پاکستان: لکھوی کی ضمانت کے خلاف اپيل دائر کرانے کا فيصلہ

پاکستانی حکام نے آج بروز جمعہ ممبئی دہشت گردانہ حملوں کے مبينہ ماسٹر مائنڈ ذکی الرحمان لکھوی کو حراست ميں ہی رکھنے کے باقاعدہ احکامات جاری کر ديے ہيں۔ پاکستانی ميں مقامی ذرائع ابلاغ پر نشر کردہ رپورٹوں کے مطابق لکھوی کو امن عامہ برقرار کھنے کے قانون کے تحت حراست ميں رکھا جا رہا ہے جب کہ وفاقی حکومت لکھوی کی ضمانت کے خلاف عدالت عظمٰی ميں اپيل دائر کرنے کا فيصلہ بھی کر چکی ہے۔

قبل ازيں جرمن نيوز ايجنسی ڈی پی اے کی اسلام آباد سے موصولہ رپورٹوں کے مطابق وزارت داخلہ نے حکام سے کہا کہ ذکی الرحمان لکھوی پر نئے قانون کے تحت فرد جرم عائد کی جائے تاکہ وہ قيد خانہ چھوڑ نہ سکے۔ ايک سرکاری اہلکار نے اپنا نام مخفی رکھنے کی شرط پر بتايا کہ يہ محض ايک ابتدائی اقدام ہے اور اس کا مقصد صرف اس بات کو يقينی بنانا ہے کہ ملزم آزاد نہ ہو سکے۔ حکومتی وکيل استغاثہ چوہدری اظہر نے کہا ہے کہ وہ لکھوی کی ضمانت کے خلاف کورٹ ميں آئندہ پير کے روز اپيل درج کرائيں گے۔

قبل ازيں ايک روز قبل پاکستان کی ایک عدالت نے ممبئی حملوں کے مبینہ ماسٹر مائنڈ ذکی الرحمان لکھوی کو ضمات پر رہا کرنے کا فيصلہ سنايا تھا۔ بھارتی حکام نے اس پیش رفت کو انتہائی افسوناک قرار دیتے ہوئے پاکستانی حکام پر زور ديا تھا کہ وہ اس فيصلے کے خلاف اپيل دائر کرائے۔

ذکی الرحمان لکھوی کو 2009ء میں گرفتار کیا گیا تھا۔ اس پر الزام ہے کہ وہ 2008ء میں بھارتی شہر ممبئی ميں ہونے والے دہشت گردانہ حملوں کا ماسٹر مائنڈ تھا۔ ممبئی کے مختلف مقامات پر ساٹھ گھنٹے تک جاری رہنے والی اس دہشت گردانہ کارروائی میں 166 افراد مارے گئے تھے۔

مبینہ دہشت گرد لکھوی کی ضمانت منظور کرنے کا فيصلہ پاکستان ميں ایک ایسے وقت پر کیا گیا، جب پاکستانی عوام پشاور کے ايک اسکول ميں سولہ دسمبر کو ہونے والے ایک دہشت گردانہ حملے کے کرب میں ہے۔ اس حملے میں ايک سو پينتيس بچے اور اسٹاف کے نو ارکان مارے گئے تھے۔