وسطی افریقی جمہوریہ: مسلمانوں پر زندگی کا دائرہ تنگ

شورش زدہ افریقی ملک وسطی افریقی جمہوریہ کے دارالحکومت بنگوئی میں تشدد کے تازہ واقعات کے دوران اسی ویک اینڈ پر تیرہ افراد کی ہلاکت کا بتایا گیا ہے۔ تین افراد کل اتوار کی سہ پہر میں قتل ہوئے۔ ان میں دو مسلمانوں کو مشتعل مسیحی گروپوں نے دو مختلف مقامات پر ہلاک کیا جبکہ مسلمانوں نے بھی ایک مسیحی کو اس شک پر مار ڈالا کہ اُس نے مسجد پر دستی بم پھینکا تھا۔ ہفتہ اور اتوار کو شہر میں لوٹ مار کا سلسلہ بھی جاری رہا اور کئی عمارتوں کو بھی بلوائیوں تے آگ لگائی۔

اتوار کے روز مسیحی ملیشیا نے وسطی افریقی جمہوریہ کی عبوری پارلیمنٹ کے رکن ایمانویل دجاراوا (Emmanuel Djarawa) کو فائرنگ کر کے ہلاک کر دیا۔ عینی شاہدین کے مطابق دجاراوا کو مسیحیوں کی اینٹی بالاکا ملیشیا نے ہلاک کیا ہے۔ بعض حلقوں کا کہنا ہے کہ اینٹی بالاکا مسیحی ملیشیا کئی ہفتوں سے دجاراوا کے معمولات پر باقاعدگی سے نگاہ رکھے ہوئے تھی۔ بنگوئی میں قائم عبوری حکومت نے ابھی تک دجاراوا کی ہلاکت کی تصدیق نہیں کی ہے۔ اِس دوران بنگوئی یونیورسٹی کے چانسلر گُستاو بوبوسی نے یونیورسٹی کھولنے کا اعلان کیا ہے۔ بنگوئی یونیورسٹی کئی ماہ کی بندش کے بعد آج پیر سے کھل رہی ہے۔

تجزیہ کاروں کے خیال میں پرتشدد واقعات میں تسلسل کے تناظر میں وسطی افریقی جمہوریہ کے مسلمانوں کو انتہائی سنگین اور پرخطر حالات کا سامنا ہے۔ ہزاروں مسلمان اپنے گھر بار چھوڑ کر محفوظ مقامات پر منتقل ہونے پر مجبور ہو چکے ہیں۔ ابھی تک ہلاک ہونے والے مسلمانوں کی درست تعداد کا تعین نہیں کیا جا سکا ہے۔ افراتفری کے شکار اس افریقی ملک میں فرانسیسی فوجیوں کے علاوہ افریقی امن دستے بھی موجود ہیں لیکن مسلمان آبادی کے حالات بہتر نہیں ہو پا رہے اور مسلح مسیحی ملیشیا کے اراکین حملے کرنے کا کوئی موقع نہیں چھوڑ رہے۔ ہیومن رائٹس واچ کے پیٹر بُوکیرٹ کے مطابق اِس وقت ضرورت اِس امر کی ہے کہ ہلاکتوں کے سلسلے کو فوری طور پر روکا جائے۔

وسطی افریقی جہوریہ کی کُل آبادی 46 لاکھ نفوس پر مشتمل ہے اور اِس میں مسلم آبادی کا حصہ 15 فیصد ہے۔ اقوام متحدہ کے مطابق 8 لاکھ افراد مہاجرت اختیار کر کے دوسرے مقامات کی جانب منتقل ہو گئے ہیں اور ان میں سے نصف لوگ بنگوئی سے نقل مکانی کر چکے ہیں۔ ہفتے کے روز عبوری حکومت کے وزیراعظم آندرے نزاپائیکی (Andre Nzapayeke) نے اعتراف کیا کہ کوئی ایسی قوت موجود ہے جو نہیں چاہتی کے اِس ملک میں مسلمان موجود رہیں۔

پچھلے جمعے یعنی سات فروری کو بنگوئی سے ہزار ہا مسلمانوں کا قافلہ کئی گاڑیوں پر سامان لاد کر جب نقل مکانی کے لیے روانہ ہوا تو ارد گرد کھڑے بے شمار مسیحی افراد نے ان پر آوازے کسنے کے ساتھ اُن کا مذاق بھی اُڑایا۔ اس دوران ایک شخص ٹرک سے نیچے گر پڑا تو مذاق اڑانے مسیحیوں نے اُسے ہلاک کر دیا۔ جن علاقوں کے مسلمان ابھی تک نقل مکانی نہیں کر سکے وہ مساجد میں پناہ لیے ہوئے ہیں اور حکومتی سکیورٹی کے منتظر ہیں۔ بنگوئی کے شمال مغرب کے نواح میں آباد بڑی مسلم آبادی پوری طرح نقل مکانی کر چکی ہے۔ جرمن خبر رساں ادارے ڈی پی اے کے مطابق مسلم آبادی والے تمام علاقے ویران ہو گئے ہیں۔