ہینوور: سب سے بڑی عالمی صنعتی نمائش

ہینوور کی وسیع و عریض نمائش گاہ کے بڑے بڑے ہالز میں مشینوں کو قریب سے چھُو کر دیکھا اور محسوس کیا جا سکتا ہے۔ یہیں اس سوال کا جواب بھی تلاش کرنے کی کوشش کی جا سکتی ہے کہ مستقبل کے کارخانے کیسے ہوں گے۔ کیا اُن کارخانوں میں انسان کے لیے بھی کوئی جگہ ہو گی یا سارا کام مشینیں ہی سرانجام دیں گی؟

مشین کوئی بھی ہو، دیکھا یہ جاتا ہے کہ وہ اپنا کام جلد سے جلد انجام دے اور کم سے کم توانائی خرچ کرے۔ خاص طور پر آج کل کے مقابلہ بازی کے دور میں بڑی بڑی کمپنیاں بھی کم توانائی خرچ کرنے والی مشینوں میں زیادہ دلچسپی لے رہی ہیں۔ نمائش گاہ کے سربراہ یوخن کوئکلر کہتے ہیں کہ اس سال کی نمائش میں یہ نہیں دکھایا جا رہا کہ مشینوں کے معاملے میں کیا کچھ ممکن ہو سکتا ہے بلکہ باقاعدہ وہ مشینیں دکھائی جا رہی ہیں، جو عملی طور پر آج کل استعمال میں ہیں۔

ڈیجیٹل ٹیکنالوجی کی بدولت اب یہ ممکن ہو چکا ہے کہ ایک ہی مشین صرف کسی ایک ہی پراڈکٹ کو تیار کرنے کے لیے استعمال نہیں ہوتی بلکہ اُسے ہر بار کسی اور طریقے سے استعمال میں لایا جا سکتا ہے۔ مثلاً آج کل کی مشینیں ایک روز ایک پراڈکٹ کو کسی ایک رنگ میں تو دوسرے روز کسی اور رنگ میں تیار کرنے کی صلاحیت رکھتی ہیں۔ مختلف طرح کے یہی امکانات دیکھنے کے لیے کاروباری دنیا ہر سال ہینوور کے اس تجارتی میلے کا رخ کرتی ہے۔

مجموعی طور پر پینسٹھ ممالک سے آئی ہوئی کمپنیاں اس میلے میں شریک ہیں۔ خود جرمن صنعتی ادارے یہاں اپنی شرکت کو ہر بار گزشتہ سال کے مقابلے میں زیادہ متاثر کن بنانے کی کوشش کرتے ہیں۔ مثلاً امسالہ میلے میں بھی ممتاز جرمن صنعتی ادارے زیمینز نے بہت بڑے پیمانے پر اپنی مصنوعات متعارف کروانے کا اہتمام کر رکھا ہے۔ اِس بار زیمینز (Siemens) کے ہاں خود کار طریقے سے کاریں تیار ہوتی دیکھی جا سکتی ہیں۔

مشینوں کے زیادہ سے زیادہ آٹومیٹک یا خود کار ہونے سے کہیں ایسا تو نہیں ہو گا کہ کسی روز کارخانے انسانوں سے خالی ہو جائیں گے۔ جرمن چانسلر انگیلا میرکل، جنہوں نے اتوار کو اس تجارتی نمائش کا افتتاح کیا، کہتی ہیں کہ ’مشینوں کو انسان کی خدمت کرنی چاہیے نہ کہ انسانوں کو مشینوں کی‘۔

اپنے افتتاحی خطاب میں جرمن چانسلر انگیلا میرکل نے یورپی ممالک پر زور دیا کہ وہ انفارمیشن اور مواصلاتی ٹیکنالوجی کے شعبے میں اوّلین صف میں آنے کے لیے مشترکہ کوششوں کا آغاز کریں۔ انہوں نے کہا کہ یورپی یونین میں شامل ممالک متعدد شعبوں میں دنیا میں اپنے حریف ممالک سے پیچھے رہ گئے ہیں۔ جرمن چانسلر نے یورپی ملکوں کو انتباہ کرتے ہوئے کہا کہ وہ اگلے صنعتی انقلاب میں بھی سوتے نہ رہ جائیں۔

اس سال اس میلے کا پارٹنر ملک ہالینڈ ہے، جہاں سے 250 نمائش کنندگان اس بار کے میلے میں شریک ہیں۔ اس طرح ہالینڈ چین اور اٹلی کے بعد بیرونی دنیا سے ہینوور میلے میں شریک تیسرا بڑا ملک ہے۔ گزشتہ سال اس میلے میں روسی صدر ولادیمیر پوٹن شریک ہوئے تھے کیونکہ روس کو اس میلے کے ساتھی ملک کی حیثیت دی گئی تھی۔ جس طریقے سے روس نے یوکرائن کے علاقے کریمیا کو اپنے ساتھ ملایا ہے، اُس کے بعد ہر طرف روس کے خلاف زیادہ سے زیادہ سخت پابندیوں کی بات ہو رہی ہے۔ ایسے میں امسالہ میلے میں روس کے ساتھ کاروبار کرنے والی بہت سی کاروباری شخصیات اپنے کاروبار پر ان پابندیوں کے منفی اثرات کا سوچ کر متفکر نظر آ رہی ہیں۔