غزہ پٹی ميں تعمير نو کے ليے فلسطينیوں اور اسرائيل کے مابين معاہدہ

اقوام متحدہ ميں مشرق وسطی کے ليے سفير رابرٹ سيری نے گزشتہ روز سلامتی کونسل کے ايک اجلاس ميں بتايا کہ اس ڈيل کے ذريعے غزہ ميں نجی سيکٹر کی مدد سے تعمير نو کا کام مکمل کيا جا سکے گا اور اس عمل ميں کليدی کردار فلسطينی اتھارٹی ادا کرے گی۔ فلسطينی اتھارٹی کے اندازوں کے مطابق غزہ پٹی ميں تعمير نو کے کام پر 7.8 بلين ڈالر کی لاگت آئے گی۔ اس حوالے سے ايک ڈونرز کانفرنس بارہ اکتوبر کو مصری دارالحکومت قاہرہ ميں منعقد ہو گی۔

يہ امر اہم ہے کہ اسرائيل کنسٹرکشن يا تعميرات ميں استعمال ہونے والا کوئی بھی ساز و سامان غزہ کی طرف نہيں جانے ديتا کيونکہ اسے يہ خدشہ ہے کہ يہ سامان حماس کے شدت پسند اسرائيل مخالف تنصيبات کھڑی کرنے کے ليے نہ استعمال ميں لائيں۔ تاہم رابرٹ سيری کے بقول اقوام متحدہ اپنے مبصرين کی موجودگی کے ذريعے يہ يقين دہانی کرا رہا ہے کہ تعمير نو کے ليے غزہ بھيجا جانے والا ساز و سامان محض سويلين مقاصد يا تعمير نو ہی کے ليے استعمال ميں لايا جائے گا۔

سلامتی کونسل کے اجلاس ميں اقوام متحدہ کے مندوب نے يہ نہيں بتايا کہ ڈيل کے تحت تعمير نو کا کام کب تک شروع ہو گا تاہم انہوں نے رپورٹروں سے بات چيت کرتے ہوئے کہا کہ اگر معاہدے پر نيک نيتی سے عمل در آمد ہو جاتا ہے، تو اقوام متحدہ جتنا جلدی ہو سکے کام شروع کرنے کے ليے تيار ہے۔

سيری نے اسی ماہ متاثرہ فلسطینی علاقوں کا دورہ کيا تھا اور ان کا کہنا ہے کہ ان کی ٹيم نے حيران کن حد تک تباہی ديکھی ہے۔ رابرٹ سيری کے مطابق غزہ ميں اسرائيل اور فلسطينیوں کی پچھلے دنوں جاری رہنے والی جھڑپوں کے نتيجے ميں اٹھارہ ہزار مکانات برباد ہوئے، جن کی وجہ سے قريب ايک لاکھ افراد بے گھر ہو گئے، جن ميں سے قريب پينسٹھ ہزار اب بھی اقوام متحدہ کی پناہ گاہوں ميں وقت گزار رہے ہيں۔ اسرائيل اور فلسطينیوں کے درميان اس سال ہونے والے مسلح تصادم کے نتيجے ميں 2100 سے زائد فلسطينی ہلاک ہوئے، جن ميں 500 بچے اور 250 عورتيں بھی شامل تھيں۔ قريب گيارہ ہزار فلسطينی زخمی بھی ہوئے۔ دوسری جانب اسرائيل کے 66 فوجی اور چھ شہری ہلاک ہوئے۔ اسرائيل کی طرف زخمی ہونے والے شہريوں کی تعداد 130 جبکہ فوجيوں کی تعداد 450 کے لگ بھگ تھی۔