یمن کے سرکاری ٹیلی وژن مرکز پر حملہ

خبر رساں ادارے روئٹرز کے مطابق شیعہ باغیوں کی جانب سے ٹیلی وژن کی عمارت پر حملے کے بعد علاقے کے لوگوں نے نقل مکانی کرنا شروع کر دی ہے۔ انہیں پرتشدد کارروائیوں میں اضافے کا خطرہ ہے۔ مقامی حکام کے مطابق شیعہ باغیوں اور ملکی دستوں کے مابین جمعرات کو شمال مغربی علاقے میں جھڑپیں ہوئی تھیں اور اس کے بعد ہی انہوں نے دارالحکومت صنعاء کا رخ کیا۔ اس سلسلے میں ضلع الشملان کے رہائشیوں نے بتایا کہ باغی مسلسل پیش رفت کر رہے ہیں اور وہ صنعاء کے مغربی کنارے تک پہنچ چکے ہیں۔ بتایا گیا ہے کہ باغیوں نے جمعرات کی شب وہیں سے ٹیلی وژن سینٹر پر میزائل داغے ہیں۔ سرکاری ٹیلی وژن کے ذرائع نے بتایا کہ شیلنگ جمعرات کی شب سے جمعے کی صبح تک جاری رہی۔’’ باغی ہر ممکنہ اسلحے سے وقفے وقفے سے حملے کر رہے تھے۔‘‘

اس واقعے کے بعد ہزاروں افراد نے دارالحکومت اور ان مقامات سے جہاں یہ لڑائی جاری ہے، محفوظ مقامات پر منتقل ہونا شروع کر دیا ہے۔ ایک شہری نے خبر رساں ادارے روئٹروز کو بتایا کہ ایک شیل اس کے پڑوس میں آکر گرا، جس کے بعد وہ اپنی اہلیہ اور بچوں کو لے کسی محفوظ مقام کی جانب نکل پڑا۔

دوسری جانب گزشتہ ہفتے شیعہ برادری کے ایک قبیلے سے تعلق رکھنے والے افراد نے ایک مظاہرے کے دوران صنعاء کے ہوائی اڈے کی جانب جانے والی سڑک کو بلاک کر دیا تھا اور سا تھ ہی مختلف سرکاری دفاتر اور وزارتوں میں دھرنے بھی دیے تھے۔ ان کا مطالبہ تھا کہ حکومت اُن مراعات کی واپسی کو ممکن بنائے، جنہیں گزشتہ حکومت نے معاشی اصلاحات کے نام پر ختم کیا تھا۔ منگل کے روز سے باغیوں اور حکومتی دستوں کے مابین جاری ان جھڑپوں میں اب تک 42 افراد ہلاک ہو چکے ہیں۔