان میں کمیونسٹ پارٹی موجود نہ ہو۔

یوکرائن کی صورتحال کا تجزیہ کرتے ہوئے جرمن تبصرہ نگار اُلرش کرؤکیل نے کہا کہ یاتسینیُک کی حکومت ملک کو درپیش مسائل کو حل کرنے میں مکمل طور پر ناکام رہی ہے۔ انہوں نے مزید کہا گزشتہ مہینوں کے دوران بحران کے خاتمے کے لیے کییف حکومت کی جانب سے تیار کی جانے والی تقریباً تمام پالیسیاں بے نتیجہ ہی رہیں اور اسی وجہ سے یاتسینیُک حکومت کے خاتمے کے اندازے لگا لیے گئے تھے۔

اس اچانک اعلان کے ساتھ ہی مشرقی یوکرائن میں جاری بحران مزید شدید ہو سکتا ہے اور ملائيشین ایئر لائنز کے طیارے کی تباہی کے واقعے کی تحقیقات کرنے والے بین الاقوامی ماہرین کے کام میں رکاوٹ بھی آ سکتی ہے۔ حکومت ختم ہونے کے باوجود بھی باغیوں کے زیر قبضہ علاقوں میں شدید لڑائی جاری ہے اور کییف حکام کے مطابق گزشتہ 24 گھنٹوں میں ڈونیٹسک اور اس کے اطراف میں چار فوجی ہلاک ہو گئے ہیں۔