فیری حادثہ: ہلاکتوں میں اضافے کا خدشہ

اس مسافر بردار بحری جہاز کو حادثہ پیش آئے چوبیس گھنٹے سے زیادہ کا وقت گزر چکا ہے اور جیسے جیسے مزید وقت گزرتا جا رہا ہے، ویسے ویسے ہلاکتوں میں اضافے کا خدشہ بھی بڑھتا جا رہا ہے۔ سرچ آپریشن میں شریک ایک اہلکار نے نیوز ایجنسی اے پی کو بتایا ہے کہ ہلاکتوں میں تیزی سے اضافے کا خدشہ ہے۔ سرچ آپریشن میں ماہر غوطہ خوروں کو ہیلی کاپٹروں اور بحری جہازوں کا تعاون بھی حاصل ہے۔ گزشتہ رات بھی امدادی کارروائیاں جاری رہیں اور سرچ آپریشن کے دوران تیز روشنیوں کا استعمال کیا گیا۔ اس دوران 87 بحری جہاز اور اٹھارہ ایئر کرافٹس نے امدادی کاموں میں شرکت کی۔

ایسے امکانات ظاہر کیے گئے ہیں کہ لاپتہ افراد ممکنہ طور پر یا تو ڈوبنے والے بحری جہاز کے اندر موجود ہیں یا پھر وسیع پانیوں میں کہیں گم ہو چکے ہیں۔ ساحلی محافظوں کے ترجمان چو مان یونگ نے جمعرات کے دن بتایا ہے کہ سمندر کی سطح پر ایک بچے کی لاش ملی ہے۔ ایسی خبریں بھی موصول ہو رہی ہیں کہ شاید اب مزید کوئی بھی مسافر زندہ نہیں بچا ہو گا۔ جاپان میں بنائے گئے چھ ہزار586 ٹن وزنی اس مسافر بردار بحری جہاز کو پیش آنے والے حادثے کی وجوہات ابھی تک معلوم نہیں ہو سکی ہیں۔

حادثے کے وقت اس فیری پر کم ازکم 450 افراد سوار تھے، جن میں ایک ہائی اسکول کے تقریباﹰ 340 طالب علم بھی سوار تھے۔ یہ جہاز Incheon کی بندگارہ سے سیاحتی مقام جیجو جزیرے کی طرف جا رہا ہے۔ بتایا گیا ہے کہ اس جہاز کے کپتان اور عملے سے پوچھ گچھ کی جا رہی ہے۔ ایک سو چھیالیس میٹر طویل اس بحری جہاز میں نو سو مسافروں کی گنجائش تھی۔

امریکی بحریہ نے بھی امدادی کاموں میں تعاون کے لیے اپنا ایک خصوصی بحری جہاز روانہ کردیا ہے، جو جنوبی کوریائی حکام کو مدد فراہم کر رہا ہے۔ بتایا گیا ہے کہ نیوی کے غوطہ خور حادثے کا شکار ہونے والے بحری جہاز کی تین منزلوں میں تلاشی کا کام مکمل کر چکے ہیں لیکن انہیں اس دوران کوئی مسافر نہیں ملا۔ گزشتہ رات تیز ہواؤں اور دھند کی وجہ سے امدادی کاموں میں خلل بھی پڑا لیکن حکام نے بتایا ہے کہ وہ اس کڑے وقت میں ایک لمحہ بھی ضائع کیے بغیر جہاں تک ممکن ہے، اپنا آپریشن جاری رکھے ہوئے ہیں۔

ایک مسافر کم سیونگ موک نے میڈیا کو بتایا ہے کہ جہاز کے عملے کی طرف سے ریسکیو آپریشن بہتر نہیں تھا۔ انہوں نے کہا کہ سبھی کے پاس لائف جیکٹس موجود تھیں اور وقت بھی تھا لیکن عملے نے مسافروں کو پانی میں چھلانگ لگانے سے منع کر دیا تھا۔ ان کے بقول اگر مسافر کود جاتے تو انہیں بچایا جا سکتا تھا لیکن بہت سے لوگ جہاز کے اندر ہی پھنس کر رہ گئے۔ تاہم عملے کے ایک اہلکار اہو یونگ سیوک کے مطابق اچانک حادثے کے بعد جہاز ٹیڑھا ہو گیا تھا، جس کی وجہ سے فوری امدادی کارروائیاں متاثر ہوئیں۔

دوسری طرف جنوبی کوریا کی صدر پاک گن شہہ نے کہا ہے کہ وہ سرچ آپریشن ترک نہیں کریں گی اور مسافروں کو زندہ بچانے کے لیے تمام ممکن وسائل بروئے کار لائے جائیں گے۔ جنوبی کوریا میں 1993ء میں رونما ہونے والے ایک ایسے ہی حادثے میں 292 افراد ہلاک ہو گئے تھے۔