پریوں اور جنّوں کی کہانیاں، نیا میوزیم

دُنیا کی تقریباً تمام لوک داستانوں کی طرح جرمن بھائیوں یاکوب اور وِلہیلم گریم کی لوک کہانیاں بھی ’’ایک دفعہ کا ذکر ہے ...‘‘ کے اُس مشہور جملے سے شروع ہوتی ہیں، جو سننے اور پڑھنے والے کو پلک جھپکتے میں رنگا رنگ اور دلچسپ واقعات کی کسی اَن دیکھی دُنیا میں پہنچا دیتا ہے۔

جرمن بچے تو اپنے والدین اور بڑے بوڑھوں سے گریم برادران کی پُرلطف کہانیاں سُنانے کی فرمائشیں کرتے ہی رہتے ہیں لیکن اِن دوبھائیوں کی مرتب کی ہوئی جرمن لوک داستانیں دُنیا کے باقی حصوں میں بھی شوق سے پڑھی اور سُنی جاتی ہیں۔ کہا جاتا ہے کہ جرمن مصلح مارٹِن لُوتھر کی انجیل کے ساتھ ساتھ جس جرمن کتاب کا سب سے زیادہ غیر ملکی زبانوں میں ترجمہ کیا گیا ہے، وہ ہے، ’گریم براداران کی جرمن لوک کہانیاں‘، جنہیں دُنیا کی کم از کم 150 مختلف زبانوں اور بولیوں میں منتقل کیا جا چکا ہے۔

اِن دونوں بھائیوں کی خدمات کو خراجِ عقیدت پیش کرنے کے لیے اُن کے نام پر جرمن شہر Kassel میں، جہاں اِن دونوں بھائیوں نے تیس سال سے زیادہ کا عرصہ گزارا تھا، ’گریم برادرز میوزیم‘ کے نام سے ایک چھوٹا سا عجائب گھر بنایا گیا۔ اِس میں بچوں کی کہانیوں اور لوک داستانوں کی تصاویر کا دُنیا بھر میں سب سے بڑا ذخیرہ موجود ہے یعنی کوئی 35 ہزار جِلدیں۔

1959ء میں شہر کاسل اور گریم برادران انجمن کی جانب سے قائم کیے گئے اِس عجائب گھر کو جرمن باشندے ہی نہیں بلکہ دُنیا بھر سے بڑی تعداد میں آنے والے شائقین بھی شوق سے دیکھتے رہے۔ یہ سیاح کہانیوں کی خوبصورت اور باتصویر کتابوں کا اور لوک داستانوں سے متعلق تصاویر کا گزشتہ دو صدیوں کے دوران اکٹھا کیا گیا اتنا بڑا ذخیرہ دیکھ کر دَنگ رہ جاتے تھے۔

عجائب گھر میں رکھی گئی تصاویر میں بہادُر شہزادے اور حسین شہزادیاں بھی تھیں، شرارتی بونے اور خوفناک دیو بھی، عجیب و غریب صلاحیتوں کے حامل جِنّ اور پریاں بھی اور انسانوں کی طرح بولنے کی اہلیت رکھنے والے جانور بھی۔ تصاویر کے ساتھ ساتھ اِس میوزیم میں گریم برادران کی زندگی سے متعلق بھی تمام تفصیلات جمع کی گئی تھیں، جن سے اِن دونوں بھائیوں کے زبان کی تحقیق سے متعلق منصوبوں اور اُن کی سیاسی سرگرمیوں کا بھی پتہ چلتا ہے۔

دلچسپ بات یہ ہے کہ بیرونی دُنیا میں گریم براردان کی مرتب کردہ کہانیوں کے سب سے زیادہ شیدائی غالباً جاپان میں ہیں، جہاں ایک اندازے کے مطابق 80 فیصد بچے اِس نام یعنی Grimm سے واقِف ہیں۔ چند سال پہلے ’گریم برادرز میوزیم‘ نے لوک داستانوں کی تصاویر پر مبنی ایک نمائش منظم کی، جس نے جاپان کے سات مختلف شہروں کے ساتھ ساتھ چینی دارالحکومت بیجنگ میں بھی شائقین کو محظوظ کیا۔

مشرقِ بعید میں گریم براداران کانام شاید اِس وجہ سے زیادہ معروف ہو کہ جرمن صوبے ہیسے کے حکام اُس پورے خطّے میں اپنی تشہیر کرتے ہوئے وہاں کے باشندوں کو یہ کہہ کر اپنے صوبے کی سیاحت کی دعوت دیتے ہیں کہ صوبہ ہیسے دیو مالائی داستانوں کی سرزمین ہے۔ یہ اور بات ہے کہ کئی مشہور جرمن لوک کہانیوں نے بنیادی طور پر کسی اور سرزمین میں جنم لیا تھا۔ مثلاً اُس شہزادی کی کہانی، جسے ایک جادوگرنی اپنے جادو کے زور سے ایک سو برس کے لیے سُلا دیتی ہے یا پھرسُرخ ٹوپی والی اُس لڑکی کی کہانی، جو جنگل میں اپنا راستہ بھول جاتی ہے اور ایک بھیڑیے کی خوراک بننے سے بال بال بچتی ہے۔

یہ دونوں کہانیاں گریم بھائیوں سے بھی ایک سو سال پہلے فرانس میں لکھی گئی تھیں۔ ویسے گریم برادران کی مرتب کردہ جرمن لوک کہانیوں کی جڑیں مصر اور ہندوستان تک بھی پھیلی ہوئی ہیں۔

پچپن سال تک اس میوزیم کے دروازے دنیا بھر کے شائقین کے لیے کھلے رہے تاہم اکتوبر 2014ء میں اسے بند کر دیا گیا تاکہ اسی شہر میں ’گریمز ورلڈ‘ کے نام سے ایک نیا عجائب گھر تعمیر کیا جا سکے۔ ان دنوں تقریباً بیس ملین یورو کی لاگت سے اس نئے میوزیم کی تعمیر کا کام تیزی سے جاری ہے اور امید کی جا رہی ہے کہ اس سال کے وسط تک یہ میوزیم مکمل ہو جائے گا۔

اس نئے میوزیم کا رقبہ تقریباً سولہ سو مربع میٹر ہو گا اور اسے دیکھنے کے لیے جانے والے شائقین کی تعداد بھی اب تک کے ’گریم برادرز میوزیم‘ مقابلے میں تین گنا ہونے کی توقع کی جا رہی ہے۔