فینکس: مسجد کے باہر احتجاج میں پیغمبر اسلام کے متنازعہ خاکے

نیوز ایجنسی روئٹرز کے مطابق جمعے کے روز ہونے والا یہ احتجاج ٹیکساس میں ہونے والے اسی طرح کے متنازعہ خاکے بنانے کے اُس مقابلے کے چند ہفتے بعد کیا جا رہا ہے، جس پر دو مسلح افراد نے حملہ کر دیا تھا۔

بتایا گیا ہے کہ یہ احتجاج اسلامک سینٹر آف فینکس کے باہر مغرب کی نماز کے وقت کیا جائے گا۔ بہت سے مسلمان اس طرح سے پیغمبر کے خاکے بنانے کو اُن کی توہین کے مترادف گردانتے ہیں۔

فینکس پولیس کے سارجنٹ ٹرینٹ کرمپ نے صحافیوں کی جانب سے سوالات کے جواب میں اپنی ایک ای میل میں بتایا:’’اس طرح کی سرگرمی سے نمٹنا ایک چیلنج ہے، جس کا سامنا ملک بھر میں امن عامہ برقرار رکھنے والی ایجنسیوں کو کرنا پڑ رہا ہے۔‘‘

اس ای میل میں مزید کہا گیا ہے:’’مظاہرین اور ایک دوسرے سے متضاد نقطہ ہائے نظر سے نمٹنا اتنا مشکل نہیں ہے۔ ہمارا ہدف اور اصل چیلنج اُن غیر قانونی سرگرمیوں کا ادراک کرنا ہے، جو اس طرح کے مواقع پر عمل میں آ سکتی ہیں۔‘‘

روئٹرز کے مطابق حالیہ چند مہینوں کے دوران یہ بات ثابت ہوئی ہے کہ جہاں کہیں بھی پیغمبرِ اسلام کے خاکے بنائے جاتے ہیں اور پھر انعامات وغیرہ کی تقاریب منعقد کی جاتی ہیں تو ایسے مواقع پر تشدد کے امکانات میں بے پناہ اضافہ ہو جاتا ہے۔

واضح رہے کہ اس سال جنوری میں طنزیہ اور مزاحیہ تحریروں اور خاکوں پر مشتمل فرانسیسی جریدے شارلی ایبڈو کے پیرس میں واقع دفتر پر مسلح افراد کے ایک حملے میں بارہ اشخاص ہلاک ہو گئے تھے۔ یہ حملہ اس جریدے کی جانب سے پیغمبرِ اسلام کے خاکے شائع کرنے کے خلاف انتقامی کارروائی کے طور پر کیا گیا تھا۔

ابھی مئی کے اوائل میں امریکی شہر دالاس کے نواحی شہر گارلینڈ میں کیے جانے والے اسی طرح کے ایک حملے کو ناکام بنا دیا گیا تھا۔ تب دو حملہ آوروں نے اُس جگہ فائرنگ شروع کر دی تھی، جہاں اندر پیغمبرِ اسلام کے متنازعہ خاکوں کی ایک نمائش ہو رہی تھی۔ مبینہ طور پر دہشت گرد گروپ ’اسلامک اسٹیٹ‘ سے تعلق رکھنے والے یہ حملہ آور کسی کو گزند پہنچانے میں ناکام رہے تھے البتہ پولیس نے ان دونوں کو گولی مار کر ہلاک کر دیا تھا۔

یہ دونوں حملہ آور باقاعدگی سے فینکس کی اسی مسجد میں جایا کرتے تھے، جس کے باہر آج احتجاج کیا جانے والا ہے اور جہاں احتجاج ہی کے طور پر مختلف لوگ پیغمبر کے خاکے بھی بنائیں گے۔ اس احتجاجی مظاہرے کے منتظمین نے فیس بُک پر کہا ہے کہ وہ یہ احتجاج تین مئی کے اُسی حملے کے جواب میں کر رہے ہیں۔

فینکس کے میئر گریگ سٹینٹن نے کہا کہ اُن کے خیال میں یہ احتجاجی مظاہرہ کوئی ’اچھی چیز نہیں‘ ہے لیکن یہ کہ انہوں نے پھر بھی اس کے انعقاد کی اجازت دے دی ہے۔ امریکی نشریاتی ادارے سی این این سے باتیں کرتے ےہوئے سٹینٹن نے کہا:’’یہ کوئی اچھا خیال نہیں ہے۔ کاش کہ یہ اجتماع یہاں میرے شہر میں نہ ہو رہا ہوتا لیکن بطور میئر میں اس شہر کے باسیوں کے لیے اپنی ذمے داریوں میں توازن پیدا کر سکتا ہوں۔‘‘

روئٹرز کے مطابق مزید تفصیلات کے لیے احتجاجی مظاہرے کے منتظمین یا پھر مسجد کے نمائندوں سے رابطے کی کوششیں کی گئیں لیکن کامیابی نہ ہو سکی۔ فیتنکس پولیس نے بھی احتجاج سے نمٹنے کے سلسلے میں اپنی خصوصی تیاریوں کی تفصیلات بتانے سے انکار کر دیا تھا۔