کنزیومر الیکٹرونکس کی سب سے بڑی یورپی نمائش
2 ستمبر 2014دلچسپ بات یہ ہے کہ معروف امریکی کمپنی ایپل اس نمائش میں شریک نہیں ہو رہی تاہم اس کی طرف سے اس نمائش کے دنوں کے دوران ہی اپنا نیا آئی فون یعنی آئی فون سِکس متعارف کرائے جانے کی توقع ہے۔ الیکٹرانکس انڈسٹری پر نظر رکھنے والے ماہرین کے مطابق IFA کے دوران الیکٹرانکس کی دنیا کے بڑے نام اسمارٹ فونز سمیت اپنی جدید ترین مصنوعات متعارف کرائیں گے جس سے ایپل کے آئی فون کے حوالے سے عوامی دلچسپی متاثر ہو سکتی ہے۔
ایپل کمپنی اپنی نئی مصنوعات باقاعدہ طور پر متعارف کرائے جانے سے قبل ان کی تفصیلات کو خفیہ رکھنے کے حوالے سے شہرت رکھتی ہے۔ تاہم اس کمپنی کی طرف سے ای میل کے ذریعے اپنے نو ستمبر کو ہونے والے ایک ایونٹ کے لیے دعوت نامے جاری کیے گئے ہیں۔ تاہم اس بارے میں افواہیں پہلے سے ہی گردش کر رہی ہیں کہ ایپل اپنے اس ایونٹ کے دوران اپنا آئی فون سِکس متعارف کرائے گا جس کی اسکرین کا سائز پہلے کے مقابلے میں کہیں بڑا ہو گا۔
تاہم ایک مارکیٹ ریسرچ کمپنی IHS سے تعلق رکھنے والے اینالِسٹ ایان فوگ Ian Fogg کا کہنا ہے موبائل فون بنانے والی کمپنیاں رواں برس کی IFA برلن نمائش کے دوران گزشتہ برسوں کے مقابلے میں کہیں زیادہ بڑی تعداد میں اپنی مصنوعات عوام کے سامنے پیش کرنے والی ہیں۔ کیونکہ یہ کمپنیاں چاہتی ہیں کہ ایپل کی طرف دنیا بھر کی توجہ منقتل ہونے سے قبل ہی وہ اپنی اہم مصنوعات صارفین سے متعارف کرا دیں۔
بعض تجزیہ کاروں کا خیال ہے کہ ایپل کی طرف سے آئی فون سِکس کے علاوہ آئی واچ متعارف کرانے کی توقع بھی ہے۔ بازو پر باندھی جانے والی یہ ڈیوائس آئی فون اور آئی پیڈ کے ساتھ مل کر کام کرے گی۔
تاہم جنوبی کوریا سے تعلق رکھنے والی ایپل کی سب سے بڑی حریف کمپنی سام سنگ کی طرف سے بہت جلد ہی اپنے بڑے سائز کے اسمارٹ فون ’گلیکسی نوٹ فور‘ کو متعارف کرائے جانے کی توقع ہے تاکہ یہ کمپنی اسمارٹ فونز کے حوالے سے اپنی نمبر ایک پوزیشن کو برقرار رکھ سکے۔
جاپانی کمپنی سونی بھی IFA برلن کے دوران اپنا نیا اسمارٹ فون ایکسپیریا زیڈ تھری Xperia Z3 جبکہ موٹرولا کی طرف سے بھی نیا ماڈل پیش کیا جائے گا۔ ایپل کی طرف سے آئی واچ متعارف کرائے جانے کی افواہوں کے بعد سام سنگ اور ایل جی گزشتہ ہفتے ہی اپنی اپنی بازو پر باندھی جانے والی ڈیوائسز کا اعلان کر چکے ہیں۔
کنزیومر الیکٹرانکس کی نمائش IFA میں دنیا بھر سے 1500 سے زائد کمپنیاں شریک ہو رہی ہیں۔ پانچ ستمبر سے 10 ستمبر کے دوران امید کی جا رہی ہے کہ پانچ لاکھ سے زائد افراد اس نمائش کو دیکھنے کے لیے پہنچیں گے۔