مرد اور خواتین ایک سے کام نہیں کر سکتے، ترک صدر ایردوآن

میڈیا رپورٹوں کے مطابق صدر رجب طیب ایردوآن نے یہ باتیں خواتین کے لیے انصاف کے موضوع پر ایک کانفرنس سے خطاب کرتے ہوئے کہیں۔ ترکی میں موجودہ صدر اور ملکی حکومت کا تعلق اسلام کی طرف جھکاؤ رکھنے والی ایک ہی سیاسی جماعت سے ہے۔ اسلامی احکامات پر عمل کرنے والے ایردوآن صدر بننے سے پہلے طویل عرصے تک ملکی وزیر اعظم رہے تھے۔

نیوز ایجنسی اے ایف پی نے اپنی رپورٹوں میں لکھا ہے کہ استنبول میں ایک کانفرنس سے اپنے خطاب میں صدر ایردوآن نے آج پیر کے روز کہا کہ مردوں اور خواتین کے درمیان حیاتیاتی فرق کا مطلب یہ ہے کہ اپنی اپنی زندگی میں دونوں ایک ہی طرح کے فرائض انجام نہیں دے سکتے۔

رجب طیب ایردوآن کانفرنس کے جن شرکاء سے خطاب کر رہے تھے، ان میں ان کی اپنی بیٹی سمیہ بھی شامل تھی۔ ایردوآن نے کہا، ’’ہمارے مذہب اسلام نے معاشرے میں خواتین کے لیے ایک پوزیشن واضح کر دی ہے، اس کا تعلق مامتا سے ہے۔‘‘

رجب طیب ایردوآن نے کہا کہ کچھ لوگ یہ بات سمجھ سکتے ہیں لیکن کچھ یہ بات سمجھنے سے قاصر ہیں۔ ’’آپ یہ بات حقوق نسواں کا نعرہ لگانے والوں کو نہیں سمجھا سکتے، کیونکہ وہ مامتا کے نظریے کو تسلیم نہیں کرتے۔‘‘

ترک صدر نے کانفرنس سے خطاب کرتے ہوئے کہا، ’’میں اپنی والدہ کے پاؤں چومتا تھا۔ مجھے ان میں سے جنت کی خوشبو آتی تھی۔ وہ مجھے خاموشی سے دیکھتی تھیں اور کبھی کبھی رو پڑتی تھیں۔ ماں کی مامتا بالکل مختلف شے ہے۔‘‘

رجب طیب ایردوآن نے اپنی تقریر میں مزید کہا کہ مردوں اور خواتین کے ساتھ بالکل ایک سا برتاؤ کیا ہی نہیں جا سکتا۔ ایسا کرنا ’انسانی فطرت کے خلاف‘ ہو گا۔ انہوں نے کہا، ’’خواتین کا کردار، عادتیں اور جسمانی ساخت مختلف ہوتے ہیں۔ آپ کسی ایسی ماں کو، جو اپنے بچے کو اپنا دودھ پلاتی ہو، کسی مرد کے برابر کھڑا نہیں کر سکتے۔‘‘

انہوں نے مزید کہا، ’’آپ خواتین کو ہر وہ کام کرنے کے لیے نہیں کہہ سکتے، جو مرد کر سکتے ہیں، جیسا کہ کمیونسٹ نظام والی حکومتوں میں دیکھنے میں آتا تھا۔ آپ خواتین کو یہ نہیں کہہ سکتے کہ وہ باہر جا کر زمین کھودنا شروع کر دیں۔ یہ ان کی نازک فطرت کے منافی ہے۔‘‘

یہ بیان دیتے ہوئے رجب طیب ایردوآن بظاہر دوسری عالمی جنگ کے دوران اور بعد کے برسوں میں سوویت یونین اور دیگر کمیونسٹ ریاستوں میں عام نظر آنے والے ان حالات کا حوالہ دے رہے تھے کہ تب خواتین کو فیکٹریوں اور دیگر شعبوں میں اسی طرح کا بھاری جسمانی کام کرنے کے لیے کہا جاتا تھا، جیسا کہ مرد کرتے تھے۔

ترکی میں ایردوآن کی اسلامی نظریات کی حامل سیاسی جماعت پر اس کے ناقدین کی طرف سے طویل عرصے سے یہ الزام لگایا جاتا ہے کہ وہ ترک معاشرے کے سیکولر اصولوں کا خاتمہ چاہتی ہے اور اس کی مبینہ طور پر یہ کوشش بھی ہے کہ ترکی میں خواتین کے شہری حقوق کو محدود کر دیا جائے۔