لارج ہائیڈرون کولائیڈر اگلے برس دوبارہ کام شروع کر دے گا

یورپی جوہری تحقیق کی ایجنسی سیرن کا لارج ہائیڈرون کولائیڈر اگلے برس مارچ میں دوبارہ کام شروع کر دے گا اور آغاز کے چند ہفتوں بعد ایک مرتبہ پھر ذرات کی ذرات سے ٹکراؤ کی سرگرمی بحال کر دی جائے گی۔ اس تحقیق کے ذریعے کائنات کی ابتدا اور بگ بینگ یا عظیم دھماکے کے بعد پیدا ہونے والے ذرات کی ماہیت اور نوعیت کا مطالعہ کیا جاتا ہے۔

سوئٹزرلینڈ کے شہر جنیوا کے قریب واقع دنیا کے اس سب سے بڑے پارٹیکل کولائیڈر یا ذرات کو ٹکرانے والی تجربہ گاہ گزشتہ دو برس سے جدیدیت اور آلات کو زیادہ طاقت ور بنانے کے عمل سے گزر رہی تھی۔ یورپی تنظیم برائے جوہری تحقیق (سیرن) کی جانب سے ایک بیان میں کہا تھا کہ اس زیر زمین سرنگ میں پروٹان کی بیم مارچ میں دوڑنے لگے گی اور مئی میں ان پروٹانوں کو آپس میں ٹکرانے کا کام شروع ہو جائے گا۔

سیرن کے ڈائریکٹر جنرل رولف ہوئیر کی جانب سے جاری کردہ بیان میں بتایا گیا ہے، ’توانائی کی نئی سطح کے ساتھ یہ کولائیڈر طبیعات میں نئی جہتوں کا تعین اور مستقبل کی ایجادات کا باعث ہو گا۔ میں یہ دیکھنے کو مشتاق ہوں کہ فطرت نے ہمارے جاننے کے لیے کیا کچھ رکھا ہے۔‘

واضح رہے کہ 27 کلومیٹر طویل اس زیرزمین سرنگ میں مشین کو ایک اعشاریہ نو ڈگری سینٹی گریڈ کے درجہ حرارت پر پہنچا دیا گیا ہے اور اب یہ اگلے تین برس تک کام کرتی رہی گی۔

سن 2012ء میں اسی کولائیڈر کے ذریعے جدید سائنس کی ایک عظیم دریافت ہگز بوسون سامنے آئی تھی، جس سے یہ معلوم ہوا تھا کہ ذرات میں کمیت کا باعث بننے والی فیلڈ ہِگز کیسے کام کرتی ہے، جو ذرات کو کمیت دے کر انہیں ستاروں اور سیاروں کی پیدائش کا باعث بناتی ہے۔

اس دریافت کو طبعیات میں ایک سنگ میل کی حیثیت حاصل ہے، تاہم اب بھی بے شمار سوالات باقی ہیں، جن کا جواب ڈھونڈا جانا ہے اور ان میں سب سے اہم سوالات ڈارک میٹر یا سیاہ مادہ اور ڈارک انرجی یا سیاہ توانائی کی ماہیت کو سمجھنا شامل ہے۔ سائنس دانوں کا خیال ہے کہ مادہ اس کائنات کا زیادہ سے زیادہ چار فیصد ہے جب کہ باقی کائنات اصل میں ڈارک میٹر اور ڈارک انرجی پر مشتمل ہے۔ جدید اعداد و شمار کے مطابق کائنات کا 27 فیصد حصہ ڈارک میٹر اور 68 فیصد حصہ ڈارک انرجی سے بنا ہے۔

اس کے علاوہ اس تجربہ گاہ میں یہ جاننے کی کوشش بھی کی جا رہی ہے کہ 13 اعشاریہ آٹھ ارب برس قبل بگ بینگ کے ذریعے تخلیق پانے والے میٹر یا مادہ اور اینٹی میٹر یا ردِ مادہ کی ایک جتنی مقدار پیدا ہوئی تھی، تاہم آیا یہ ردمادہ ختم ہو گیا، یا ذرات کی کسی اور شکل میں موجود ہے۔

متعدد سائنس دان سپر سیمٹری کے نظریے کے حامی ہیں، تاہم ابھی اس نظریے کی توثیق ہونا باقی ہے کہ جس میں پیشن گوئی کی گئی ہے کہ ہر ذرے کا ایک بھاری مگر نظر نہ آنے والا ’سپر‘ پارٹنر موجود ہے۔

تاہم ان سوالات کے جوابات ڈھونڈنے اور کہکشاں کی ماہیت کے اصل اندازے کے لیے سیرن کو زیادہ توانائی سے ان ذرات کے ٹکراؤ کی ضرورت تھی، جسے اب ان نئے اور جدید آلات کے ذریعے پورا کرنے کی کوشش کی گئی ہے۔