1. مواد پر جائیں
  2. مینیو پر جائیں
  3. ڈی ڈبلیو کی مزید سائٹس دیکھیں

گوگل کا اپنے موبائل نیٹ ورک کی تیاری کا منصوبہ

عاطف توقیر2 مارچ 2015

گوگل جلد ہی انٹرنیٹ سروسز اور موبائل فونز کے درمیان زیادہ مربوط تعلق استوار کرنے کے لیے اپنا موبائل نیٹ ورک صارفین کے لیے پیش کرنے والا ہے۔

https://p.dw.com/p/1Ek26
تصویر: Reuters/G. Nacarino

خبر رساں ادارے ایسوسی ایٹڈ پریس کے مطابق دنیا کا سب سے بڑا انٹرنیٹ سرچ انجن اور موبائل فونز کے لیے سافٹ ویئر تیار کرنے والا سب سے بڑا ادارہ گوگل اب جلد ہی اپنا موبائل نیٹ ورک متعارف کرا دے گا۔ اس طرح موبائل فون کے سافٹ ویئر اور انٹرنیٹ کے درمیان زیادہ ہم آہنگی پیدا ہو جائے گی۔

گوگل کے نائب صدر سُندر پچائی نے اس نئے نیٹ ورک کا نام ظاہر کیے بغیر کہا کہ اس سلسلے میں ایک نیٹ ورک آپریٹر کے ساتھ مل کر کام جاری ہے، تاکہ کوئی موبائل فون نیٹ ورک تیار کیا جا سکے۔

ان کا کہنا تھا، ’’آپ اگلے چند ماہ میں اس سلسلے میں ہمارا اعلان سننے والے ہیں۔‘‘

Googles Smartphone Nexus 6
گوگل اس سے قبل نیکس مصنوعات صارفین کے لیے پیش کر چکا ہےتصویر: picture alliance/AP Photo/Google

پچائی نے یہ بات ہسپانوی شہر بارسلونا میں جاری ورلڈ موبائل کانگریس وائرلیس شو کے دوران پیر کے روزکہی۔ ان کا کہنا تھا، ’’میرے خیال میں ہم اس وقت ایک ایسے مقام پر پہنچ چکے ہیں، جب یہ اہم ہو گا کہ ہم ہارڈ ویئر، سافٹ ویئر اور ان کے درمیان رابطے (کنیکٹیویٹی) کی بابت سوچیں۔‘‘

انہوں نے کہا کہ ان کا ادارہ اب انہیں خطوط پر کام کر رہا ہے۔ پچائی نے گوگل کی اس موبائل سروس کے منصوبے کو ایک ’پروجیکٹ‘ قرار دیتے ہوئے اصرار کیا کہ ان کا ادارہ روایتی ٹیلی فون ساز اداروں اور انٹرنیٹ سروسز کے لیے خطرہ نہیں بنے گا۔

انہوں نے گوگل کے نیکسَس اسمارٹ فونز کا حوالہ دیتے ہوئے کہا کہ گوگل کے اس فون نے دیگر اسمارٹ فونز تیار کرنے والے اداروں کے لیے خطرات پیدا نہیں کیے اور ایسا ہی موبائل نیٹ ورک سروس کی پیش کش سے بھی ہو گا۔

’’ہمارا کوئی ارادہ نہیں کہ ہم نیٹ ورک آپریٹر بن جائیں۔ بلکہ ہمارا ہدف یہ ہے کہ اس سلسلے میں متعدد چیزیں بنائی جائیں، جو رفتہ رفتہ ترقی پائیں۔ اس سلسلے میں بھی ہم انتہائی چھوٹے پیمانے سے کام شروع کریں گے، جیسا کہ نیکسَس مصنوعات کی صورت میں کیا گیا۔ تاکہ ہمارے دیگر پارٹنرز بھی جان پائیں کہ ہمارا خیال اچھا ہے۔‘‘

گوگل کا منصوبہ ہے کہ جب کوئی موبائل فون کسی وائرلیس لوکل ایریا نیٹ ورک (WLAN) کے ذریعے موبائل فون نیٹ ورک پر جائے، تو یہ تبدیلی اس طریقے سے آئے کہ صارف کو پتہ تک نہ چلے۔ پچائی نے بتایا کہ گوگل ’اپیل پے‘ کی طرز پر ’اینڈروئڈ پے‘ نظام پر کام کر رہا ہے، جس کے ذریعے موبائل فون پر ہی رقوم کی ادائیگی کی جا سکے گی۔