پانچ ہائی رسک گروپ، ایڈز کے خلاف عالمی جنگ خطرے میں

عالمی ادارہ صحت کے مطابق بین الاقوامی آبادی میں شامل ان پانچ سماجی گروپوں کو آج بھی ایڈز کی بیماری کا شکار ہو جانے کا سب سے زیادہ خطرہ ہے۔ اس سے بھی زیادہ باعث تشویش بات یہ ہے کہ ان پانچ ہائی رسک گروپوں کے ارکان خود کو ایڈز کا سبب بننے والے HIV وائرس سے بچانے کے لیے سب سے کم احتیاطی تدابیر اختیار کرتے ہیں۔

جنیوا میں قائم ڈبلیو ایچ او کی طرف سے بتایا گیا ہے کہ ان پانچ سوشل گروپس کے افراد عام طور پر اپنے ایچ آئی وی ٹیسٹ کروانے اور اس وائرس کے علاج کے لیے دستیاب سہولتوں سے فائدہ اٹھانے میں سب سے کم دلچسپی ظاہر کرتے ہیں۔

عالمی ادارہ صحت کے ایڈز سے متعلق شعبے کے سربراہ گوٹ فرِیڈ ہِرن شال (Gottfried Hirnschall) نے جنیوا میں بتایا، ’’عالمی سطح پر ایڈز کے خلاف ہماری کوششیں آبادی کے ایسے مخصوص حصوں کی وجہ سے ناکام ہو رہی ہیں، جنہیں ایڈز کے وائرس کا سب سے زیادہ خطرہ ہے اور جنہیں صحت کی مناسب سہولیات تک کافی رسائی بھی حاصل نہیں ہے۔ ایسے افراد میں ہم جنس پرست مرد، جسم فروش افراد، اپنی جنس بدلوا لینے والے انسان، جیلوں کے قیدی اور وہ لوگ شامل ہیں جو منشیات کے استعمال کے لیے سرنجیں استعمال کرتے ہیں۔‘‘

ورلڈ ہیلتھ آرگنائزیشن کے اس اعلیٰ عہدیدار کے بقول عالمی آبادی کے ایسے حصوں میں ایچ آئی وی وائرس اور ایڈز کے مرض کا پھیلاؤ بہت تیز رفتار ہے۔ انہوں نے کہا کہ دنیا بھر میں HIV وائرس کا شکار ہو جانے کے جتنے بھی نئے واقعات دیکھنے میں آ رہے ہیں، ان میں ان پانچ سماجی گروپوں کے ارکان کی شرح 50 فیصد تک بنتی ہے، جو انتہائی تشویشناک بات ہے۔

ڈبلیو ایچ او کے مطالعاتی جائزوں سے ثابت ہوا ہے کہ جسم فروشی کرنے والی خواتین میں HIV وائرس کا شکار ہو جانے کا خطرہ عام خواتین کے مقابلے میں 14 گنا زیادہ ہوتا ہے۔ ہم جنس پرست مردوں میں یہ خطرہ عام مردوں کے مقابلے میں 19 گنا زیادہ ہوتا ہے۔ اس کے علاوہ اپنی جنس تبدیل کروا کر خواتین بن جانے والے شہریوں میں ایڈز کے وائرس سے متاثر ہونے کا خطرہ تو 50 گنا زیادہ ہو جاتا ہے۔ اسی طرح نشے کے عادی جو لوگ منشیات استعمال کرنے کے لیے سرنجیں استعمال کرتے ہیں، ان میں بھی ایڈز اور ایچ آئی وی وائرس کا خطرہ باقی ماندہ آبادی کے مقابلے میں 50 گنا زیادہ تک ہو سکتا ہے۔

عالمی ادارہ صحت نے پہلی مرتبہ ہم جنس پرست افراد کو یہ مشورہ بھی دیا ہے کہ وہ خود کو ایچ آئی وی وائرس سے بچانے کے لیے جنسی رابطوں کے دوران دیگر احتیاطی تدابیر تو اختیار کریں لیکن ساتھ ہی انہیں قبل از وقت ہی ایڈز کے خلاف ادویات کا استعمال شروع کر دینے پر بھی غور کرنا چاہیے۔

گوٹ فرِیڈ ہِرن شال کے مطابق ایڈز کے وائرس کے خلاف PREP نامی دوائی کے استعمال سے ہائی رسک گروپوں کے افراد میں بھی اس وائرس کا شکار ہو جانے کا خطرہ 92 فیصد تک کم ہو جاتا ہے۔ عالمی ادارہ صحت کے اعداد و شمار کے مطابق اس وقت دنیا بھر میں ایچ آئی وی وائرس کے شکار مریضوں کی تعداد 35.3 ملین ہے۔ ان میں سے ہر سال اس وائرس کے ہاتھوں ایڈز کا شکار ہو کر 1.6 ملین انسان موت کے منہ میں چلے جاتے ہیں۔

ایڈز کے بارے میں تازہ ترین عالمی اعداد و شمار ڈبلیو ایچ او نے اپنی ایک نئی رپورٹ میں جاری کیے ہیں۔ یہ رپورٹ آسٹریلیا کے شہر ملبورن میں ہونے والی انٹرنیشنل ایڈز کانفرنس کے سلسلے میں جاری کی گئی ہے، جو 20 جولائی کو شروع ہو گی۔