په سيول کي د امريکا سفير په چړې وهل سوی
۱۳۹۳ اسفند ۱۴, پنجشنبه
د جنوبي کوريا پوليسو خبر ورکړی دئ، چي د دغه هيواد په مرکز سيول کي د امریکا متحدو ايالاتو پر سفير مارک ليپرت باندي د ږيري خريولو په يوې غټي چړې سره يرغل سوی دئ. د پوليسو په خبره ليپرت پر مخ او يوه لاس باندي ټپي سوی دئ.
د پوليسو په وينا، يرغل کوونکي نارې وهلي چي رقابت کوونکي کورياوي بايد سره يو سي. په تلويزيون کي د ۴۲کلن امريکايي ديپلومات داسي انځورونه ښکاره سول چي باړخو او يو لاس ئې په وينو کي لژند وو.
پر ليپرت باندي د سيول په يوه فرهنگي مرکز کي د وينا پر مهال يرغل سوی دئ. په سيول کي د امريکا متحدو ایالاتو يوه وياند ويلي دي چي د ليپرت روغتيايي وضعيت ښه دئ.
دغه امریکايي ديپلومات په سيول کي د تيرکال په اکتوبر مياشت کي خپله دنده پيل کړې ده. د امريکا جمهور رئيس بارک اوباما له ليپرت سره تليفوني خبري کړي او هغه ته ئې د ښې روغتيا غوښتنه کړې ده.
د جنوبي کوريا د پلازمېني سيول د پوليسو د معلوماتو له مخي يرغل کوونکی نيول سوی دئ. دوی دغه کس ۵۵ کلن کيم ک، معرفي کړی دئ.
کيم په ۲۰۱۰م کال کي په سيول کي د جاپان پر سفير باندي د ډبرو يرغل کړی وو. د يونهاپ خبري آژانس په حواله يرغل کوونکی بايد د ملي چپيانو له ډلي څخه وي.
د تلويزيوني راپورونو پر اساس دغه کس چي د کوريا سنتي کالي ئې اغوستي ول د يرغل پرمهال ئې د جنگ پرضد شعارونه ورکول.
جنوبي کوريا او امریکا متحدو ايالاتو د دوشنبې په ورځ خپل گډ کلني پوځي مانورونه پيل کړل. پر دغو مانورونو باندي شمالي کوريا سختي نيوکي وکړې او په غبر گون کي ئې دوه د لنډ واټن توغندي وتوغول.
د شمالي کوريا واکمن کيم جنگ اون، د دغو مانورونو ترمخه لا خپل پوځ ته لارښوونه کړې وه، چي «له امریکا او د هغه له متحدانو» سره جنگ ته تياری ونيسي.
د شمالي کوريا د رسمي رسنيو د راپور له مخي، د دغه هيواد واکمن د تيري شنبې په روځ (۲۰۱۵م کال د فيبرورۍ ۲۸مه) د امريکا او جنوبي کوريا د گډو پوځي مانورونو په غبرگون کي وويل: «پوځ بايد ښه تمرين وکړي، څو موږ وکولای سو د امریکا بيرغ ټوکر ټوکر کړو.»