نمرود خطرے میں، ’آئی ایس‘ کے ہاتھوں عراقی ثقافتی ورثہ تاراج

اس ویڈیو میں دکھایا گیا ہے کہ کیسے موصل کے آثارِ قدیمہ کے اس میوزیم میں یہ جنگجو ایک ایک کر کے میوزیم کے مختلف حصوں میں شو کیسوں میں سجے یا دیواروں پر آویزاں مجسموں کو ریزہ ریزہ کر رہے ہیں۔ یہ جنگجو زمین پر گرے ہوئے مجسموں میں بھی ڈرلنگ کرتے ہوئے اس امر کو یقینی بنا رہے ہیں کہ صدیوں پرانے مجسموں کے خدّ و خال اس حد تک خراب ہو جائیں کہ اُنہیں دوبارہ بحال کیا ہی نہ جا سکے۔

ماہرینِ آثارِ قدیمہ نے اس ویڈیو کے منظرِ عام پر آنے کے ایک روز بعد جمعہ ستائیس فروری کو خدشات ظاہر کیے ہیں کہ موصل کے عجائب گھر کو تاخت و تاراج کرنے کے بعد دہشت گرد گروپ ’اسلامک اسٹیٹ‘ کے جہادی اپنے زیرِ قبضہ علاقوں میں موجود صدیوں پرانے ثقافتی ورثے کو باقاعدہ منصوبہ بندی کے ساتھ تباہ و برباد کرنے کے مشن پر نکل سکتے ہیں۔

بتایا گیا ہے کہ اب دو قدیم شہروں الحضر اور نمرود کو خاص طور پر خطرہ ہے۔ الحضر تو یونیسکو کے عالمی ثقافتی ورثے کی فہرست میں بھی شامل ہے۔ یہ دونوں شہر موصل سے جنوب کی جانب واقع ہیں اور موصل وہ شہر ہے، جو گزشتہ سال جون سے عراق میں ’آئی ایس‘ کے جہادیوں کے ایک مرکز کی سی شکل اختیار کر چکا ہے۔

نیوز ایجنسی اے ایف پی سے باتیں کرتے ہوئے نیویارک کی سٹونی بروک یونیورسٹی سے وابستہ عراقی ماہرِ آثارِ قدیمہ عبدل عامر حمدانی نے کہا:’’ابھی کہانی ختم نہیں ہوئی ہے، بین الاقوامی برادری کو مداخلت کرنی چاہیے۔‘‘

حمدانی قدیم نوادرات سے متعلقہ محکمے سے وابستگی کے دوران عراق میں کام بھی کر چکے ہیں۔ حمدانی نے امریکا سے ٹیلیفون پر اے ایف پی کو بتایا:’’اُنہوں (آئی ایس کے جنگجوؤں) نے گارڈز کو بتایا کہ وہ نمرود کو تباہ کر دیں گے، جو آشوری عہد کے بہت ہی اہم مراکز میں سے ایک ہے اور جہاں ابھری ہوئی تصویریں اور پروں والے بیلوں کے مجسمے ہیں۔ اگر انہیں بھی توڑ پھوڑ دیا گیا تو یہ صحیح معنوں میں ایک بڑی تباہی ہو گی۔‘‘

حمدانی نے کہا کہ ’آئی ایس‘ کے جنگجو ممکنہ طور پر الحضر پر بھی حملہ کر کے اُسے تباہ کر سکتے ہیں، جو صحرائی علاقے میں بالکل الگ تھلگ واقع ہے۔ الحضر موصل سے جنوب مغرب کی جانب تقریباً ایک سو کلومیٹر کی دُوری پر واقع ہے اور ’اسلامک اسٹیٹ‘ کے قبضے میں ہے۔

احسان فتحی کا تعلق عراق سے ہے اور وہ آج کل اردن میں مقیم ہیں۔ وہ ماہرِ تعمیرات بھی ہیں اور ماہرِ آثار قدیمہ بھی۔ اُنہوں نے بھی اے ایف پی سے باتیں کرتے ہوئے اس خدشے کا اظہار کیا کہ ’ابھی اور زیادہ تباہی آنے والی ہے‘:’’وہ کچھ بھی کر سکتے ہیں، وہ الحضر کی قدیم عبادت گاہوں میں جا سکتے ہیں اور کہہ سکتے ہیں کہ یہ ملحد تھے اور پھر وہ آسانی سے وہاں سب کچھ اُڑا سکتے ہیں، اُنہیں کون روکے گا؟‘‘

فتحی کے مطابق جمعرات چھبیس فروری کو ’اسلامک اسٹیٹ‘ کے جنگجوؤں نے بارہویں صدی کی ایک مسجد کو بھی بارود لگا کر اُڑا دیا، ’کیونکہ اُس کے اندر ایک مقبرہ تھا‘۔

جہادی مذہبِ اسلام کی جو کٹر تشریح کرتے ہیں، اُس میں مجسموں، بُتوں اور مقبروں کو ابتدائی مسلم عقیدے کی پاکیزگی کو متاثر کرنے والے عناصر تصور کیا جاتا ہے۔ اس تشریح کے مطابق یہ مجسمے اور بُت گویا شرک کی علامت ہیں۔

اے ایف پی کے مطابق یہ جہادی اپنی اس تشریح کے ساتھ محض ایک اقلیت کی نمائندگی کرتے ہیں جبکہ بہت سے مسلمان علماء، جن میں کٹر اسلام کی پیروی کرنے والے علماء بھی شامل ہیں، یہ دلیل دیتے ہیں کہ پیغمبرِ اسلام کے دور کے بُت بھی آج کے دور میں ثقافتی ورثے کا حصہ ہیں۔

اقوام متحدہ کے ادارے یونیسکو کی سربراہ ارینا بوکووا نے جمعرات کو بتایا کہ اُنہوں نے موصل میں ثقافتی ورثے کی تباہی کے بعد عالمی سلامتی کونسل کا ایک ہنگامی اجلاس بلائے جانے کی درخواست دی ہے۔ بوکووا نے اس واقعے کو ’ناقابلِ برداشت‘ اور عراق کی سلامتی کے لیے ایک خطرہ قرار دیا۔