یورو وژن 2015ء ، جذباتی لمحات اور شاندار گیت
تیئس مئی کی شب گیتوں کا یورپی مقابلہ یورو وژن آسٹریا میں منقعد ہوا۔ اپنی نوعیت کا یہ ساٹھواں مقابلہ دلچسپ تھا اور فنکاروں نے زبردست اسٹیج پرفارمنس بھی پیش کی۔ سویڈن کے گلوکار نے جیت کر اسے ایک شاندار پارٹی میں بدل دیا۔
فیورٹ ہی کامیاب رہا
آسٹریا کے دارالحکومت ویانا میں ہونے والے یورو وژن کا فائنل سویڈش نوجوان مانز سیمرلُو نے جیتا۔ ان کے گیت ’ہیروز‘ نے بقیہ چھبیس گیتوں کو بہت پیچھے چھوڑ دیا۔ اسے سویڈن میں پاپ میوزک کی صنعت کے لیے بہت بڑی کامیابی قرار دیا جا رہا ہے۔ اسی وجہ سے اگلا یورو وژن سونگ کانٹَیسٹ سویڈن میں منعقد ہو گا۔
صرف گلوکاری ہی کمال کی نہیں تھی
مانز سیمرلُو گزشتہ دس برسوں سے اپنے ملک کے ایک معروف گلوکار ہیں۔ ان کے پاپ گیت ’ہیروز‘ کو کل 365 پوائنٹس ملے۔ یہ گیت صرف فنکارانہ حوالے سے ہی شاندار نہیں تھا بلکہ اس دوران کمپیوٹر اینیمیشن کے ذریعے اسٹیج پر مختلف خدوخال بھی پیش کیے گئے، جنہیں بہت سراہا گیا۔
روس دوسرے نمبر
ووٹنگ کے دوران کافی دیر تک روس کی پولینا گاگارینا کا گیت One Million Voices پہلے نمبر پر تھا اور امید کی جا رہی تھی کہ وہ جیت جائیں گی۔ لیکن اختتام سے کچھ دیر پہلے تک پوائنٹس ٹیبل کا نقشہ بدل چکا تھا۔ پولینا گاگارینا کو جرمنی کی جانب سے بارہ پوائنٹس دیے گئے تھے۔ گاگارینا کے مجموعی پوائنٹس کی تعداد 303 تھی۔
اٹلی کا محبت بھرا پیغام
تین گلوکاروں پر مشتمل اطالوی گروپ اِل وُولو کو 292 پوائنٹس ملے اور اس طرح ان کا نمبر تیسرا رہا۔ ان کا گیتGrande Amore یعنی عظیم محبت اوپرا اور پاپ موسیقی کا خوبصورت امتزاج تھا۔
مست گیت
بیلجیم کے انیس سالہ گلوکار لوئک نوٹیٹ کے گیت Rhythm Inside کو گزشتہ شام کا سب سے کُول یا مست گیت قرار دیا گیا۔ مداحوں کی جانب سے ان کی آواز کی بے حد تعریف کی گئی جبکہ گانے کے دوران اسٹیج پرفارمنس بھی دیکھنے سے تعلق رکھتی تھی۔
اعزازی مہمان
اس مرتبہ یورو وژن مقابلے میں آسٹریلیا کو پہلی مرتبہ اعزازی مہمان کے طور پر دعوت دی گئی تھی۔گائے سیباستیان کا Tonight Again گو کہ ایک پرکشش گیت تھا لیکن اس کے باوجود وہ پانچویں نمبر سے آگے نہ بڑھ پایا۔
عشق کی طرح سرخ
سرخ لباس میں ملبوس لیٹویا کی امیناتا سواڈوگا کی اسٹیج پرفارمنس کو انتہائی جرات مندانہ قرار دیا گیا۔ انہوں نے اپنے گیت Love Injected کے دوران خاص انداز میں تھرک کر خاصی داد وصول کی۔ وہ چھٹے نمبر پر رہیں۔
مایوس کن کارکردگی
جرمن گلوکارہ اَین سوفی اپنے گیت Black Smoke کے ساتھ اس سالانہ یورپی مقابلے کے فائنل میں ایک پوائنٹ بھی حاصل نہ کر سکیں اور یوں جرمنی فائنل میں شریک 27 ملکوں میں سے 26 ویں نمبر پر رہا۔ اس کے باوجود 24 سالہ سوفی کا کہنا تھا، ’’مجھے بہت مزہ آیا۔‘‘ گزشتہ پچاس برسوں میں یہ پہلی مرتبہ ہے کہ جرمنی یورو وژن مقابلے میں اس نمبر پر آیا ہے۔
پچھلی بار ٹاپ اس بار فلاپ
گزشتہ برس گیتوں کا یہ مقابلہ آسٹریا نے جیتا تھا ۔ میک میکس Makemakes کا گیت I am yours آسٹریا کے ہمسایہ ملک جرمنی کے گیت کی طرح ایک بھی پوائنٹ حاصل نہ کر پایا۔ ماہرین نے اسے آسٹریا کی انتہائی مایوس کن کارکردگی قرار دیا ہے۔
شاندار میزبانی
یورو وژن مقابلے کے انتظامات کے حوالے سے آسٹریا کی بہت تعریف کی جا رہی ہے۔ صرف وہاں پر موجود افراد نے ہی نہیں بلکہ ٹیلی وژن پر اس شو کو لائیو دیکھنے والے دو سو ملین افراد نے بھی انتظامات، جگمگاتی روشنیوں اور اسٹیج پر موجود قمقموں کو قابل دید قرار دیا۔