مرغیوں اور مویشیوں میں اینٹی بائیوٹک ادویات کا استعمال

امریکا میں پولٹری مصنوعات کے سب سے بڑے ادارے ٹائسن فوڈز نے اعلان کیا ہے کہ وہ ستمبر سن 2017 سے ایسی اینٹی بائیوٹک ادویات کے استعمال کو مکمل طور پر ترک کر دے گا، جو انسانوں کو کسی بیماری کی صورت میں تجویز کی جاتی ہیں۔ یہ ادارہ سن 2011 سے اپنے فارموں پر جانوروں کے لیے اینٹی بائیوٹک کے استعمال میں کمی لا چکا ہے۔ تجزیہ کاروں کے مطابق کسی بھی امریکی کمپنی کی جانب سے ایسا ہدف بنانا ایک انتہائی حیران کن فیصلہ ہے۔ امریکی فوڈ کمپنی ٹائس فوڈز امریکی ریاست ارکنساس میں قائم ہے۔

امریکی کمپنی نے اعلان کبا ہے کہ وہ ایسیے تجربات کا سلسلہ جاری رکھے ہوئے ہے، جس کے کامیاب نتائج سے پولٹری اور لائیو اسٹاک فارم پر زندہ پرندوں اور مویشیوں کے لیے انسانی استعمال کی اینٹی بائیوٹک ادویات کو ترک کر دیا جائے گا۔ ادارے کے مطابق پروٹین سے متعلق تمام کاروباروں میں کسی بھی قسم کی اینٹی بائیوٹک میڈیسن استعمال نہیں کی جائے گی۔ امریکی خوراک ساز ادارے کا کہنا ہے کہ وہ ایک ایسے ورکنگ گروپ کی تشکیل میں مصروف ہے، جس میں کسانوں کے علاوہ سپلائرز، مویشیوں کے ڈاکٹرز اور ماہرِ حیوانیات شامل ہیں۔ ان کی ہمراہ ایسی ادویات کی تیاری کی جائے گی، جو اگلے دو برسوں میں ہیومن اینٹی بائیوٹک کا متبادل بن سکیں گی۔

ٹائسن فوڈز کا اعلان میکڈانلڈ کے اُس اعلان کے پہلو میں ہے، جس میں کہا گیا ہے کہ وہ اگلے دو برسوں کے دوران امریکا میں بتدریج اُس مرغی کے گوشت کی خرید میں کمی لائے گا، جس میں ہیومن اینٹی بائیوٹک استعمال کیا گیا ہو گا۔ میکڈانلڈ کو ٹائسن کی جانب سے مرغی کے گوشت کی فراہمی کی جاتی ہے۔ اینٹی بائیوٹک کو بتدریج ختم کرنے کے حوالے سے ٹائسن ادارے کا کہنا ہے کہ وہ اپنے پولٹری اور لائیواسٹاک میں اینٹی بائیوٹک کے استعمال کو اگلے دو برسوں میں صرف ایک ادارے کے لیے ختم نہیں کر رہا ہے بلکہ یہ اُس کے تمام صارفین کے فائدے میں ہے۔

مبصرین کے مطابق ٹائسن فوڈز کا تازہ فیصلہ اصل میں اُس مہم کے تناظر میں ہے کہ لائیواسٹاک اور پولٹری میں بیمار انسانوں کو دی جانے والی اینٹی بائیوٹک ادویات کو روک دیا جائے۔ طبی حلقوں کا خیال ہے کہ اگر پرندوں اور مویشیوں کو اینٹی بائیوٹک دینے سے انسانوں میں اینٹی بائیوٹک سے پیدا ہونے والی مدافعت میں کمی رونما ہونے لگی تو انسانوں میں صحت کا ایک بہت بڑا بحران جنم لے سکتا ہے۔ یہ امر اہم ہے کہ پولٹری اور مویشیوں میں اینٹی بائیوٹک ادویات کا استعمال قانوناً جائز ہے۔