ہیکنگ کے الزام پر شمالی کوریا کی طرف سے امریکا پر حملوں کی دھمکی

امریکی صدر باراک اوباما کی طرف دیے گئے اس بیان پر کمیونسٹ ریاست شمالی کوریا نے انتہائی برہمی کا اظہار کرتے ہوئے وائٹ ہاؤس، پینٹا گون اور امریکا کے دیگر شہروں میں حملوں سے خبردار کیا ہے۔ پیونگ یانگ نے سونی پکچرز پر ہیکنگ کے لیے امریکا کو ہی ذمہ دار قرار دیتے ہوئے اسے ’دہشت گردی کا گٹر‘ قرار دیا ہے۔ شمالی کوریا نے خبردار کیا ہے کہ اس کی 1.2 ملین فوجیوں پر مبنی آرمی امریکا کے خلاف تمام تر جنگی حربے استعمال کرنے کے لیے تیار ہے۔

اگرچہ شمالی کوریا کی طرف سے اس طرح کے بیانات سامنے آنا کوئی نئی بات نہیں ہے لیکن اتوار کی شام اس ملک کے طاقتور ترین نینشل ڈیفنس کمیشن کی طرف سے دیے گئے اس تازہ بیان سے اندازہ ہوتا ہے کہ وہ فلم ’دی انٹرویو‘ کے بارے میں کتنا حساس ہے۔ اس فلم کا مرکزی خیال شمالی کوریا کے رہنما کم جونگ اُن کو ہلاک کرنے کا ایک خیالی منصوبہ ہے۔ اس تمام معاملے کے بعد سونی پکچرز نے کہا ہے کہ ڈسٹری بیوٹرز نے اس فلم کی نمائش سے انکار کر دیا ہے لیکن وہ اس کی ریلز کی کوششوں میں ہے۔

امریکا نے شمالی کوریا پر الزام عائد کیا ہے کہ اس نے سونی پکچرز انٹرٹینمنٹ پر ہیکنگ کے ایک حملے میں کمپنی کے دستاویزات کے علاوہ ملازمین کے نجی کوائف کو بھی چرائے ہیں۔ واشنگٹن حکومت نے ایسے کیسی سائبر حملے کے لیے پہلی مرتبہ کسی ملک کو براہ راست ذمہ دار قرار دیا ہے لیکن پیونگ یانگ حکومت ایسے الزامات مسترد کر رہی ہے۔

امریکا میں ری پبلکن پارٹی کی طرف سے صدر اوباما پر زور دیا جا رہا ہے کہ وہ ہیکنگ کے اس واقعے کے بعد شمالی کوریا کے خلاف سخت اقدامات اٹھائیں۔ اس حوالے سے امریکی صدر اوباما نے اتوار کے دن نشریاتی ادارے سی این این کے ایک پروگرام میں کہا کہ ان کی حکومت اس تمام معاملے پر باریک بینی کے ساتھ غور کرتے ہوئے فیصلہ کرے گی کہ آیا شمالی کوریا کو دہشت گرد ممالک کی فہرست میں دوبارہ سے شامل کیا جائے یا نہیں۔

صدر اوباما نے ایسے تاثر کو غلط قرار دیا ہے کہ یہ سائبر کرائم جنگ کا ایک حربہ ہے، ’’میرے خیال نہیں کہ یہ جنگ کا کوئی ایکشن ہے۔ میرے خیال میں یہ سائبر لوٹ مار کا ایک واقعہ ہے۔‘‘ تاہم انہوں نے واضح کیا کہ ان کی حکومت اس واقعے کو انتہائی سنجیدگی سے لے رہی ہے۔

دوسری طرف ریپبلکن سینیٹر جان مککین نے کہا ہے کہ یہ ایک نئے طرز کی جنگ ہے اور امریکا کو اس سے بہتر طریقے سے نمٹنا ہو گا۔ سینیٹر لنڈسے گراہم کے بقول یہ ایک دہشت گردی کا واقعہ ہے ، اس لیے واشنگٹن حکومت کو چاہیے کہ وہ شمالی کوریا کو دہشت گردی کو اسپانسر کرنے والے ممالک کی فہرست میں شامل کر لے۔ انہوں نے مزید کہا کہ اس سائبر کرائم کے جواب میں امریکا کو ایک ایسا ایکشن لینا چاہیے، جس کے بعد شمالی کوریا دوبارہ ایسے کرنے کا سوچے بھی مت۔