پاکستان کے خلاف بنگلہ دیش کی تاریخی جیت

تین ایک روزہ میچوں کی سیریز کے سلسلے میں بنگلہ دیش کے دارالحکومت ڈھاکہ میں اتوار 19 اپریل کو کھیلے گئے دوسرے ون ڈے میچ میں بنگلہ دیش نے پاکستان کو شکست دے کر ایک نئی تاریخ رقم کر دی ہے۔ بنگلہ دیش کی ٹیم اس سے قبل کسی بھی سیریز میں پاکستان کو مات دینے میں کامیاب نہیں ہو سکی تھی۔

اس میچ میں پاکستان نے ٹاس جیت کر پہلے کھیلتے ہوئے چھ وکٹوں کے نقصان پر 239 رنز بنائے۔ پاکستان کی طرف سے سعد نسیم نے سب سے زیادہ 77 رنز اسکور کیے اور ناٹ آؤٹ رہے جبکہ وہاب ریاض نے 51 رنز کی اننگز کھیلی اور وہ بھی آؤٹ ہوئے بغیر پویلین لوٹے۔ پاکستان نے میزبان بنگلہ دیش کو جیت کے لیے 240 رنز کا ہدف دیا۔

بنگلہ دیشی اوپنر تمیم اقبال نے آج شاندار اننگز کھیلی اور وہ 116 رنز بنا کر ناقابل شکست لوٹے۔ پاکستان کے خلاف ان کی یہ دوسری مسلسل سنچری رہی۔ بنگلہ دیش کے دوسرے سب سے زیادہ رنز بنانے والے وکٹ کیپر بیٹسمین مشفق الرحیم رہے، جنہوں نے 65 رنز کی اننگز کھیلی۔ میچ کا بہترین کھلاڑی تمیم اقبال کو قرار دیا گیا۔

مہمان ٹیم پاکستان نے جمعہ کے روز ڈھاکہ ہی میں کھیلے جانے والے پہلے ایک روزہ میچ میں بھی پاکستان کو 79 رنز سے شکست ہوئی تھی۔ اس طرح بنگلہ دیش نے ہوم سیریز کے پہلے دونوں میچ جیت کر پہلی بار پاکستان کے خلاف سیریز جیتنے کا اعزاز حاصل کر لیا ہے۔ تیسرا اور آخری ون ڈے میچ بدھ 22 اپریل کو کھیلا جائے گا۔

بنگلہ دیش کا دورہ کرنے والی پاکستانی ٹیم میزبان کے خلاف ایک ٹی ٹونٹی میچ جمعہ 24 اپریل کو کھیلے گی جبکہ دو ٹیسٹ میچوں کی سیریز بھی اس دورے کا حصہ ہے۔