ملائیشیا میں تارکین وطن کی درجنوں اجتماعی قبروں کی دریافت

کوالالمپور سے ملنے والی نیوز ایجنسی اے ایف پی کی رپورٹوں کے مطابق ملائیشیا کے وزیر داخلہ زاہد حامدی کے ایک بیان کا حوالہ دیتے ہوئے ملکی اخبار ’دا سٹار‘ نے آج اتوار 24 مئی کے روز اپنی آن لائن اشاعت میں بتایا کہ یہ بہت سی اجتماعی قبریں ملائیشیا کے تھائی لینڈ کے ساتھ سرحدی علاقے کے ساتھ ساتھ ملی ہیں۔ وزیر داخلہ نے کہا، ‘‘ہمیں ابھی تک یہ اندازہ نہیں ہے کہ ان اجتماعی قبروں میں کتنے لوگوں کو دفن کیا گیا۔ خدشہ ہے کہ ہمیں وہاں سے مزید لاشیں ملیں گی۔‘‘

اسی دوران ملائیشیا کے ملائے زبان کے اخبار ’اُوتوسان ملائیشیا‘ نے اپنی آج کی اشاعت میں بغیر نام لیے قابل اعتماد ذرائع کا حوالہ دیتے ہوئے لکھا کہ ان اجتماعی ’قبروں کی تعداد 30 تک بنتی ہے اور ان میں سینکڑوں انسانی ڈھانچے‘ پائے گئے ہیں۔

اسی طرح باخبر ذرائع کا ذکر کرتے ہوئے انگریزی روزنامہ ’دا سٹار‘ نے لکھا ہے کہ حکام کو یقین ہے کہ ان قبروں میں 100 کے قریب روہنگیا مسلمانوں کو دفن کیا گیا تھا۔ روہنگیا میانمار میں آباد اس مسلم نسلی اقلیت کا نام ہے، جس سے تعلق رکھنے والے ہزاروں افراد اس وقت غیر قانونی تارکین وطن کے طور پر جنوب مشرقی ایشیا کے سمندری پانیوں میں ٹوٹی پھوٹی کشتیوں پر سوار علاقے کی ریاستوں میں اپنے لیے پناہ کی خاطر بھٹک رہے ہیں۔ روہنگیا مسلمانوں کی طرف سے ماضی میں انسانوں کی اسمگلنگ کرنے والے جرائم پیشہ گروہوں کی مدد سے زمینی راستوں سے مختلف ملکوں میں غیر قانونی طور پر داخلے کی کوشش کے بہت سے واقعات بھی دیکھے گئے ہیں۔

اے ایف پی نے ملائیشیا کے حکام کے حوالے سے بتایا ہے کہ یہ اجتماعی قبریں ملائیشیا کے صوبے Perlis میں تھائی سرحد کے قریب دو قصبوں پاڈانگ بِیسار اور وانگ کِیلیان میں دریافت ہوئی ہیں۔ قبل ازیں اسی مہینے تھائی پولیس کی طرف سے بھی کہا گیا تھا کہ ملائیشیا کے ساتھ سرحد کے قریب تھائی لینڈ کے ریاستی علاقے میں حکام کو مختلف سابقہ جنگلاتی کیمپوں سے درجنوں کی تعداد میں ایسی قبریں ملی تھیں، جن میں ٹریفکنگ کی کوشش کے دوران موت کے منہ میں چلے جانے والے غیر قانونی روہنگیا اور بنگلہ دیشی تارکین وطن کی جسمانی باقیات کی موجودگی کا خدشہ ظاہر کیا گیا تھا۔

ملائیشیا کی پولیس نے ممکنہ طور پر غیر قانونی تارکین وطن کی ان اجتماعی قبروں کے بارے میں کوئی بھی تفصیلات جاری کرنے سے انکار کر دیا ہے۔ پولیس کی ایک ترجمان نے تاہم بتایا کہ ملائیشیا کی نیشنل پولیس کے سربراہ اس بارے میں تفصیلات پیر 26 مئی کے روز ایک پریس کانفرنس میں بتائیں گے۔

کوالالمپور حکومت کی طرف سے ما‌ضی میں اس امر کی ہمیشہ تردید کی جاتی رہی ہے کہ ملائیشیا کی سرزمین پر کبھی غیر قانونی تارکین وطن یا ’غلاموں‘ کی سی حالت میں زندگی گزارنے والے افراد کے کوئی کیمپ یا ان کی اجتماعی قبریں موجود رہی ہیں۔

اس بارے میں ملائیشیا کے انگریزی روزنامے ’دا سٹار‘ نے آج لکھا ہے کہ ملکی وزیر داخلہ زاہد حامدی نے کہا، ’’مجھے ان قبروں کے بارے میں سن کر بہت دھچکا پہنچا ہے۔‘‘ ساتھ ہی انہوں نے یہ بھی کہا کہ ہو سکتا ہے کہ سرحدی علاقے میں ایسے غیر قانونی تارکین وطن کے کیمپ وہاں چار پانچ سال پہلے سے قائم ہوں اور ان جرائم میں ملائیشیا کے شہری بھی ملوث رہے ہوں۔