یوکرائن اور یورپی یونین کے درمیان اہم معاہدے کی توثیق

یورپی یونین اور یوکرائن کے درمیان تجارتی اور سیاسی تعاون کے اس سمجھوتے کی توثیق کییف میں یوکرائنی پارلیمان اور اسٹراس بُرگ میں یورپی پارلیمان کی جانب سے ایک ہی وقت میں کی گئی ہے۔ یوکرائنی صدر پیٹرو پورو شینکو نے اس معاہدے کی توثیق کو اپنے ملک کے لیے انتہائی اہم قرار دیا ہے۔

کییف میں ارکان پارلیمان سے خطاب کرتے ہوئے پوروشینکو کا یوکرائن میں احتجاجی مظاہروں اور ملک کے مشرقی حصے میں جاری خانہ جنگی کی طرف اشارہ کرتے ہوئے کہنا تھا، ’’دوسری عالمی جنگ کے بعد سے کسی اور قوم نے یورپی یونین کے ساتھ شامل ہونے کے لیے اتنی زیادہ قیمت ادا نہیں کی جتنی یوکرائنی عوام نے کی ہے۔‘‘ یہ خطاب اسٹراس برگ میں یورپی پارلیمان کے جاری خطاب میں بذریعہ ویڈیو کانفرنس براہ راست سنوایا گیا۔ دونوں پارلیمانوں کی کارروائی ویڈیو لنک کے ذریعے دونوں ایوانوں میں دکھائی جا رہی تھی۔

یورپی پارلیمان کے صدر مارٹن شُلز نے اس پیشرفت کو تاریخی اور جمہوریت کے لیے ’’شاندار لمحہ‘‘ قرار دیا۔ یورپی پارلیمان میں اس معاہدے کی بڑی اکثریت کے ساتھ توثیق کی گئی۔ 535 ارکان نے اس کے حق میں جبکہ 127 نے اس کے خلاف ووٹ دیا۔ ووٹنگ کے وقت 35 ارکان غیر حاضر تھے۔

مارٹن شُلز کا اس موقع پر مزید کہنا تھا کہ اس معاہدے کی توثیق ان افراد کے خوابوں کی تکمیل کے لیے ہے جنہوں نے یوکرائن میں جمہوریت کے لیے جدو جہد کی۔

یورپی یونین اور یوکرائن کے درمیان اس تجارتی اور سیاسی معاہدے کو اس وقت کے روس نواز صدر وکٹر یانوکووچ کی طرف سے رد کرنے کے بعد یوکرائن میں احتجاجی مظاہروں کا سلسلہ شروع ہوا تھا۔ جس کا نتیجہ رواں برس فروری میں یانوکووچ کی حکومت کے خاتمے کی صورت میں نکلا۔ بعد میں پیدا ہونے والی صورتحال کے بعد روس نے یوکرائن کے مشرقی حصے میں جزیرہ نما کریمیا کو اپنے ساتھ شامل کر لیا تھا۔

یوکرائن اور یورپی یونین کے درمیان طے پانے والے اس معاہدے کی مخالفت کرنے والوں میں برطانوی سیاست دان نیگل فاراگے بھی شامل تھے۔ یورپی اتحاد کے مخالف فاراگے کا پارلیمان سے خطاب میں کہنا تھا، ’’اگر آپ روسی ریچھ کو چھڑی سے چھیڑیں گے تو پھر اس کے ردعمل پر حیران مت ہوں۔‘‘

یوکرائنی پارلیمان نے اپنے آج کے اجلاس میں باغیوں کے لیے عام معافی کے قانون کی منظوری بھی دی ہے۔ مخصوص سنگین جرائم کے علاوہ اس قانون کے تحت کییف حکومت کے خلاف مسلح بغاوت کرنے والوں کو بھی معاف کر دیا جائے گا۔ اس کے علاوہ بغاوت کے شکار علاقوں ڈونیٹسک اور لوہانسک کے عوام کو مزید انتظامی اختیارات دے دیے گئے ہیں۔ مزید یہ کہ روسی زبان بولنے والے علاقوں کو روسی سرحدی علاقوں کے ساتھ قریبی تعاون کی اجازت ہو گی۔

روس نواز علیحدگی پسندوں نے ابتدائی طور پر ان نئی حکومتی تجاویز پر شک و شبے کا اظہار کیا ہے۔ انہوں نے ان نئے قوانین کا تفصیلی جائزہ لینے کا بھی اعلان کیا ہے۔