عید: خوشیوں کی جگہ غزہ میں اداسی کا راج

آج اسرائیلی آپریشن کے اکیس ویں روز بھی اسرائیلی ٹینکوں سے برسائے جانے والے گولوں نے دو انسانوں کی جان لے لی۔ فرانسیسی نیوز ایجنسی اے ایف پی کے مطابق پیر اٹھائیس جولائی کو اسرائیلی گولہ باری کے نتیجے میں مارے جانے والے دو افراد میں ایک چار سالہ بچہ بھی شامل ہے اور یہ کہ ان ہلاکتوں کے ساتھ ہی تین ہفتے سے جاری اِس آپریشن میں اب تک مارے جانے والے فلسطینیوں کی تعداد بڑھ کر ایک ہزار سینتیس ہو گئی ہے۔ اب تک 46 اسرائیلی بھی مارے گئے ہیں، جن میں 43 فوجی بھی شامل ہیں۔

نیوز ایجنسی روئٹرز نے اپنے ایک جائزے میں ایک فلسطینی خاتون ابیر شَمالی کی داستان بیان کی ہے، جس کا بیٹا گزشتہ ہفتے مشرقی غزہ میں ہونے والی بمباری میں مارا گیا تھا۔ شَمالی نے روئٹرز کے ساتھ گفتگو میں اپنے تاثرات بیان کرتے ہوئے کہا:’’ایک ماں کیسا محسوس کرے گی، جب وہ عید کے روز اپنی آنکھیں کھولے اور اُسے اپنے پاس اپنا بیٹا نظر نہ آئے؟‘‘

روئٹرز نے لکھا ہے کہ زندہ لوگوں کے ساتھ عید کی خوشیاں منانے کی بجائے ابیرہ شَمالی اپنے بیٹے کی تازہ تازہ بنی ہوئی قبر کے کنارے بیٹھی تھی، غزہ کے اُن بہت سے دوسرے شہریوں کی طرح، جنہوں نے اب تک کی لڑائی میں مارے جانے والے ایک ہزار سے زیادہ فلسطینیوں کو خراجِ عقیدت پیش کرنے کے لیے عید کے روز قبرستانوں کا رخ کیا۔

شَمالی نے کہا:’’دنیا ہمیں دیکھ رہی ہے لیکن ہمارے لیے محسوس کچھ نہیں کرتی۔ اُنہوں نے فلسطینیوں کی زندگیاں کیوں ضائع کر دیں؟ وہ ہمارے ساتھ یہ کیوں کر رہے ہیں؟‘‘ شَمالی کا شجائیہ میں واقع گھر بھی بمباری میں تباہ ہو گیا کیونکہ اسرائیلیوں کے خیال میں غزہ کا یہ علاقہ حماس کے گڑھ کی حیثیت رکھتا ہے۔

تین ہفتے کی لڑائی کے بعد اب پیر اٹھائیس جولائی کو دونوں جانب سے گولہ باری میں بڑی حد تک کمی دیکھی جا رہی ہے کیونکہ حماس نے عید کے موقع پر چوبیس گھنٹے کی فائر بندی کا اعلان کر دیا ہے۔ اسرائیل نے کہا ہے کہ اب وہ اُسی صورت میں فائر کرے گا، جب اُس پر فائرنگ کی جائے گی۔ اُدھر حماس کا اصرار ہے کہ وہ اسرائیل پر راکٹ برسانا حتمی طور پر تب بند کرے گی جب اسرائیل اور مصر غزہ کی وہ ناکہ بندی ختم کریں گے، جس نے غزہ پٹی کے 1.8 ملین نفوس کے لیے زندگی عذاب بنا کر رکھ دی ہے۔

اُدھر گزشتہ رات نیویارک میں اقوام متحدہ کی سلامتی کونسل کے ایک ہنگامی اجلاس میں کوئی قرارداد منظور کرنے کی بجائے محض ایک بیان جاری کیا گیا، جس میں ’انسانی بنیادوں پر فوری اور غیر مشروط فائر بندی‘ پر زور دیا گیا اور جس پر اقوام متحدہ میں فلسطینی سفیر ریاض منصور نے مایوسی کا بھی اظہار کیا۔

دریں اثناء راملہ سے ملنے والی خبروں میں کہا گیا ہے کہ فلسطینی صدر حماس کے ارکان کو شامل کرتے ہوئے ایک ایسا وفد تشمکیل دے رہے ہیں، جو مصری دارالحکومت قاہرہ جائے گا اور حماس اور اسرائیل کے مابین فائر بندی کروانے کی کوششیں کرے گا۔