پیسے سے خوشی خریدی جا سکتی ہے: ایک جائزہ

امریکی دارالحکومت واشنگٹن میں قائم غیر جانبدار تھنک ٹینک پیُو ریسرچ سینٹر نے ایک گلوبل سروے کی رپورٹ آج جمعے کے دِن جاری کی ہے۔ اِس سروے کا بنیادی مقصد یہ جاننا تھا کہ آیا پیسے سے مسرت کا حصول ممکن ہے۔ ریسرچ رپورٹ میں یہ بھی واضح کیا گیا ہے کہ کس طرح کسی بھی ملک کی مجموعی قومی آمدنی میں اضافے اور پھر انفرادی سطح تک پہنچنے والے ثمرات سے فردِ واحد کو تسکین حاصل ہوتی ہے۔ اِس سروے کے لیے پیُو ریسرچ سینٹر نے 43 ملکوں کے اٹھارہ سال یا اِس سے زیادہ عمر کے پچاس ہزار کے قریب افراد سے انٹرویو کیے۔

اِس سروے کے شرکاء سے پوچھا گیا کہ اُن کے پاس کس چیز کی کمی ہے اور یہ کہ آیا اُن کے پاس ٹیلی وژن، ریفریجیٹر، سائیکل، موٹر سائیکل، ریڈیو، واشنگ مشین، مائیکروویو اوون، کمپیوٹر اور کار ہے۔ سروے کے مطابق ان اشیاء میں سے جس کے پاس جتنی اشیاء موجود ہوں گی، اُس کی آسودگی کی سطح بھی اتنی ہی بلند ہو گی۔ یہ سروے رواں برس مارچ سے جون کے درمیان مکمل کیا گیا تھا۔ اب اعداد و شمار پر مبنی یہ رپورٹ جاری کر دی گئی ہے۔

ساتھ ہی ریسرچرز نے اعداد و شمار کے حوالے سے یہ بھی واضح کیا کہ دولت سے لا محدود مسرتیں خریدنا ممکن نہیں اور یہ کہ اِس طرح سے مسرتیں خریدنے کی بھی ایک حد ہوا کرتی ہے۔ محققین نے ایشیا کی اقوام کے حوالے سے یہ بھی تعین کرنے کی کوشش کی ہے کہ کون کون سے ممالک میں لوگ بہتر زندگی گزار رہے ہیں اور کون کون سے ملکوں میں لوگ غیر اطمینان بخش زندگی گزار رہے ہیں۔

اعداد و شمار سے معلوم ہوا ہے کہ ملائیشیا کے عوام بظاہر سب سے زیادہ پر مسرت دکھائی دیتے ہیں۔ چھپن فیصد ملائیشیائی لوگ اپنی موجودہ زندگی کے حوالے سے اطمینان رکھتے ہیں۔ یہ امر اہم ہے کہ جرمنی جیسا ملک جہاں جی ڈی پی کی شرح ملائیشیا سے بہت زیادہ بہتر ہے، وہاں مطمئن زندگی گزارنے والوں کی شرح ساٹھ فیصد ہے اور یہ تناسب ملائیشیا سے بہت زیادہ مختلف نہیں ہے۔ ریسرچ سے یہ معلوم ہوتا ہے کہ مسرت کے حصول کے لیے دولت اہم ہے اور مردوں کے مقابلے میں خواتین میں خوشی اور اطمینان کا احساس زیادہ پایا جاتا ہے۔ اسی طرح غیر شادی شدہ افراد اور درمیانی عمر کے لوگ خود کو مسرت کے کم تر درجے پر محسوس کرتے ہیں۔ بنگلہ دیش میں مطمئن زندگی بسر کرنے والوں کی شرح چھتیس فیصد ہے۔

ایشیائی اقوام میں اطمینان کی سطح بلند پائی گئی۔ بنگلہ دیش، تھائی لینڈ، چین اور فلپائن کی آبادی کے بڑے حصے کا خیال ہے کہ اگلے پانچ برسوں میں اُن کی آسودگی کی سطح بلند ہو جائے گی۔ اِس سروے کے مطابق اردن، مصر اور تیونس کے عوام انتہائی کم آسودہ ہیں اور مستقبل کے حوالے سے بھی یاسیّت کا شکار ہیں۔ ریسرچرز کے مطابق اِن علاقوں میں سیاسی اور سماجی افراتفری بھی لوگوں کے زندگی کے بارے میں احساسات پر براہِ راست اثرانداز ہو رہی ہے۔

ایشیا کی ابھرتی چودہ اقوام میں یہ سروے سن 2007 میں بھی کیا گیا اور اب سن 2014 میں کیا گیا۔ پتہ یہ چلا کہ چَودہ میں سے آٹھ اقوام میں اُن افراد کی تعداد دوگنا ہو گئی ہے جو یہ سمجھتے ہیں کہ وہ مطمئن اور آسودہ زندگی بسر کر رہے ہیں۔ اِن ملکوں میں پاکستان، انڈونیشا، روس، چین اور ملائیشیا بھی شامل ہے۔