ناسا کا ’انتارس‘ کارگو راکٹ لانچنگ کے دوران تباہ

حکام کے مطابق بین الاقوامی خلائی اسٹیشن کے لیے روانہ کیا جانے والا یہ راکٹ منگل کو ریاست ورجینا کے ساحلی علاقے پر قائم ’والپس فلائٹ فیسیلیٹی‘ نامی ایک کمرشل لانچنگ پیڈ سے پرواز کے چند لمحوں بعد ہی گر کر تباہ ہو گیا۔ چودہ منزلہ اس راکٹ میں بین الاقوامی خلائی اسٹیشن پر موجود خلا بازوں کے لیے ساز و سامان لدا ہوا تھا۔ نجی کمپنی Orbital Sciences کے اس راکٹ کو پیش آنے والے حادثے کی تاحال وجہ معلوم نہیں ہو سکی ہے۔

ناسا کے ترجمان ڈین ہاؤٹ نے نيوز ايجنسی روئٹرز کو بتایا ہے کہ بین الاقوامی خلائی اسٹیشن پر موجود عملے کے چھ ممبران کو اس حادثے کے بارے میں مطلع کر دیا گیا ہے۔ اس وقت مدار میں موجود اس اسٹیشن پر ناسا کے دو، یورپی خلائی ایجنسی کا ایک جبکہ روسی خلائی ایجنسی کے تین خلا باز موجود ہیں۔ ادھر وائٹ ہاؤس نے بھی اس حادثے کی تصدیق کرتے ہوئے بتایا ہے کہ صدر باراک اوباما کو اس پیش رفت سے آگاہ کر دیا گیا ہے۔

ڈین ہاؤٹ نے اس حادثے کے بارے میں تفصیلات بیان کرتے ہوئے کہا کہ جب یہ حادثہ پیش آیا تو اس وقت دھماکے کے مقام پر کوئی اہلکار موجود نہیں تھا، جس کی بنا پر کہا جا سکتا ہے کہ اس دوران کوئی ہلاکت نہیں ہوئی۔ ناسا کی طرف سے جاری کردہ ایک الگ بیان کے مطابق، ’’ہم تصدیق کرتے ہیں کہ اس حادثے کے بعد ہم نے پڑتال کر لی ہے کہ کوئی اہلکار لاپتہ نہیں ہوا ہے۔ اس ناکام آپریشن کے دوران کوئی شخص زخمی بھی نہیں ہوا۔‘‘

یہ امر اہم ہے کہ ناسا کی طرف سے بین الاقوامی خلائی اسٹیشن کے لیے کارگو کی ذمہ داریاں نجی کمپنیوں کو سونپنے کے بعد اپنی نوعیت کا یہ پہلا حادثہ ہے۔ Orbital Sciences نامی ایک کمپنی ان دو نجی اداروں میں سے ایک ہے، جن کے ساتھ ناسا نے کارگو راکٹ روانہ کرنے کے لیے معاہدہ کر رکھا ہے۔

انتارس کے پروگرام منیجر مائیک پنکسٹن نے کہا ہے کہ اس کارگو راکٹ میں خوراک اور دیگر آلات کے علاوہ کچھ حساس آلات بھی تھے، اس لیے حادثے کے مقام کی صفائی کے لیے انتہائی احتیاط کی ضرورت ہو گی۔ امریکا کی نینشل سکیورٹی ایجنسی نے ان حساس آلات کی نوعیت کے بارے میں فوری طور پر کوئی تبصرہ نہیں کیا ہے۔

ناسا نے کہا ہے کہ اس حادثے کے نتیجے میں بظاہر محدود پیمانے پر نقصان ہوا ہے۔ اس سے قبل یہ نجی کمپنی چار مرتبہ کامیاب طریقے سے راکٹ لانچ کر چکی ہے۔ ناسا ٹی وی پر اس حادثے کی ویڈیو جاری کر دی گئی ہے، جس میں دیکھا جا سکتا ہے کہ راکٹ کی پرواز کے کچھ لمحوں بعد ہی اس میں شعلے بھڑک اٹھتے ہیں، جو اس کے بالائی حصے سے اوپر کی طرف بڑھتے جاتے ہیں۔ اس ویڈیو ميں ديکھا جا سکتا ہے کہ راکٹ فوری طور پر ہی واپس لانچنگ پیڈ پر گر جاتا ہے۔