’کون محمد علی؟ کوئی باکسر مجھ سے بہتر نہیں‘، فلائیڈ مے وَیدر

دنیا بھر کے باکسنگ شائقین کی نظریں امریکی شہر لاس ویگاس پر ہیں، جہاں دو مئی کو فلائیڈ مے وَیدر کا مقابلہ فلپائن کے سپر سٹار باکسر مَینی پکیاؤ کے ساتھ ہونے والا ہے۔ اس مقابلے سے چند روز پہلے بدھ بائیس مئی کو ایک ٹیلی کانفرنس میں صحافیوں سے باتیں کرتے ہوئے مے وَیدر نے کہا کہ اُس کا ہر طرح کی خامیوں سے پاک کیریئر اور مقابلوں کا اب تک کا ریکارڈ اُس کے دعوے کو درست ثابت کرنے کے لیے کافی ہے۔

مے وَیدر نے کہا:’’مَیں یہ محسوس کرتا ہوں کہ اس کھیل میں مَیں نے اُتنا ہی کچھ حاصل کیا ہے، جتنا کہ ’علی‘ نے کیا تھا۔ کسی بھی شخص کے لیے میرے جیسا ہونا مشکل ہو گا، دیکھیے، مَیں اڑتیس سال کی عمر میں بھی کتنا تیز اور طاقتور ہوں۔ مَیں ’علی‘ کے احترام میں کمی نہیں کرنا چاہتا لیکن مجھے لگتا ہے کہ مَیں بہترین ہوں۔‘‘

مے وَیدر نے اس امر کی طرف بھی اشارہ کیا کہ محمد علی تو اور باکسرز کے ساتھ ساتھ 1978ء میں لیون سپنکس جیسے باکسر سے بھی ہار گیا تھا جبکہ اُس کا ریکارڈ پرفیکٹ ہے کہ سینتالیس مقابلوں میں حصہ لیا، تمام کے تمام جیتے، ایک بھی نہیں ہارا:’’سیدھی بات تو یہ ہے کہ محمد علی لیون سپنکس سے ہارے، کچھ دیگر باکسرز سے بھی شکست کھائی اور ا ُس کے باوجود اُسے ’دی گریٹیسٹ‘ کہا جاتا ہے۔‘‘

فلائیڈ مے وَیدر اور مَینی پکیاؤ دونوں ویلٹر ویٹ کے شعبے میں چپمپئن ہیں اور دو مئی کو اِن دونوں کے مقابلے سے منتظمین کو چار سو ملین ڈالر کی ریکارڈ آْدنی حاصل ہونے کی توقع ہے۔

مے وَیدر نے اپنے ’عظیم ترین‘ ہونے کے ساتھ ساتھ یہ بھی کہا کہ اور تو اور وہ پکیاؤ کے وطن فلپائن میں بھی بہت مقبول ہے اور باکسنگ کے فلپینی شائقین بھی مقابلے کے روز پکیاؤ کی بجائے اُس کی حوصلہ افزائی کر رہے ہوں گے۔ اس مقابلے کے لیے مے وَیدر کو ایک سو ملین ڈالر دیے جائیں گے۔

فلپائن میں پکیاؤ کو ایک ہیرو کی سی حیثیت حاصل ہے۔ باکسر کے طور پر بے پناہ کامیابی سے پہلے اُس نے سڑکوں پر کام کیا لیکن باکسنگ کے شعبے میں کامیابی نے اُس پر سیاست، موسیقی اور فلم کے بھی دروازے کھول دیے۔