مقتول رہنما کا سوگ، ماسکو میں ہزاروں شہریوں کا مارچ

اتوار کے روز مظاہرین کریملن کے قریب واقع اس پل کے قریب جمع ہوئے، جہاں جمعے کو ایک مسلح شخص نے اس سینیئر اپوزیشن رہنما کو چار گولیاں ماری تھیں۔ ان مظاہرین نے جائے واقعہ پر پھول نچھاور کیے۔ اس موقع پر مظاہرین نے مقتول رہنما کو خراج عقیدت پیش کرنے کے لیے روسی پرچم سیاہ پٹیوں کے ساتھ لپیٹ رکھے تھے۔ اس مارچ میں کچھ افراد نے نیمسوف کی تصاویر اٹھا رکھیں تھیں، جب کہ کچھ نے وہ پلے کارڈز بھی اٹھائے ہوئے تھے، جن پر تحریر تھا، ان کا ’قاتل پروپیگنڈا ہے‘۔

خیال رہے کہ اتوار کے روز اس ریلی کی کال دینے والوں میں نیمسوف بھی شامل تھے اور اصل میں یہ مارچ روسی صدر ولادیمر پوٹن کی پالیسیوں کے خلاف ہونا تھا، تاہم جمعے کے روز نیمسوف کی ہلاکت کے بعد اس مظاہرے میں لوگوں کی شرکت کی ایک وجہ اس رہنما کو خراج عقیدت پیش کرنا بھی ہے۔ ابتدا میں شہری حکومت نے بھی اس ریلی کی اجازت نہیں دی تھی، تاہم نیمسوف کے قتل کے بعد شہر کے مرکز میں اس مارچ کی اجازت دے دی گئی۔

اس مارچ کی سب سے پہلے کال نیمسوف کے اپوزیشن ساتھی ایلکسی ناوالنی نے دی تھی، تاہم انہیں غیرقانونی طور پر پمفلٹ تقسیم کرنے پر پندرہ روز کی قید سنا دی گئی تھی۔ وہ بھی اپنی قید کی وجہ سے اس مارچ میں شریک نہیں ہو سکے۔

خیال رہے کہ نیمسوف نے سن 1990ء کی دہائی میں نائب وزیراعظم کے طور پر خدمات انجام دیں تھی، تاہم وہ سن 2000 میں صدر پوٹن کے برسراقتدار آنے کے بعد سے روسی صدر پوٹن کے شدید مخالف اور ناقد رہے ہیں۔ صدر پوٹن کے دورِ اقتدار میں کسی اتنے سینیئر سیاست دان کی ہلاک کا بھی یہ پہلا واقعہ ہے۔

صرف صدر پوٹن کو جواب دہ روسی تفتیشی کمیٹی نے ہفتے کے روز کہا تھا کہ اس واقعے کے درپردہ ذمہ دار خود اپوزیشن ارکان بھی ہو سکتے ہیں، جو ملک کو غیرمستحکم کرنا چاہتے ہیں۔ صدر پوٹن کے ایک ترجمان نے بھی کہا ہے کہ یہ جرم اشتعال انگیزی کا واقعہ ہو سکتا ہے۔

روسی تفتیشی کمیٹی نے اس واقعے کے درپردہ ممکنہ طور پر اسلامی شدت پسندی کے عنصر کا حوالہ دیتے ہوئے کہا ہے کہ نیمسوف پر حملہ ان کی جانب سے فرانسیسی اخبار شارلی ہیبدو پر حملے کی بھرپور مذمت کا ردعمل بھی ہو سکتا ہے۔