’لکڑی‘ جوڑوں کی سُوجن کے لیے مفید

ایک تازہ ریسرچ سے معلوم ہوا ہے کہ عمر رسیدگی کے دوران جوڑوں کا ورم یا سوجن کا علاج ایسی لکڑی کے ٹکڑوں میں موجود ہے جو ٹوٹی ہوئی ہڈیوں کی سرجری کے دوران استعمال میں لائی جاتی ہے۔ ٹانگ یا بازو کی ٹوٹی ہڈی کو سیدھا رکھنے کے لیے بعض اوقات معالجین لچکدار لکڑی کو استعمال کرتے ہیں۔ جراحتی عمل میں استعمال ہونے والی اِس لکڑی کو انگریزی میں اسپلنٹ (Splint) یا اُردو میں کھپچی کہا جاتا ہے۔ بھارت اور پاکستان میں مستعمل قدیمی طریقہٴ جراحت کے دوران بھی جراح ایسی کھپچیاں استعمال کیا کرتے تھے، جو عموماً بید، آم یا بانس کی لکڑی سے بنی ہوتی تھیں۔

برطانیہ کی معتبر آکسفورڈ یونیورسٹی کے جوڑوں کے وَرم یا آرتھرائٹس (Arthritis) کے مرض پر تحقیق کرنے والے قومی مرکز(Arthritis Research UK Centre for Osteoarthritis Pathogenesis) میں جوڑوں کے مرض (Osteoarthritis) کی ماہر ڈاکٹر فی اونا واٹ کا کہنا ہے کہ رات کو سونے سے قبل جوڑوں کے درد والے مقام پر اسپلنٹ یا کھپچی باندھ دی جائے تو درد کی شدت میں کمی واقع ہو جاتی ہے۔ ڈاکٹر واٹ کے مطابق یہ ایک انتہائی سستا علاج ہے اور اس کے مثبت اثرات ظاہر ہوئے ہیں۔ ڈاکٹر واٹ نے مریضوں کے لیے لچکدار اسپلنٹس کا استعمال نہیں کیا بلکہ وہ کھپچیاں استعمال کی گئیں جو خاصی سخت لکڑی کی تھیں۔

ڈاکٹر فی اونا واٹ اور اُن کی ٹیم نے آرتھرائٹس کے مریضوں پر رات کے دوران روایتی کھپچیوں کو درد کے مقام پر رکھ کر پٹی سے باندھ دیا۔ یہ آزمائشی عمل یونیورسٹی کے لندن کلینک میں مکمل کیا گیا۔ اسپلنٹس کے استعمال کے لیے خاص طور ایسے مریضوں کا انتخاب کیا گیا تھا، جن کو جوڑوں کی سُوجن سے شدید درد کا سامنا ہونے کے علاوہ بڑھاپے میں درد اور ورم سے جوڑوں میں تبدیلی پیدا ہونے کا بھی مرض لاحق تھا۔ ان کی عمریں 55 سے 70 برس کے درمیان تھیں۔ ڈاکٹر واٹ نے اپنی رپورٹ میں لکھا کہ اس عمل سے مریضوں کو افاقہ ہونے کے علاوہ تبدیل ہوتے جوڑوں کے عمل میں رکاوٹ بھی پیدا ہوئی۔

اِس سے پہلے بھی اسپلنٹس کے استعمال سے متعلق تحقیقی رپورٹس سامنے آئی ہیں لیکن اُن میں اِن کے کُلی طور پر مفید ہونے کا اظہار نہیں کیا گیا تھا۔ ڈاکٹر واٹ کے ٹیسٹ کے نتائج 74 فیصد تک مثبت ظاہر ہوئے ہیں۔ آزمائشی مرحلے میں مریضوں کو تین ماہ تک مسلسل اسپلنٹس باندھی گئی اور جب مقررہ عرصے کے بعد ان کو اسپلنٹس سے آزاد کر دیا گیا تو اُن کے درد میں واضح فرق پیدا ہو چکا تھا۔ وہ جوڑ جن پر اسپلنٹس نہیں باندھی گئی تھیں وہاں درد کی شدت برقرار رہی۔

ڈاکٹر واٹ کے مطابق تین ماہ کے آزمائشی مرحلے کے بعد بھی اِن مریضوں کو اگلے تین ماہ تک درد میں خاصا افاقہ رہا۔ تجرباتی مرحلے کے بعد 61 فیصد مریضوں نے اسپلنٹس یا کھپچیوں کے استعمال کو ترجیح دی۔ ڈاکٹر فی اونا واٹ کی ریسرچ جوڑوں کے درد سے متعلق طبی جریدے جرنل ریومیٹالوجی میں شائع ہوئی ہے۔