مصری فوجیوں پر حملے میں غیر ملکی عناصر کا ہاتھ ہے: السیسی

ان کا یہ اعلان گزشتہ روز مصری فوج پر ہونے والے اُن دو حملوں کے بعد سامنے آیا ہے جن کے نتیجے میں 30 مصری فوجی جاں بحق ہو گئے۔

السیسی نے آج ٹیلی وژن پر نشر ہونے والے ایک بیان میں کہا،"غزہ پٹی کے ساتھ واقع سرحدی علاقوں میں دہشت گردی کا مقابلہ کرنے کے لیے بنیادی نوعیت کے اقدامات کیے جائیں گے"۔ تاہم مصری صدر نے ان اقدامات کی تفصیلات پر روشنی نہیں ڈالی۔

رفاہ سرحدی کراسنگ غزہ کا وہ واحد سرحدی راستہ ہے، جو اسرائیل کے کنٹرول میں نہیں ہے۔ قاہرہ حکومت نے رفاہ بارڈر کو غیر معینہ مدت کے لیے بند کر دیا ہے۔

مصری فوج گزشتہ چند ماہ کے دوران غزہ کے اسلام پسندوں کے کنٹرول والی رفاہ سرحد پر متعدد غیر قانونی سرنگیں تباہ کر چُکی ہے اور اسے عسکریت پسندوں کے خلاف فوجی آپریشن کا حصہ قرار دیا جا رہا ہے۔ ان سرنگوں کے ذریعے مصری علاقے جزیرہ نما سینائی سے غزہ تک ہتھیار اور دیگر ساز وسامان اسمگل کیا جاتا تھا اور یہ سرنگیں فلسطینی گروپ حماس کے کنٹرول میں تھیں، جسے مصر کی اخوان المسلمون کی ایک شاخ سمجھا جاتا ہے۔ مصری حکومت اور حماس کے تعلقات گزشتہ برس اُس وقت سے کشیدہ ہونا شروع ہو گئے تھے، جب السیسی کی قیادت والی مصری فوج نے اخوان المسلمون کے ایک سینیئر لیڈر اور ملکی صدر محمد مُرسی کو برطرف کر دیا تھا۔

السیسی نے گزشتہ روز شمالی سینائی میں مصری فوجیوں پر ہونے والے خود کُش بم حملے کے بارے میں کہا تھا کہ اُس میں غیر ملکی طاقتوں کا ہاتھ ہے۔ فوجی کمانڈروں کے ساتھ ایک ہنگامی اجلاس میں السیسی نے کہا ، "دہشت گردانہ کارروائیوں کا مقصد ریاست مصر کو پسپا کرنے کی کوشش کرنا ہے"۔

جزيرہ نما سينائی ميں گذشتہ روز ہونے والے خونرير حملوں کے بعد دارالحکومت قاہرہ ميں صدارتی دفتر سے جاری کردہ ايک بيان کے مطابق آج بروز ہفتہ عالمی وقت کے مطابق صبح تين بجے سے جزيرہ نما سينائی ميں ايمرجنسی نافذ کر دی گئی ہے۔ بيان ميں مزيد کہا گیا کہ شہريوں کی جانوں کی حفاظت اور دہشت گردی سے متعلق خطرات سے نمٹنے کے ليے فوج اور پوليس ہر ممکن اقدامات کرے گی۔

جمعہ چوبيس اکتوبر کو دو مختلف حملوں کے کیے گئے، جن ميں تيس سے زائد سکيورٹی اہلکار ہلاک ہوئے۔ مصر ميں گذشتہ برس اسلام پسند پارٹی اخوان المسلمون کے صدر محمد مرسی کی معزولی کے بعد سے ان حملوں کو رياست مخالف سب سے بڑے اور خونريز حملے قرار ديا گیا ہے۔

ذرائع کے مطابق پہلا کار حملہ غزہ پٹی کے قريب العریش کے شمال مغرب ميں واقع الخاروبيہ کے علاقے ميں کيا گيا، جس ميں ايک عسکری تنصيب کے قريب دو مسلح گاڑيوں کو نشانہ بنايا گيا۔ اس حملے ميں کم از کم تيس افراد ہلاک اور پچيس کے قريب زخمی ہوئے۔ حکام کا کہنا ہے کہ ہلاکتوں کی بڑی تعداد کی وجہ يہ ہو سکتی ہے کہ مسلح گاڑياں اسلحے سے ليس تھيں، جن کے پھٹنے کی وجہ سے زيادہ نقصان ہوا۔ بعد ازاں ہلاک شدگان اور زخميوں کو ملٹری ہيلی کاپٹروں کے ذريعے قاہرہ کے ہسپتالوں تک پہنچايا گيا۔ اطلاعات ہيں کہ اس حملے ميں فوج کے چند اعلی افسران بھی ہلاک ہوئے ہيں۔