پینسٹھ سالہ جرمن خاتون کے ہاں چار جڑواں بچوں کی پیدائش

نیوز ایجنسی ایسوسی ایٹڈ پریس کی رپورٹوں کے مطابق ماضی میں برلن کے ایک اسکول میں ٹیچر کے فرائض انجام دینے والی اس خاتون کے حاملہ ہونے کی تصدیق ہونے پر طبی شعبے کے بہت سے ماہرین نے آنےگرَیٹ راؤگنِک نامی اس خاتون کے ’بہت عمر رسیدہ‘ ہونے کی وجہ سے اس بات پر شدید تنقید کی تھی کہ اس نے مصنوعی طریقے سے حاملہ ہو کر اس عمر میں ایک بار پھر ماں بننے کا فیصلہ کیا تھا۔

جرمن نشریاتی ادارے RTL نے آج ہفتہ 23 مئی کے روز بتایا کہ 65 سالہ آنےگرَیٹ خیریت سے ہیں اور انہوں نے جن چار بچوں کو جنم دیا ہے، ان میں سے ایک لڑکی ہے اور تین لڑکے۔ حمل کی معمول کی مدت پوری ہونے سے بہت پہلے محض 26 ویں ہفتے میں پیدا ہونے والے ان بچوں کا انفرادی طور پر جسمانی وزن صرف 655 گرام یا 1.7 پاؤنڈ سے لے کر 960 گرام یا 2.2 پاؤنڈ کے درمیان بتایا گیا ہے۔

آر ٹی ایل کی ایک خاتون ترجمان ہائیکے سپیڈا کے مطابق ان بچوں کی پیدائش اسی ہفتے منگل کے روز برلن ہی ایک ہسپتال میں ہوئی۔ اس جرمن نشریاتی ادارے نے آنےگرَیٹ کے حاملہ ہونے کی تصدیق ہو جانے کے بعد اس بارے میں ایک تفصیلی پروگرام بھی نشر کیا تھا۔

ہائیکے سپیڈا نے ایسوسی ایٹڈ پریس کو بتایا، ’’آنےگرَیٹ کی نومولود بیٹی کا نام نیتا جبکہ تینوں لڑکوں کے نام درِیز، بَینس اور جان رکھے گئے ہیں۔ چاروں نومولود بچوں کے زندہ رہنے کا امکان کافی زیادہ ہے تاہم ابتدائی عمر میں ان میں پیدا ہونے والی طبی پیچیدگیوں کو کلی طور پر خارج از امکان قرار نہیں دیا جا سکتا کیونکہ ان کی پیدائش حمل کے 26 ویں ہفتے میں ہوئی ہے۔‘‘

آر ٹی ایل کے مطابق اس جرمن خاتون کے اتنی زیادہ عمر میں ماں بننے کے حوالے سے میڈیا میں تمام خبریں اس لیے صرف اسی ٹیلی وژن کی وساطت سے منظر عام پر آئیں کہ آنےگرَیٹ نے اس ٹی وی چینل کے ساتھ اپنی ذات سے متعلق ہر قسم کی خبروں کی خصوصی کوریج کا معاہدہ کر رکھا ہے۔ اس کے لیے اس خاتون کو ایک طے شدہ رقم ادا کی گئی تھی، جس کی مالیت ظاہر نہیں کی گئی۔

اسی موضوع پر فرانسیسی نیوز ایجنسی اے ایف پی نے کولون سے اپنی رپورٹوں میں لکھا ہے کہ آنےگرَیٹ نے مصنوعی طبی ذرائع استعمال کرتے ہوئے حاملہ ہونے کے لیے بیرون ملک سفر کیا تھا کیونکہ جرمنی میں مخصوص شرائط اور حالات کے تحت ایسا طبی طریقہء کار غیر قانونی تصور کیا جاتا ہے۔ اس خاتون نے ’اِن وِیٹرو‘ یا آئی ای طریقہء کار کے تحت حاملہ ہونے کی کوشسوں کے دوران کئی مرتبہ مشرقی یورپی ریاست یوکرائن میں اپنا علاج بھی کرایا تھا۔

برلن کے ایک ہسپتال میں چار نئے بچوں کو جنم دینے سے پہلے بھی یہ خاتون پانچ مختلف مردوں سے 13 بچوں کی جنم دی چکی ہیں، جن کی عمریں اس وقت نو اور 44 برس کے درمیان ہیں۔ اس کے علاوہ اس خاتون کے سات پوتے پوتیاں اور نواسے نواسیاں بھی ہیں۔

خود پر مختلف سماجی اور طبی حلقوں کی طرف سے کی جانے والی تنقید کے حوالے سے آنے گرَیٹ راؤگنِک نے دوران حمل اپنے ایک انٹرویو میں کہا تھا، ’’وہ اس بات کو اپنے انداز سے دیکھتے ہیں اور میں اسے ویسے دیکھنا چاہوں گی، جیسے مجھے پسند ہے۔ ہم میں سے ہر کسی کو اپنے فیصلے خود کرنے کا اختیار حاصل ہے۔‘‘