فرانس، نعرہ تکبیر کے ساتھ دوسرے روز بھی حملہ

خبر رساں ادارے روئٹرز نے فرانسیسی شہر ڈیژوں سے موصولہ اطلاعات کے حوالے سے بتایا ہے کہ اتوار کے دن رونما ہونے والے اس واقعے میں زخمی ہونے والوں میں سے دو شدید زخمی ہیں تاہم ان کی حالت خطرے سے باہر ہیں۔ راہگیروں نے کہا ہے کہ جب اس شخص نے گاڑی راہگیروں پر چڑھائی تو وہ اللہ اکبر کے نعرے بلند کر رہا تھا۔ تاہم پولیس نے اس مخصوص الزام کی تصدیق نہیں کی ہے۔

فرانسیسی وزارت داخلہ کی طرف سے بتایا گیا ہے کہ گاڑی پر سوار حملہ آور کی عمر تقریبا چالیس برس ہے اور اس نے نصف گھنٹے کے دوران پانچ مختلف مقامات پر راہگیروں کو نشانہ بنایا۔ بعدازاں پولیس نے اس شخص کو گرفتار کر کے پوچھ گچھ کا سلسلہ شروع کر دیا ہے۔ سرکاری بیان کے مطابق ابھی تک اس حملے کے محرکات معلوم نہیں ہو سکے ہیں۔

فرانسیسی شہرٹوئر میں ہفتے کے روز چاقو سے مسلح ایک حملہ آور نے بھی نعرہ تکبیر لگاتے ہوئے تین پولیس اہلکاروں کو زخمی کر دیا تھا۔ مسلسل دوسرے روز رونما ہونے والے اس پرتشدد واقعے کے تناظر میں فرانس بھر میں سکیورٹی ہائی الرٹ کر دی گئی ہے۔

یہ امر اہم ہے کہ فرانسیسی فوج عراق میں اسلامک اسٹیٹ کے خلاف جاری امریکی عسکری مہم کا حصہ ہے۔ اس تناظر میں جہادیوں نے اپنے حمایتیوں پر زور دیا ہے کہ وہ فرانس میں اپنے طور پر ہی حملے کریں۔

فرانسیسی وزارت داخلہ نے بتایا ہے کہ اتوار کے واقعے میں حملہ آور رینو کلیو نامی گاڑی پر سوار تھا اور 1990ء میں وہ مبینہ طور پر معمولی جرائم کا مرتکب ہونے کی وجہ سے پولیس کے ریکارڈ میں تھا۔ مزید کہا ہے گیا ہے کہ ڈیژوں اور ٹوئر کے واقعات میں کسی ربط پر بیان دینا قبل از وقت ہو گا۔ بتایا گیا ہے کہ اس حملے کا اسلامی انتہا پسندی سے ممکنہ تعلق جاننے کے لیے تفتیشی عمل شروع کر دیا گیا ہے۔

عینی شاہدین نے پولیس کو بتایا ہے کہ حملہ آور نے اپنی گاڑی راہگیروں پر چڑھاتے ہوئے اللہ اکبر کے نعرے بلند کیے اور چلایا کہ وہ یہ کام فلسطین کے بچوں کے لیے کر رہا ہے۔ خبر رساں ادارے اے ایف پی نے ذرائع کے حوالے سے بتایا ہے کہ یہ حملہ آور 1974 میں پیدا ہوا تھا اور بظاہر اس کا ذہنی توازن بھی درست معلوم نہیں ہوتا۔ ایسی اطلاعات بھی ہیں کہ وہ ذہنی دباؤ کے علاج کے لیے نفسیاتی کلینک بھی جاتا رہا ہے۔