مردہ پیدا ہونے والے بچے میڈیکل لانڈری پہنچا دیے گئے

امریکی نیوز ایجنسی ایسوسی ایٹڈ پریس کی بدھ چار مارچ کے روز لاس ویگاس سے ملنے والی رپورٹوں میں بتایا گیا ہے کہ ہسپتال سے آنے والے گندوں کپڑوں میں شامل چادروں میں لپٹی حمل کی مدت پوری ہونے سے قبل ہی رحم مادر میں انتقال کر جانے والے دو بچوں کی لاشیں دیکھ کر متعلقہ لانڈری کے کارکن شدید دھچکے کی کیفیت میں آ گئے، جس پر فی الفور شہر کی پولیس کا اطلاع کر دی گئی۔

ایسوسی ایٹڈ پریس کے مطابق یہ دونوں مردہ انسانی جنین شہر کے اسپرنگ ویلی ہسپتال سے کل منگل کے روز شہر کے مضافات میں ہینڈرسن کے مقام پر واقع میڈیکل لانڈری کمپنی ’انجیلیکا‘ پہنچے تھے۔

ہینڈرسن پولیس کی ایک خاتون ترجمان کے مطابق پولیس اہلکاروں نے اس لانڈری میں پہنچ کر جو چھان بین کی، اس کے نتیجے میں واضح ہو گیا کہ یہ واقعہ اسپرنگ ویلی ہسپتال کے عملے کی غلطی کا نتیجہ تھا اور اس میں کسی مشکوک مجرمانہ کارروائی کا کوئی اندیشہ نہیں تھا۔

لاس ویگاس کے اس ہسپتال کی ایک ترجمان نے بتایا کہ یہ دونوں مردہ بچے ایک ایسی خاتون کے تھے جو کل ہی ایک ایمبولینس کے ذریعے ہسپتال پہنچی تھی اور جسے اس کے بقول حادثاتی طور پر اسقاط حمل کا سامنا کرنا پڑ گیا تھا۔ ہسپتال کی ترجمان کے بقول جب اس مریضہ کو اسپرنگ ویلی ہسپتال لایا گیا، تو دونوں مردہ جنین چادروں میں لپٹے اس کے ساتھ ہی ایمرجنسی میں لائے گئے تھے۔ ہسپتال کی ترجمان گریچن پاپیز کے مطابق یہ پتہ چلانے کی کوشش کی جا رہی ہے کہ یہ غلطی کس طرح ہوئی اور دونوں مردہ جنین میڈیکل لانڈری کمپنی پہنچ گئے۔ ’’یہ دونوں مردہ جنین فوری طور پر لانڈری سے واپس ہسپتال پہنچا دیے گئے اور اس سلسلے میں ہسپتال کی انتظامیہ مریضہ کے اہل خانہ کے ساتھ رابطے میں ہے۔‘‘