نئی یوکرائنی پارلیمان کا پہلا اجلاس، یاٹسینی یُک دوبارہ منتخب

کییف میں یوکرائن کی نئی قومی پارلیمان کے اولین اجلاس میں آج پہلے تو ایوان کے ارکان نے اپنی ذمہ داریوں کا حلف اٹھایا اور پھر انہوں نے نئے پارلیمانی اسپیکر کا انتخاب کیا۔ اب تک وزیر اعظم کے فرائض انجام دینے والے آرسینی یاٹسینی یُک کو پوری پارلیمانی مدت کے لیے نئے سرے سے سربراہ حکومت منتخب کرنے کے لیے ان کا نام صدر پیٹرو پوروشینکو نے تجویز کیا تھا۔

نئی پارلیمان میں، جس کے عام انتخابات کے بعد وجود میں آنے کا ایک بڑا پس منظر یوکرائن کا وہ خونریز بحران بھی ہے جو اب تک ہزاروں انسانی جانوں کے ضیاع کا باعث بن چکا ہے، صدر پوروشینکو کے حامی سیاسی حلقوں اور جماعتوں کی اکثریت ہے اور مجموعی طور پر اس نئے ایوان میں مغرب نواز سیاسی قوتوں کو غلبہ حاصل ہے۔

ایسا اسی تناظر میں ہوا کہ نئی یوکرائنی پارلیمان میں فوراﹰ ہی ایک نیا مغرب نواز سیاسی اتحاد وجود میں آ گیا اور صدر پیٹرو پوروشینکو نے آرسینی یاٹسینی یُک کو باقاعدہ طور پر نیا ملکی وزیر اعظم بھی نامزد کر دیا تھا۔ پوروشینکو کی طرف سے یاٹسینی یُک کی وزارت عظمیٰ کے عہدے پر نامزدگی کی ایوان میں موجود اکثریتی اتحاد کے ارکان نے حمایت کر دی اور پہلے سے اس عہدے پر فائز یاٹسینی یُک کو نئی پارلیمان کی آئینی مدت پوری ہونے تک کییف میں ملکی حکومت کی قیادت کا سیاسی اختیار بھی مل گیا۔

یاٹسینی یُک اس سال فروری میں سابق صدر وکٹر یانوکووچ کی اقتدار سے علیحدگی اور ملک سے فرار کے بعد عبوری وزیر اعظم بنائے گئے تھے لیکن آج کی رائے شماری کے بعد وہ یوکرائن کے عوامی نمائندوں کے جمہوری طور پر منتخب کردہ وزیر اعظم بن گئے ہیں۔

کییف میں یوکرائن کی ’ویرخوونا رادا‘ کہلانے والی قومی پارلیمان کے ارکان کی تعداد 450 ہے اور ان میں سے 341 ارکان نے آرسینی یاٹسینی یُک کے وزیر اعظم کے طور پر دوبارہ انتخاب کے حق میں ووٹ دیے۔ اکتوبر میں ہونے والے پارلیمانی الیکشن کے بعد، جن میں یورپ نواز پارٹیوں کو زبردست کامیابی ملی تھی، ایوان کے آج سے شروع ہونے والے اولین اجلاس کے پہلے روز کُل 390 ارکان موجود تھے۔ ان میں سے 87 فیصد نے یاٹسینی یُک کی تقرری کی حمایت کی اور پارلیمان کی طرف سے یاٹسینی یُک کی نامزدگی کی اتنی بھرپور توثیق متوقع بھی تھی۔

یاٹسینی یُک نے اپنے دوبارہ انتخاب کے لیے ایوان میں رائے شماری سے قبل نئے عوامی نمائندوں سے خطاب کرتے ہوئے زور دے کر کہا، ’’ہمارے کندھوں پر تاریخی ذمہ داری آن پڑی ہے۔ ہمیں یوکرائن کے ریاستی وجود کو برقرار رکھتے ہوئے اپنی آزادی کو یقینی بنانا ہے۔ ہمارا ملک حالت جنگ میں ہے اور لوگ مشکل میں۔‘‘

نیوز ایجنسی اے ایف پی کے مطابق ترقی پسند سیاستدان اور ماہر اقتصادیات یاٹسینی یُک کییف میں پانچ جماعتوں پر مشتمل مخلوط حکومت کے سربراہ منتخب ہوئے ہیں اور ان کا فوری اور انتہائی مشکل کام یہ ہو گا کہ سابق سوویت یونین کی اس ریاست کو اس تباہی اور بربادی کے دہانے سے واپس لایا جائے جہاں یہ جمہوریہ اب تک پہنچ چکی ہے۔